Ezekiel 19:1-14
-
Izraelachea mukhelea pasot ek dukhachem git (1-14)
19 “Tum Izraelachea mukheleam vixim ek git* mhunn
2 ani oxem sang,‘Tuji avoi konn asli? Ti xinvam modem ravpi ek xinvinn asli.
Tinnem xoktivont tornattea xinvam modem ravon aplea porank vaddoilim.
3 Tinnem vaddoilʼlea poram modlo ek xinv xoktivont tornatto xinv zalo.
To xikar korunk xiklo,*Tannem munxank pasun khaun uddoile.
4 Raxttramnim tachea vixim aikolem ani tannim taka fas manddun fonddant uddoilo ani dhorlo,Ani tachea nakant gore ghalun tannim taka Ejipttant haddlo.
5 Ti tachi vatt polloit ravli, punn xevottak to porot ietolo mhunn kainch bhorvonso na hem tika kollʼllem.
Tednam tinnem aplea poram modlea anik eka xinvak vaddoilo ani taka ek xoktivont tornatto xinv korun dhaddlo.
6 To pasun dusrea xinvam borabor bhonvlo ani khorench ek xoktivont tornatto xinv zalo.
To xikar korunk xiklo,* ani tannem munxank pasun khaun uddoile.
7 To paim-ancho avaz korinastana, tanchea vhoddlea gopuramnim gelo ani tannem tanchim xaram padd korun uddoilim,Tea padd zalʼlea desant to gorozta to avaz sogleak aikonk ieunk laglo.
8 Bhonvtonnchim raxttram zall uddoun taka dhorunk tachea add ailim,Ani tannim khonnlolea fonddant to poddlo.
9 Tachea nakant gore ghalun tannim taka pinzreant ghatlo ani Babilonachea raza lagim haddlo.
Tacho avaz porot kednanch Izraelachea porvotancher aikonk ieuncho nhoi mhunn tannim taka thoim koidi kelo.
10 Tuji avoi udka lagim lailolea tea drakxanchea vali sarki asli ji tujea rogtant asa.*
Bhorpur udok aslem dekhun ti foll diunk lagli ani ti khandeamnim bhorli.
11 Tiche khande* vaddle ani ghott zale. Tanchea thaun raz choloupeanche rajeache dandde* toiar korunk zata title te ghott zale.
Ti vaddot geli ani dusrea zhaddam poros lamb zali,Ti itli unch vaddli ani itlea panamnim bhorli, ki ti pois thaun pasun disonk lagli.
12 Punn Devan krodhan bhoron tika umttun kaddli ani prithumer xevttili,Ani udentechea varean tichim follam sukoilim.
Tiche ghott khande marun uddoile ani te sukle, uprant ujean tancho bhosm korun uddoilo.
13 Atam tika ranvott vattarant lailea,Udok naslolea suke zomnir tika lailea.
14 Tichea khandeank laglolo* uzo posorlo ani tea ujean tichea fantteancho ani follancho bhosm kelo,Ticher ekui ghott khando uronk na, razvottki cholounk ekui rajeacho danddo* uronk na.
“‘Hem ek dukhachem git zaun asa, ani hem ek dukhachem git* mhunn urtolem.’”
Footnotes
^ Hem dukh kortat tea vellar gaitat toslem git.
^ Utran utor, “xikar pinzunk xiklo.”
^ Utran utor, “xikar pinzunk xiklo.”
^ Vo ghoddie, “drakxanchea molleantlea eka vali sarki asli.”
^ Vo “dandde.”
^ Vo “rajdondd.” Xobdhkox polloi.
^ Vo “danddeank laglolo.”
^ Vo “rajdondd.” Xobdhkox polloi.
^ Hem dukh kortat tea vellar gaitat toslem git.
