Ezekiel 14:1-23
14 Izraelache thodde vhoddil aile ani mhojea mukhar bosle.
2 Magir Jehovacho ho sondex mhaka mellʼllo:
3 “Munxachea puta, hea munxamnim tanchea kanttallo haddtta toslea murteam* fattlean vochpacho ghott nichov kela, ani tannim lokam mukhar addkholl ghalta toslo fator dovorla zaka lagon lok patkant poddttat. Atam hech munis mhoje koddem margdorxon magonk ietat, tor hanv tankam kiteak zobab dium?
4 Tor atam tum tanchea lagim uloi ani tankam sang, ‘Akʼkhea Vixvacho Dhoni Jehova oxem mhunntta: “Eka Izraelitkaran, kanttallo haddtta toslea aplea murteam fattlean vochpacho ghott nichov kela, ani to lokam mukhar addkholl ghalta toslo fator dovorta, zaka lagon lok patkant poddttat, ani uprant margdorxon magonk eka provadea koddem ieta zalear, hanv Jehova, tache koddem jitleo kanttallo haddtta tosleo murteo asat tea pormonnem taka khast ditolom.
5 Hanv Izraelachea ghoranneachea lokanchea kallzamnim bhirant ghaltolom* karonn tannim sogleamnim mhaka soddun dila. Ani te tanchea kanttallo haddtta toslea murteam fattlean geleat.”’
6 “Taka lagon, Izraelachea ghoranneak sang, ‘Akʼkhea Vixvacho Dhoni Jehova oxem mhunntta: “Tumi sogle mhojea lagim porot ieiat. Kanttallo haddtta toslea tumchea murteam thaun ani vitt haddtta toslea soglea kamam thaun pois sorat.
7 Karonn zor ek Izraelitkar vo Izraelant ravpi ek pordexi mhojea thaun pois voita ani tannem kanttallo haddtta toslea tachea murteam fattlean vochpacho ghott nichov kela, ani to lokam mukhar addkholl ghalta toslo fator dovorta, zaka lagon lok patkant poddttat, ani uprant to margdorxon magonk eka provadea koddem ieta zalear, hanv Jehova, svota tea munxak zobab ditolom.
8 Hanv tea munxachea add voitolom ani tachi oxi poristhiti kortolom ki taka polloun dusreank xittkaunni mellttoli ani lok tacher mhunnʼnni toiar kortole. Hanv taka mhojea lokam modlo kaddun uddoitolom ani hanv Jehova mhunn tumkam vollkhon gheunk poddttolem.”’
9 “‘Punn to provadi fosta ani bhasaunni sangta zalear, hanvem Jehovanuch tea provadeak fosoila mhunn zannam zaiat. Hanv tachea add mhozo hat ubartolom ani mhojea lokam modlo, Izraela modlo hanv taka nanch korun uddoitolom.
10 Tea provadeak ani tachea lagim margdorxon magtoleak aplea guneanvachem vojem ubarunk poddttolem. Margdorxon magpi, provadea itloch guneanvkari zatolo.
11 Hea vorvim Izraelachem ghorannem mhojea thaun pois vochon anik bhottokchem na ani tanchea soglea opradank lagon tem apleakuch anik oxudʼdh korchem na. Ani te mhoje lok zatole ani hanv tancho Dev zatolom,’ oxem Akʼkhea Vixvacho Dhoni Jehova mhunntta.”
12 Jehovacho sondex porot ek pavtt mhaka mellʼllo. Tannem mhunnttlem:
13 “Munxachea puta, ek des mhaka ovisvaxi zaun mhojea add patok korta zalear hanv tachea add mhozo hat ubartolom ani tachea jevnnachea vostuncho nas korun uddoitolom.* Toxench tea desacher hanv bhuk dhaddttolom ani tantuntlea munxank ani zonvarank kabar korun uddoitolom.”
14 “‘Tea desant Noah, Daniel ani Job, he tigui munis asle zalear pasun tanchea nitivontponnak lagon te fokot aploch jiv salvar korunk pavtole,’ oxem Akʼkhea Vixvacho Dhoni Jehova mhunntta.”
15 “‘Vo hanvem akʼkhea desant bhirankull ranvotti zonvaram dhaddlim zalear, tim lokank khaun des rito kortolim* ani osadd korun soddttolim. Ani hea ranvotti zonvarank lagon konnuch thoinchean pasar zaunchona.
16 Hanv mhojea jivacho soput gheun sangtam, hea desant he tigui munis asat zalear pasun te aplea putank toxench aplea dhuvank salvar korunk xokchenant. Te fokot apleakuch salvar korunk xoktole ani akʼkho des padd zaun voitolo,’ oxem Akʼkhea Vixvacho Dhoni Jehova mhunntta.”
17 “‘Vo hanvem tea desa add tolvar haddun mhunnttlem: “Tolvar hea desantlean pasar zaum,” ani hanvem munxak toxench zonvarak marun uddoilear,’
18 Akʼkhea Vixvacho Dhoni Jehova mhunntta, ‘Hanv mhojea jivacho soput gheun sangtam, hea desant he tigui munis aslear pasun te aplea putank toxench aplea dhuvank salvar korunk xokchenant. Te fokot apleakuch salvar korunk xoktole.’”
19 “‘Vo hanvem tea desacher pidda dhaddli ani tacher mhozo krodhacho pelo votoun munxak toxench zonvarak marun uddoun rogot varoilem zalear,’
20 Akʼkhea Vixvacho Dhoni Jehova mhunntta, ‘Hanv mhojea jivacho soput gheun sangtam, hea desant Noah, Daniel ani Job asle zalear pasun te aplea putank toxench aplea dhuvank salvar korunk xokchenant. Te aplea nitivontponnak lagon fokot apleakuch salvar korunk xoktole.’”
21 “Akʼkhea Vixvacho Dhoni Jehova oxem mhunntta: ‘Jeruzalemantlean munxacho ani zonvaracho nas korun uddounk hanv tolvar, bhuk, ranvotti zonvaram ani pidda dhaddun taka khast laitolom tednam oxem ghoddttolem.
22 Punn tantuntle thodde lok vanchtole, ani tankam tanchea putam ani dhuvam sangata desantlean bhair haddttole. Te tumchea lagim ietole ani tumi tanchi vagnnuk ani tancheo korneo polloitolim tednam hanvem Jeruzalemacher hem odruxtt kiteak haddlem, hanvem tanchea add heo sogleo vostu kiteak keleo tem zannam zaun tumkam bhuzvonn mellttoli.’”
23 “‘Tumi tanchi vagnnuk ani tancheo korneo polloitolim tednam, hanvem tanchea add jem kelem tem bexttench korunk na mhunn tumi zannam zatolim ani tumchem mon xant zatolem,’ oxem Akʼkhea Vixvacho Dhoni Jehova mhunntta.”
Footnotes
^ Jem Hebrev utor hanga uzar kelam, tem ghoddie “xenn” hea orthachea utrak sombondit asa, ani tem eka vostuchi kitli vitt ieta tem dakhounk uzar kortat.
^ Utran utor, “Izraelachea ghoranneachea kallzacher kobzo kortolom.”
^ Utran utor, “tachea unddeacho dor ek danddo moddun uddoitolom.” Ho ghoddie unddo lamboupachea danddeak suchit korta.
^ Vo “tim desantlea bhurgeank marun uddoitolim.”
