Ezekiel 37:1-28
37 Jehovacho hat mhojer aslo, ani aple povitr xokten Jehovan mhaka vhelo ani falkeantlea moidana modem ubo kelo. Tem moidan haddamnim bhorlolem aslem.
2 Tannem mhaka tea haddam bhonvtonnim bhonvddailo. Tea falkeachea moidanar soglim haddanch-haddam aslim tem hanvem polloilem, ani tim sarkinch suklolim.
3 Tannem mhaka vicharlem: “Munxachea puta, hea haddank porot jiv ieunk xokta kai?” Tednam hanvem mhunnttlem: “Akʼkhea Vixvachea Dhonia Jehova Deva, hem tor tum zannam.”
4 Tednam tannem mhaka mhunnttlem: “Hea haddam vixim bhasaunni kor ani tankam oxem mhunn, ‘Suklolea haddamno, Jehovacho sondex aikat:
5 “‘Akʼkhea Vixvacho Dhoni Jehova hea haddank oxem mhunntta: “Hanv tumchea bhitor svas ghaltolom ani tumi jivim zatolim.
6 Hanv tumkam xiro ieum-xeo kortolom, tumcher mas vaddom-xem kortolom, tumkam kat ieum-xi kortolom ani tumchea bhitor svas ghaltolom, ani tednam tumi jivim zatolim, ani hanv Jehova mhunn tumkam vollkhon gheunk poddttolem.”’”
7 Uprant, mhaka adnea diloli toxi hanv bhasaunni korunk laglom. Hanv bhasaunni kortam astananch ek avaz zalo, ho avaz kitem tori khoddkhoddtta toso aslo, ani tim haddam eka-mekak zuddonk laglim.
8 Uprant haddank xiro ietaleo, mas vaddttalem ani kat ietali tem hanvem polloilem. Punn azunui tanchea bhitor svas naslo.
9 Uprant tannem mhaka mhunnttlem: “Vareak bhasaunni kor. Munxachea puta, bhasaunni kor ani vareak oxem sang, ‘Akʼkhea Vixvacho Dhoni Jehova oxem mhunntta: “Varea,* charui vattentlean* ieo ani jivexim marlolea hea lokancher voch, jea vorvim tim jivim zatolim.”’”
10 Uprant, mhaka adnea diloli toxi hanvem bhasaunni keli. Tednam tanchea bhitor svas ailo, tim jivim zaunk laglim ani aplea paim-ancher ubim ravonk laglim. Tim ek ekdom vhoddli fouz zalim.
11 Uprant tannem mhaka mhunnttlem: “Munxachea puta, him akʼkhea Izraelachea ghoranneachim haddam zaun asat. Tim mhunnttat, ‘Amchim haddam sukleant, ani amkam kosloch bhorvonso na. Amcho purnn toren nas zala.’
12 Tor bhasaunni kor ani tankam sang, ‘Akʼkhea Vixvacho Dhoni Jehova oxem mhunntta: “Mhojea lokamno, hanv tumche fondd ukte korun, tumkam thoim thaun utthoitolom ani Izrael desant haddttolom.
13 Mhojea lokamno, hanv tumche fondd ukte korun tumkam utthoitolom tednam, hanv Jehova mhunn tumkam vollkhon gheunk poddttolem.”’
14 ‘Hanv tumchea bhitor mhoji povitr xokti ghaltolom ani tumi jivim zatolim. Hanv tumkam tumchea desant ravonk ditolom. Ani tumkam vollkhon gheunk poddttolem ki hanvem Jehovan, svota hem sanglam ani hanvem tem purnn kelam,’ oxem Jehova mhunntta.”
15 Jehovacho sondex porot ek pavtt mhaka mellʼllo. Tannem mhunnttlem:
16 “Ani tum, munxachea puta, ek boddi ghe ani tacher oxem boroi, ‘Juda pasot ani tachea sangata* aslolea Izraelachea lokam pasot.’ Uprant anik ek boddi ghe ani tacher oxem boroi, ‘Juze pasot ani tachea sangata* aslolea Izraelachea akʼkhea ghorannea pasot Efraimachi boddi.’
