Ezekiel 23:1-49
23 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, don bailo asleo jeo ekech avoicheo dhuvo asleo.
3 Teo Ejipttant xindollki korunk lagleo, tanchea tornattponnar thaun tim xindollkechim kamam korunk laglim. Thoim tanchim horddim* muddʼddilim ani poile pavtti poxelim.
4 Vhoddlea bhoinnichem nanv Ohola* ani dhaktte bhoinnichem nanv Oholiba* aslem. Tim mhojim zalim ani tannim putank ani dhuvank zolm dilo. Ohola Samaria zaun asa ani Oholiba Jeruzalem zaun asa.
5 “Ohola mhoji astananch xindollkechim kamam korunk lagli. Ti loingik sombond dovrunk axen petton ticher mortat tea mog korpeam fattlean geli, tiche xezari Asiriekaram fattlean geli.
6 Tiche mog korpi nille kopdde ghalpi razpal ani odhikari asle. Te sogle rupest tornatte ani huxar ghoddesvar asle.
7 Ti Asiriechea famad putam sangata xindollkechem kam korit ravli. Ani jea lokam borabor ti loingik sombond dovrunk axen pettloli, tanchea kanttallo haddtta toslea murteam* sangata tinnem apleakuch oxudʼdh keli.
8 Ejipttant kelʼlim xindollkechim kamam tinnem soddun diunk nant. Karonn ti tornatti asli tednam thoim te* tichea sangata nhidle, tichim horddim poile pavtt poxelim ani loingik sombond* dovrunk pettloli tanchi as tannim bagoili.
9 Taka lagon, ticher mortat tea tichea mog korpeanchea, mhunnche Asiriekaranchea putanchea hatant hanvem tika dili, zanchea sangata loingik sombond dovrunk ti axen pettloli.
10 Tannim tika purnn toren vinglli keli, tichea putank ani dhuvank tiche koddlean kaddun ghetlim ani tika tolvarin marun uddoili. Bailam modem tichem nanv samkem piddʼddear zalem, ani tannim tika khast dili.
11 “Tichi bhoinn Oholiban tika polloili tednam, loingik sombond dovrunk pettloli tichi as anikui vaddli, ani tinnem aplea bhoinni poros paxtt xindollkechim kamam kelim.
12 Ti loingik sombond dovrunk axen petton tichea xezareanchea, mhunnche Asiriekaranchea putanchea, razpalanchea ani odhikareanchea fattlean vochonk lagli. He sogle bore-bore kopdde ghalun aslole rupest tornatte ani huxar ghoddesvar asle.
13 Oholiban apleakuch oxudʼdh keli tednam, donui bhoinno ekuch toren vagtat mhunn hanvem polloilem.
14 Punn Oholiba aplim xindollkechim kamam anikui vaddoit ravli. Tinnem vontticher dadleanchim kantoilʼlim chitram polloilim. Tim tambddo rong marlolea Kaldeikar dadleanchim chitram aslim.
15 Tanchea bhenddak pottʼtte bandlole ani mathear lamb munddaxe asle,* te zhuzaream bhaxen distale, tanchem sogleanchem rup Kaldeikaranchea desant zolmolʼlea Babilonkaram bhaxen aslem.
16 Tankam polloilea borabor tanchea sangata loingik sombond dovorchi tichi as pettli, ani tinnem aplea sondexkarank tea dadlea koddem Kaldeient dhaddle.
17 Tor Babilonache put tichea sangata nhidonk, tichea khatti lagim* ieit ravle, ani tannim loingik sombond* dovorpachi apli as bhagoun tika oxudʼdh keli. Tannim tika oxudʼdh kelea uprant ti tankam vitteli ani tinnem tankam fatt keli.
18 “Ti lojenastana xindollki korit ravli ani aplem vingllemponn ukteponnim dakhoit ravli tednam, mhaka tichi vitt ieunk lagli ani hanvem tichea vhoddlea bhoinnik kelʼli toxich tika fatt keli.
19 Ejipttant aplea tornattponnachea disamnim tinnem jim xindollkechim kamam kelʼlim tim ugddas korun, ti aplim xindollkechim kamam anikui vaddoit ravli.
20 Dadleancheo dovorloleo bailo, gaddvachea ani ghoddeachea linga sarkem ling aslolea dadleam fattlean voitat toxeo, ti loingik sombond dovorpachi as pettlolean aplea mog korpeam fattlean geli.
