Ezekiel 4:1-17
4 “Ani munxachea puta, tum ek vitto ghe ani to tujea mukhar dovor. Uprant tea vitteacher kantoun Jeruzalem xarachem chitr kadd.
2 Uprant taka veddo ghal, tachea bhonvtonnim durig band, toxench tachea bhonvtonnim choddtti toiar kor, thoim zhuzache tombu ubar, ani tache darvontte ani durgam moddun uddoitat toslim vhoddlim sadonam gheun gherav ghal.
3 Ek lokhnnacho tovo ghe ani to tujea ani xara modem ek lokhnnachi vonott koso ubo kor. Uprant tea xarak ragan polloi, ani taka veddo ghal. Hea toren tacher kobzo kor. Izraelachea ghoranneak hi ek khunna zaun asa.
4 “Uprant tunvem tujea davea vatten add poddonk zai, ani Izraelachea ghoranneacho guneanv tujer* gheunk zai. Tum jitle dis tea vatten add poddon ravtolo, title dis tum tancho guneanv tujer gheun astolo.
5 Izraelachea ghorannean jitlim vorsam mhojea add patok kelem, title dis hanv tujea pasot nemtolom. Tum 390 dis Izraelachea ghoranneacho guneanv tujer gheun ravtolo.
6 Ani tunvem te dis purnn korunk zai.
“Uprant, tum tujea uzvea vatten add poddttolo ani tum 40 dis Judachea ghoranneacho guneanv tujer gheun ravtolo. Hanvem dor eka vorsa pasot ek dis, hoi, dor eka vorsa pasot ek dis nemla.
7 Magir tum tujea haticho kopddo voir kaddttolo ani ragan Jeruzalemak ghatlolo veddo polloitolo, ani tunvem tachea add bhasaunni korchi poddttoli.
8 “Polloi! Veddo ghatlole dis purnn zainant tea meren, tunvem eka vattentlean dusre vatten vollcho nhoi mhunn hanv tuka doriemnim bandtolom.
9 “Tunvem gonv, zov,* ollsande,* dall, zondlle* ani holkea toreche gonv* gheun eka aidonant ghalunk zai ani tantuntlean tujea pasot ek unddo toiar korunk zai. Karonn jitle dis tum eke vatten add poddlolo astolo title-i dis, mhunnche 390 dis tum oslo unddo khatolo.
10 Tum dor disa 20 shekel* unddo meztolo ani khatolo. Tum to disachea veg-vegllea tharailʼlea vellar khatolo.
11 “Ani tum mezun udok pietolo. Tum dor disa don kopam* udok pietolo. Tum tem disachea veg-vegllea tharailʼlea vellar pietolo.
12 “Zovacho gol unddo toiar korun khatat toso, tum ho gol unddo korun khatolo. Ani lokam mukhar, munxachea suklolea hollxigecher tum to bhazun khatolo.”
13 Jehovan fuddem mhunnttlem: “Hanv Izraelitkarank dusrea raxttram modem ximpddaitolom tednam, thoim tim heach toren aplo unddo—aplo oxudʼdh unddo—khatolim.”
14 Tednam hanvem mhunnttlem: “Naka! Akʼkhea Vixvachea Dhonia Jehova Deva, mhaka toxem korunk lainaka! Tornattponnar thaun aiz meren hanv kednanch oxudʼdh zaunk na. Hanvem moron poddlolea zonvarachem, vo ranvotti zonvaran marun uddoilʼlea zonvarachem mas kednanch khaunk na, ani aiz meren hanvem mhojea tonddant mhellem* mas ghalunk na.”
15 Tednam tannem mhaka mhunnttlem: “Borem, hanv tuka munxachea hollxige bodlek xenn uzar korunk ditolom ani tacher tum tuzo unddo bhazun khatolo.”
16 Uprant tannem mhunnttlem: “Munxachea puta, hanv Jeruzalemant jevonn-khann bond korun uddoitam.* Lok uskean bhoron, unddo zokhun-zokhun khatole ani bhirantin bhoron udok mezun-mezun pietole.
17 Lokamnim unddo ani udok unnem aslolean eka-mekak thottakun pollounchem ani tannim aplea guneanvak lagon khast sosun kabar zaun voichem mhunn oxem ghoddttolem.
Footnotes
^ Utran utor, “tacher,” mhunnche, Ezekielache dave vatten.
^ Inglez bhaxent taka “barley” mhunnttat.
^ Inglez bhaxent “broad beans.”
^ Vo “bazri.” Inglez bhaxent “millet.”
^ Inglez bhaxent “spelt.”
^ Sumar 230 gram. Mahiti B14 polloi.
^ Utran utor, “hinacho sovʼvo vantto,” mhunnche, sumar 0.6 liter. Mahiti B14 polloi.
^ Vo “oxudʼdh.”
^ Utran utor, “unddeache dandde moddttam.” Hem ghoddie unddo lavun dovortat tea danddeak suchit korta astolem.