17 Uprant teo donui boddio ektthaim dhor, jea vorvim teo tujea hatant ekuch boddi koxi zatoli.
18 Jednam tuje lok* tuka oxem mhunnttole, ‘Hea soglea vostuncho orth kitem tem tum amkam sangchona kai?’
19 tednam tum tankam sang, ‘Akʼkhea Vixvacho Dhoni Jehova oxem mhunntta: “Hanv Efraimachea hatant asloli Juzechi boddi ghetolom ani tachea sangata aslolea Izraelachea kullank ghetolom, ani tankam Judachea boddiek zoddttolom. Hanv tankam ekuch boddi kortolom ani tim mhojea hatant ek zatolim.”’
20 Tum jea boddiencher boroita teo tujea hatant asonk zai, jea vorvim lok teo pollounk xoktole.
21 “Uprant tankam sang, ‘Akʼkhea Vixvacho Dhoni Jehova oxem mhunntta: “Hanv Izraelitkarank tea raxttrantlean bhair haddttolom zoim tim geleant, ani hanv tankam soglea vattentlean ektthaim kortolom ani tankam tanchea desant haddttolom.
22 Hanv tanchea desant tankam ek raxttr kortolom ani tim Izraelachea porvotancher ravtolim, ani tancher sogleancher ekuch raza raz choloitolo. Tea uprant tim don veg-vegllim raxttram zaunchimnant, nhoi mhunn don rajeam zaunchimnant.
23 Tim porot kednanch kanttallo haddtta toslea tanchea murteamnim,* vitt haddtta toslea tanchea kamamnim ani tanchea soglea opradamnim, apleakuch oxudʼdh korchimnant. Tannim mhojea sangata visvasghat korun jim patkam keleant, tanchea thaun salvar korun hanv tankam xudʼdh kortolom. Tednam te mhoje lok zatole ani hanv tancho Dev zatolom.
24 “‘“Mhozo sevok David tancho raza zatolo, ani tankam sogleank ekuch gonvlli astolo. Tim mhojea nitichea nirnnoi-am pormonnem choltolim ani mhoje kaide bariksannen pallttolim.
25 Hanvem mhozo sevok Jakobak dilʼlea desant, zoim tumche purvoz jielʼle, thoim tim ravtolim. Tim, tanchim bhurgim* ani tanchea bhurgeanchim bhurgim thoim sodankal ravtolim. Ani mhozo sevok David sodankal tancho mukheli* astolo.
26 “‘“Hanv tanchea sangata xanticho ek korar kortolom, ani to korar sasnak urtolo. Hanv tankam tanchea desant stapon kortolom, tancho ankddo vaddoitolom ani tanchea modem mhozo povitr zago* sasnak stapon kortolom.
27 Mhozo tombu* tanchea sangata* astolo, ani hanv tancho Dev zatolom, ani te mhoje lok zatole.
28 Mhozo povitr zago sasnak tanchea modem astolo tednam, hanv Jehova, Izraelak povitr kortam mhunn soglea raxttrank vollkhon gheunk poddttolem.”’”
Footnotes
^ Vo “Svasa.”
^ Utran utor, “vareantlean.”
^ Vo “tache vangddi.”
^ Vo “tache vangddi.”
^ Utran utor, “tujea lokanche put.”
^ Jem Hebrev utor hanga uzar kelam, tem ghoddie “xenn” hea orthachea utrak sombondit asa, ani tem eka vostuchi kitli vitt ieta tem dakhounk uzar kortat.
^ Utran utor, “put.”
^ Vo “kunvor.”
^ Vo “Devmondir.”
^ Vo “Mhozo ravpacho zago; Mhojem ghor.”
^ Vo “tancher.”
