Ezekiel 24:1-27
24 Nnovʼvea vorsachea dhavea mhoineachea dhavea disa, Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, aichi hi tarik boroun dovor. Aicheach disa Babilonachea razan Jeruzalemacher akromonn korunk suru kelam.
3 Tum tea odhikara add vochpi ghorannea vixim ek mhunnʼnni* sang ani tanchea vixim oxem mhunn:
“‘Akʼkhea Vixvacho Dhoni Jehova oxem mhunntta:
“Randpachem aidon* ujeacher dovor ani tantunt udok ghal.
4 Tantunt masache kuddke ghal, sogle bore-bore kuddke ghal.
Zangllache ani bhuzache kuddke ghal. Tem borea-borea haddamnim bhor.
5 Hinddantlem sogleant borem menddrum ghe, ani aidona ponda soglea vatten lakddam ghal.
Ani tantunt masache kuddke ani haddam xizoi.”’
6 “Taka lagon, Akʼkhea Vixvacho Dhoni Jehova oxem mhunntta:
‘Rogot varovpi hea xaracher hai! Kollom laglolea randpachea aidonacher hai, zachi kollom kaddloli na.
Ek-ek korun te masache kuddke bhair kadd, tanchea pasot sorti ghalum naka.
7 Karonn hea xaran varoilʼlem rogot azunui tachea bhitoruch asa. Tannem tem uktea khoddpacher votoilem.
Tannem tem matien dhampunk, zomnir votounk na.
8 Tannem varoilʼlem rogot hanvem chokchokta toslea uktea khoddpacher soddun dilam,Tem dhampchem nhoi mhunn hanvem tem toxench soddun dilam.
Sudd gheunk mhozo rag pettcho mhunn hanvem oxem kelam.’
9 “Taka lagon, Akʼkhea Vixvacho Dhoni Jehova oxem mhunntta:
‘Rogot varovpi hea xaracher hai!
Hanv tachea soglea vatten lakddachi ras anikui vaddoitolom.
10 Vhoddlea-vhoddlea lakddanchi ras korat ani uzo pettoiat,Mas borem xizoiat, kald* bhair votoiat, ani haddam zollon vochonk diat.
11 Ritem aidon gorom korunk kollxeancher dovor,Jea vorvim tachem tambem gorom zaun tambddench zatolem.
Tachem mhelleponn tacheach bhitor pigollttolem, ani tachi kollom zollon voitoli.
12 Soglo vavr funkott gelo ani puro zalam,Karonn tika itli kollom laglea ki ti voichi na.
Tika kollme soit ujeant uddoiat!’
13 “‘Tum tujea burxea kamank lagon mhellem zalam. Hanvem tuka nitoll korcho proitn kelo, punn tujea mhelleponna thaun tum nitoll zainaslem. Tujea add pettlolo mhozo rag jea meren xant zaina, tea meren tum nitoll zaunchem na.
14 Hanvem Jehovan, svota hem sanglam ani tem purnn zatolench. Hanv tuka khast diunk fatti sorchom na, tuji matxi pasun kakut korchom na, ani mhozo nirnnoi pasun bodolchom na. Tujea vagnnuke pormonnem ani kamam pormonnem te tuzo neai kortole,’ oxem Akʼkhea Vixvacho Dhoni Jehova mhunntta.”
15 Jehovacho sondex porot ek pavtt mhaka mellʼllo. Tannem mhunnttlem:
16 “Munxachea puta, tujea mogachea sangateak hanv okosmat tujea koddlean kaddun ghetolom. Tunvem tachea pasot dukh korchem nhoi,* roddchem nhoi, vo dukam gollounchim nhoi.
17 Tum bhitorlea-bhitor pirgoi, ani meloleam pasot asloleo riti-rivazo pallinaka. Toklek munddaso* band ani paim-ank zotim ghal. Tujeo mixeo* dhampinaka ani dusrim tuka unddo haddun ditat tednam to khainaka.”
18 Sokallim hanv lokam lagim uloilom ani sanjer mhoji bail meli. Tor dusrea disa sokallim, mhaka adnea dilʼli toxench hanvem kelem.
19 Tednam lok mhaka mhunnonk lagle: “Tum korta teo vostu amkam koxeo lagu zatat tem tum amkam sangxi?”
20 Hanvem tankam sanglem: “Jehovacho ho sondex mhaka mellʼlla. Tannem mhunnttlem,
21 ‘Izraelachea ghoranneak sang: “Akʼkhea Vixvacho Dhoni Jehova oxem mhunntta, ‘Zacho tumkam gorv bhogta, zo tumkam khub avoddtta ani zaka tumi kallzantlean axetat tea mhojea povitr zageak hanv oxudʼdh korchom asam. Tumi fatti soddlolea tumchea putancho ani dhuvancho tolvarin nas zatolo.
22 Tednam hanvem kelam toxench tumkam korunk poddttolem. Tumi tumcheo mixeo dhampchenant ani dusrim tumkam haddun dita to unddo tumi khaunchenant.
23 Tumchea matheancher munddaxe* ani paim-ank zotim astolim. Tumi dukh korchenant vo roddchenant. Tachea bodlek, tumi tumchea guneanvamnim kuson voitole ani eka-mekak polloun pirgotole.
24 Ezekiel tumchea pasot ek khunna zala. Tannem kelam toxench tumi-i kortole. Heo sogleo vostu ghoddttoleo tednam, hanv Akʼkhea Vixvacho Dhoni Jehova mhunn tumkam vollkhon gheunk poddttolem.’”’”
25 “Munxachea puta, jea disa hanv tanche koddlean tancho kilʼlo kaddun ghetolom, mhunnche tankam khuxalkai dita, tankam khub avoddtta ani te kallzantlean axetat ti sobit vost hanv tanchea koddlean kaddun ghetolom, toxench hanv tanchea putank ani dhuvank pasun tanche koddlean kaddun ghetolom,
26 tea disa aplo jiv vanchoun pollon ailʼlo munis tuka ieun hi khobor ditolo.
27 Tea disa, tum aplem tondd ugddun tea pollon ailʼlea munxa lagim uloitolo. Tea uprant tum mono urchona. Tum tanchea pasot ek khunna zatolo, ani hanv Jehova mhunn tankam vollkhon gheunk poddttolem.”
