Ezekiel 18:1-32
18 Jehovacho sondex porot ek pavtt mhaka mellʼllo. Tannem mhunnttlem:
2 “Izrael desant hi kosli mhunnʼnni uzar kortat, ‘Bapaimnim ambott drakxam khailim, punn putanche dant ambott zale’?
3 “Akʼkhea Vixvacho Dhoni Jehova mhunntta, ‘Hanv mhojea jivacho soput gheun sangtam, hea fuddem tumi Izraelant hi mhunnʼnni uzar korchenant.
4 Polloi! Sogleanchea jivacher* mhaka odhikar asa. Bapaichea jivacher asa tosoch, putachea jivacher pasun mhaka odhikar asa. Zo munis* patok korta toch mortolo.
5 “‘Ek munis nitivont asa mhunn chintat. To sodanch neai-an vagta ani sarkem tench korta.
6 To porvotancher murteam mukhar bolidan mhunn bhettoilʼleo vostu khaina, Izraelachea ghoranneachea kanttallo haddtta toslea murteam* koddem axeun polloina, aplea xezareachea baile sangata pordvar korina,* vo mhoineachi palli chalu aslolea baile sangata kuddicho sombond dovorna.
7 To konnancheach sangata vaitt ritin vagona, rinn gheupean tache koddem ghannak dovorloli vost* to taka porot dita, to konnankuch luttna, tachea bodlek to bhukeloleank aplem jevonn dita, ani zache koddem ang dhampunk kopdde na taka kopdde dita.
8 To jur ghena vo konnanchoch faido gheun zoddina, to onʼneai korina, to don munxam modem zhogddim suttavim kortana sarko neai korta.
9 To mhojea kaideam pormonnem cholon ani mhoje nitiche nirnnoi pallun visvaxi ravta. Oslo munis nitivont zaun asa ani to jivo urtoloch,’ oxem Akʼkhea Vixvacho Dhoni Jehova mhunntta.
10 “‘Atam taka ek put asa mhunn chintat, zo luttpi vo khun korpi* zata vo hantuntli khoinchi-i vost korta,
11 (zantuntli ekui vost tachea bapain korunk na) zoxem to porvotancher murteam mukhar bolidan mhunn bhettoilʼleo vostu khata, aplea xezareachea baile sangata pordvar korta,*
12 to gorjevontam sangata ani goribam sangata vaitt ritin vagta, dusreank luttʼtta, rinn gheupean tache koddem ghannak dovorloli vost taka porot dina, kanttallo haddtta toslea murteam koddem axeun polloita, vitt haddtta toslim kamam korta,
13 to jur gheta, ani dusreacho faido gheun apunn zoddtta. Oslo put jivo urchona. Tannem heo sogleo vitt haddtta tosleo vostu keleat dekhun to mortoloch. Tachea mornnacho toch zobabdar zatolo.*
14 “‘Atam ek bapui him soglim patkam korta mhunn chintat, ani tacho put aplo bapui hem korta mhunn polloita, punn to tachea sarkim kamam korina.
15 To porvotancher murteam mukhar bolidan mhunn bhettoilʼleo vostu khaina, Izraelachea ghoranneachea kanttallo haddtta toslea murteam koddem axeun polloina, aplea xezareachea baile sangata pordvar korina.*
16 To konnancheach sangata vaitt ritin vagona, rinn gheupean tache koddem ghannak dovorloli vost to taka porot dita, to konnankuch luttna, tachea bodlek to bhukeloleank aplem jevonn dita, ani zache koddem ang dhampunk kopdde na taka kopdde dita.
17 To goribam sangata vaitt toren vagona, to jur ghena vo konnanchoch faido gheun zoddina, to mhoje nitiche nirnnoi palltta ani mhojea kaideam pormonnem cholta. Oslo munis aplea bapaichea guneanvak lagon morchona. To jivo urtoloch.
18 Punn tacho bapui, zannem lokank fosoile, aplea bhavak luttlo ani aplea lokam modem vaitt aslem tem kelem dekhun, to aplea guneanvak lagon mortolo.
