Ezekiel 1:1-28
1 Hanv 30-avea vorsachea chovthea mhoineachea panchvea disa, koident aslolea lokam sangata Kebar nhoim-e lagim aslom tednam mollob uktem zalem ani mhaka Deva thaun dorxonam disonk laglim.
2 Tea mhoineachea panchvea disa—mhunnche, Jehoiakin Razachea koidechea panchvea vorsa—
3 Jehovachem* utor iadnik Buzicho put, Ezekielak* mellʼllem. To Kaldeikaranchea desant Kebar nhoim-e lagim ravtalo. Thoim Jehovachi xokti tacher kam korunk lagli.*
4 Hanv polloitalom tednam, mhaka dorxonant utʼtore thaun ek bhirankull vadoll ieta tem dislem. Teach borabor, bhonvtonnim zhogzhogit uzvadd aslolem ek vhoddlem kup aslem. Tea kupantlean ujeachem agttem bhair sortalem.* Ani ujeantlean bhangar ani chandi bhaxen kitem tori chokchoktalem.
5 Tantuntlean char jivea pranneam bhaxen kitem tori dislem ani tanchea modlea dor ekleachem rup munxa bhaxen aslem.
6 Dor eka pranneak char tonddam ani char pakhotte asle.
7 Tanche paim nitt asle, ani tanchea paim-anchim tallttam paddkuleachea fuddam bhaxen aslim. Tanche paim chokchoktolea tambea bhaxen chokchoktale.
8 Tanchea charui pakhotteam khala munxachea hata sarko hat aslo. Charui pranneank tonddam ani pakhotte asle.
9 Tanche pakhotte eka-mekak tenktale. Te fuddem voitale tednam nitt fuddem voitale. Te khoincheach vatten vollonasle.
10 Charui pranneanchim tonddam oxim aslim: Dor ekleak fuddlea vatten munxachem tondd, uzvea vatten xinvachem tondd, davea vatten boilachem tondd ani fattlea vatten ghonnichem tondd aslem.
11 Tanchim tonddam oxinch aslim. Tanche pakhotte tanchea voir posorlole asle. Dor eka pranneache don pakhotte eka-mekak tenktale ani urlole don pakhotte tanchi kudd dhamptale.
12 Te fuddem voitale tednam nitt fuddem voitale. Povitr xokti tankam zoim vochonk fuddem kaddttali, tea vatten te voitale. Ani te fuddem voitale tednam khoincheach vatten vollonasle.
13 He jive pranni pollounk zollttea inglleam bhaxen distale ani tanchea modem ujeache zolltte chuddi* bhaxen kitem tori aslem jem fattim-fuddem voitalem, ani ujeantlean zoglam martalim.
14 He jive pranni fuddem vochon porot ietale tednam te chokchoktolea zoglam sarke distale.
15 Hanv tea char tonddanchea pranneank dhean diun polloitalom tednam, dor ekleachea kuxik prithumer ek rodh* aslem tem hanvem polloilem.
16 Charui rodham oxe toren kelʼlim ki tim krisolaitt hirea* sarkim chokchoktalim. Tim charui ek-sarkinch distalim ani tim hea toren toiar kelʼlim ki polloitana, eka rodha bhitor anik ek rodh bosoilam oxem distalem.*
17 Tim rodham khoinchea-i vatten voitalim tednam, tim vollonastana vochonk xoktalim.
18 Dor eka rodhachem rim thottakpa sarkem aslem, karonn tem khubuch unch aslem ani tacher sogleak dolle asle.
19 Te jive pranni fuddem voitale tednam tanchea sangata tim rodham-i fuddem voitalim. Ani te jive pranni prithumer thaun voir voitale tednam tanchea sangata tim rodham-i voir voitalim.
20 Povitr xokti tankam jea zagear vochonk fuddem kaddttali, thoim te voitale. Povitr xokti zoim voitali, thoim te-ui voitale. Jednam jive pranni voir voitale tednam tanchea sangata rodham-i voir voitalim. Karonn ji xokti jivea pranneancher kam kortali, tich xokti rodhamnim pasun asli.
21 Jive pranni fuddem voitale tednam tanchea sangata rodham-i voitalim. Ani jive pranni thambtale tednam tanchea sangata rodham-i thambtalim. Te pranni prithumer thaun voir voitale tednam rodham pasun tanchea sangata voir voitalim. Karonn ji xokti jivea pranneancher kam kortali, tich xokti rodhamnim pasun asli.
22 Tea jivea pranneanchea tokle voir kanchechea zomni bhaxen kitem tori posorlolem aslem. Tem borfa bhaxen itlem chokchoktalem ki utramnim pasun sangonk zaina.
23 Kanchechea zomni ponda jivea pranneanche pakhotte nitt asle,* ani tanche pakhotte eka-mekak tenktale. Dor ek pranni aplea don pakhotteamnim apli kudd eke vatten dhamptalo ani urlolea don pakhotteamnim apli kudd dusre vatten dhamptalo.
24 Hanvem tanchea pakhotteancho avaz aikolo tednam mhaka to ghos-ghoxeamnim vhanvtolea udkachea avaza sarko ani Sorvxoktivont Devachea avaza sarko dislo. Te fuddem voitale tednam tancho avaz eka foujechea avaza sarko aslo. Te eka zagear ube ravtale tednam te aple pakhotte sokol kortale.
25 Tanchea tokle voir ji kanchechi zomin asli, tachea voir thaun ek avaz ietalo. (Te eka zagear ube ravtale tednam te aple pakhotte sokol kortale.)
26 Tanchea tokle voir ji kanchechi zomin asli, tachea voir kitem tori aslem jem safair fatra* bhaxen distalem ani tem pollounk eka xinvasona bhaxen aslem. Xinvasonar konn tori boson aslo, zo pollounk munxa bhaxen distalo.
27 Zo bhag tachem bhendd ani tacho voilo bhag koso distalo, to bhangar ani chandi bhaxen chokchoktalo. Tantuntlean ujea sarkem kitem tori bhair sortalem. Bhenddachea sokoilo bhag ujea sarko distalo. Tachea sorvbhonvtonnim posorlolo loklok,
28 pavsachea disa kupamnim dista tea rainbow bhaxen aslo. Hea toren tachea bhonvtonnim uzvadd posorlolo distalo. To uzvadd pollounk Jehovachea mhoime bhaxen distalo. Hanvem hem polloilem tednam hanv tachea mukhar zomnir umto poddlom ani mhaka konn tori uloita tacho avaz aikonk ailo.
Footnotes
^ Hacho orth “Dev Ghottai Dita.”
^ Utran utor, “hat tacher ailo.”
^ Vo “kupantlean zoglam martalim.”
^ Vo “divtte; moxali.”
^ Vo “chak.”
^ Holldduvo vo ghoddie hirvo fator. Inglez bhaxent “chrysolite.”
^ Ghoddie, donui rodham ekach size-ichim aslim ani ek rodh dusrea rodhant addvem bosoilʼlem.
^ Vo ghoddie, “nitt posorlole asle.”
^ Bible-ant sanglole safair fator ghoddie nillea mannkank suchit kortat.