21 Oholiba, tum tornatti astana Ejipttant tannim tujim horddim poxelim ani oslim burxim kamam korunk tum axeun ravli.
22 “Taka lagon Oholiba, aik! Akʼkhea Vixvacho Dhoni Jehova oxem mhunntta: ‘Vitteun zankam tunvem fatt keloli, tea tujea mog korpeank hanv tujea add korunk voitam. Hanv tankam soglea vattentlean tujea add haddttolom.
23 Hanv Babilonachea putank ani soglea Kaldeikarank, Pekodachea, Shoachea ani Koachea dadleank, toxench Asiriekaranchea soglea putank tujea add haddttolom. Te sogle razpal, odhikari, zhuzari ani vinchlole dadle asat, je huxar ghoddesvar zaun asat.
24 Te rothancho ani chakancho vhoddlo avaz korit ani soinikanche zaite zome gheun tujer akromonn kortole. Te sogle, vhoddleo ani lhan ddhalo* gheun ani mathear helmett ghalun tujer akromonn kortole. Te tuka soglea vatten veddo ghaltole. Hanv tankam tuzo neai korunk odhikar ditolom ani tankam sarkem dista tea pormonnem te tuka khast laitole.
25 Hanv tujer mhozo soglo rag kaddttolom ani te ragan bhoron tuji poristhiti samki piddʼddear korun uddoitole. Te tujem nak ani kan katrun uddoitole ani tujea urlolea lokank tolvarin martole. Te tujea putank ani dhuvank tujea koddlean kaddun ghetole ani tujea lokam modem je urtole, tancho ujean zollon bhosm zatolo.
26 Te tuje kopdde kaddttole ani tujeo bhangracheo ani chandicheo vostu* kaddun ghetole.
27 Tunvem Ejipttant suru kelʼlim tim tujim burxim kamam ani xindollki hanv kabar korun uddoitolom. Tum tankam pollovpachem bond kortolem ani tuka porot kednanch Ejipttacho ugddas ieunchona.’
28 “Karonn Akʼkhea Vixvacho Dhoni Jehova oxem mhunntta: ‘Tum zancho dves korta ani tuka vitt ieta mhunn tunvem zankam fatt kelea, tanchea tabeant hanv tuka ditolom.
29 Te tuzo dves kortole, tunvem gham varoun zoddloli zodd luttun vhortole, ani tuka samki vinglli korun soddttole. Tunvem loz nastana dovorlole onoitik kuddiche sombond, toxench tunvem kelʼlim burxim kamam ani tujim xindollkechim kamam ugddapim zatolim.
30 Tujea sangata hem soglem ghoddttolem karonn eke xindoll baile bhaxen tum dusrea raxttram fattlean dhanvli ani tunvem tanchea kanttallo haddtta toslea murteamnim apleakuch oxudʼdh korun ghetli.
31 Tum sarkem tujea bhoinnichea panvlamnim cholʼli dekhun, tacho pelo hanv tujea hatant ditolom.’
32 “Akʼkhea Vixvacho Dhoni Jehova oxem mhunntta:
‘Tum tujea bhoinnichea khol ani rund peleantlean pietoli,Tuka polloun soglim tujeo moskoreo kortolim ani tuka hanstolim, karonn tea peleant hench bhorlolem asa.
33 Tum tuji bhoinn Samariecho pelo pietoli,Ho bhiranticho ani nasacho pelo zaun asa,To pieun tum ttaitt zatoli ani dukhan buddon voitoli.*
34 Tuka ho pelo pieunchoch poddttolo, toxench to pieun rito korcho poddttolo ani tuka tea matiechea peleache kuddke pasun chabddaunche poddttole,Ani uprant tum dukhan bhoron tujim horddim* pinztoli.
“Karonn hanvem svota hem mhunnttlam,” oxem Akʼkhea Vixvacho Dhoni Jehova mhunntta.’
35 “Taka lagon, Akʼkhea Vixvacho Dhoni Jehova oxem mhunntta: ‘Tum mhaka visorli ani tunvem mhaka fatt kelea. Taka lagon, tuka tujea burxea kamancho ani xindollkechea kamancho porinnam bhogcho poddttolo.’”
36 Uprant Jehovan mhaka mhunnttlem: “Munxachea puta, tum Oholacher ani Oholibacher zhoddttechem formonn martolo kai, ani tanchea vitt haddtta toslea kamam vixim tankam sangtolo kai?
37 Tannim pordvar kela ani tanche hat rogtan buddleat. Tannim kanttallo haddtta toslea tanchea murteanchi bhokti korun fokot pordvaruch korunk na, punn mhojea pasot zolmak haddlolea aplea putank pasun tannim murteank jevonn koxe ujeant bolidan mhunn bhettoile.
38 Tea bhair, tannim hem soglem mhaka kelem: Tannim tea disa mhozo povitr zago oxudʼdh kelo, ani mhoje sabath boxttaile.
39 Aplea putank kanttallo haddtta toslea murteam mukhar bolidanam mhunn bhettoilea uprant, tannim teach disa mhojea povitr zagear ieun to oxudʼdh kelo. Tannim mhojea svotachea ghora bhitor oxem kelem.
40 Pois thaun dadleank apounk, tannim ek sondexkar pasun dhaddlo. Te ietale tednam tunvem Oholiba, nhanvun-dhunvun aplea dolleank kazoll lailem ani tum bhangar-xingar* ghalun toiar zali.
41 Ani tum vochon borea toren nettoilʼlea eka sofacher* bosli. Tujea mukhar ek mez aslem, zacher tunvem mhozo dhump ani mhojem tel dovorlem.
42 Thoim mouza-mosti kortat tea dadleanchea zomeacho avaz aikonk ietalo. Tanchea modem ranvott vattarantlean haddlole bebde pasun asle. Tannim hea donui bailanchea hatank bresletteo* ghatleo ani tanchea mathear sobit mukutt ghatle.
43 “Tednam pordvar korun-korun thoklole baile vixim hanvem mhunnttlem: ‘Atam ti xindollkechim kamam korit ravtoli.’
44 Tor eklo xindoll baile lagim vochot ravta, toxe te tichea lagim vochot ravle. Heach toren burxim kamam korunk famad aslolea Ohola ani Oholiba koddem te vochot ravle.
45 Punn tannim kelʼlea pordvarak lagon ani tannim varoilʼlea rogtak lagon nitivont munis tankam dogainkui favo ti khast ditole. Karonn tannim pordvar kela ani tanche hat rogtant buddleat.
46 “Akʼkhea Vixvacho Dhoni Jehova oxem mhunntta: ‘Tancher dogaincherui akromonn korunk hanv ek vhoddli fouz haddttolom. Ti tankam luttʼttoli ani tanchi poristhiti oxi kortoli ki polloitoleanchem kalliz thottaktolem.
47 Ti fouz tankam fatraitoli ani tolvarin katrun uddoitoli. Ti tanchea putank ani dhuvank marun uddoitoli ani tanchim ghoram ujean lasoitoli.
48 Hanv desantlim soglim loz naslolim patki kamam* kabar kortolom ani sogleo bailo tumchea koddlean lisanv xiktolim ani konnuch tumchea bhaxen burxim kamam korchimnant.
49 Ti fouz, tumi kelʼlea burxea kamank lagon ani kanttallo haddtta toslea murteanchi bhokti korun kelʼlea patkank lagon tumkam khast ditolich, ani hanv Akʼkhea Vixvacho Dhoni Jehova mhunn tumkam vollkhon gheunk poddttolem.’”
Footnotes
^ Inglez bhaxent taka “breasts” mhunnttat.
^ Hacho orth “Tacho Tombu.”
^ Hacho orth “Mhozo Tombu Tichea Bhitor Asa.”
^ Jem Hebrev utor hanga uzar kelam, tem ghoddie “xenn” hea orthachea utrak sombondit asa, ani tem eka vostuchi kitli vitt ieta tem dakhounk uzar kortat.
^ Hem ghoddie Ejipttachea dadleank suchit korta.
^ Vo “ani onoitik kuddicho sombond.”
^ Vo “lamb pogddeo asleo.”
^ Vo “apli onoitik kuddicho sombond.”
^ Vo “tichea mog korpachea khatti lagim.”
^ Ek lhan ddhal, ji choddxe pavtt dhonu uzar kortat tanchea lagim astali.
^ Vo “nettouncheo vostu.”
^ Utran utor, “tum bebdikaien ani dukhan bhortoli.”
^ Inglez bhaxent taka “breasts” mhunnttat.
^ Vo “nettouncheo vostu.”
^ Vo “divanacher.”
^ Vo “maskoteo.”