19 “‘Punn tumi mhunnttole: “Bapain kelʼlea chukik lagon put guneanvkari kiteak zaina?” Karonn put sodanch neai-an ani nitivontponnan vagla, tannem mhoje sogle kaide pallʼlleat ani tea pormonnem cholʼla, tor to jivo urtoloch.
20 Zo munis* patok korta toch mortolo. Bapain kelʼlea chukik lagon put guneanvkari zaunchona ani putachea chukik lagon bapui guneanvkari zaunchona. Zo nitivont asa, tachea nitivontponnachem foll takach mellttolem ani zo noxtto asa, tachea noxtteponnacho hixob takach diuncho poddttolo.
21 “‘Ek noxtto munis aplim soglim patkam soddun dita ani mhojea kaideam pormonnem cholta ani neai-an ani nitivontponnan vagta zalear, to jivo urtoloch. To morchona.
22 Tannem poilim jitle oprad kelʼle, tea khoincheach opradak lagon hanv tache koddlean hixob gheunchom na.* To nitivontponnan vagla dekhun to jivo urtolo.’
23 “Akʼkhea Vixvacho Dhoni Jehova mhunntta, ‘Ek noxtto munis morta tednam hanv khuxal zatam kai? Aplem noxtteponn soddun diun, to jivo urlolo mhaka naka kai?’
24 “‘Punn ek nitivont munis nitivontponnachi vatt soddun vaitt tem* korta, ani ek noxtto munis korta tim soglim vitt haddtta toslim kamam korta zalear, to jivo urtolo kai? Tannem kelʼlim khoinchinch nitivont kamam hanv ugddas dovorchom na. Tachea ovisvaxiponnak lagon ani tachea patkak lagon to mortolo.
25 “‘Punn tumi mhunnttole: “Jehova onʼneai korta.” Izraelachea ghoranneachea lokamno, upkar korun aikat! Hanv onʼneai kortam, kai tumi onʼneai kortat?
26 “‘Ek nitivont munis, nitivontponnachi vatt soddun dita ani vaitt tem korta zalear to mortolo. To apleach vaitt kamank lagon mortolo.
27 “‘Ani ek noxtto munis apnnem kelʼlim noxttim kamam soddun dita, ani neai-an ani nitivontponnan vagonk lagta zalear, to aplo jiv* salvar kortolo.
28 To aple oprad vollkhon gheta ani te oprad korop bond korta zalear to jivo urtoloch. To morchona.
29 “‘Punn Izraelachem ghorannem mhunnttolem: “Jehova onʼneai korta.” Izraelachea ghoranneachea lokamno, hanv onʼneai kortam, kai tumi onʼneai kortat?’
30 “‘Taka lagon, Izraelachea ghoranneachea lokamno, hanv tumchea modlea dor ekleacho tachea kamam pormonnem neai kortolom,’ oxem Akʼkhea Vixvacho Dhoni Jehova mhunntta. ‘Tumche oprad soddun diat, hoi, tumchim vaitt kamam tumkam addkhollonk karonn zaun tumi guneanvkari zaina zaunk, tumche sogle oprad purnn toren soddun diat.
31 Tumche sogle oprad soddun diat, ani tumchem kalliz ani tumchem mon bodlat.* Izraelachea ghoranneachea lokamno, tumi tumcho jiv kiteak hogddaunk sodhtat?’
32 “Akʼkhea Vixvacho Dhoni Jehova mhunntta, ‘Konnui melo zalear hanv khuxal zaina, tea pasot porot ieiat ani jieiat.’”
Footnotes
^ Jem Hebrev utor hanga uzar kelam, tem ghoddie “xenn” hea orthachea utrak sombondit asa, ani tem eka vostuchi kitli vitt ieta tem dakhounk uzar kortat.
^ Utran utor, “bailek boxttaina.”
^ Mhunnche, poixe udar gheunk, te farik kori poriant gerentti mhunn dovortat ti vost.
^ Utran utor, “rogot varoupi.”
^ Utran utor, “bailek boxttaita.”
^ Vo “tachem rogot tacheach mathear astolem.”
^ Utran utor, “bailek boxttaina.”
^ Vo “te hanv ugddas dovorchom na.”
^ Vo “soddun onʼneai.”
^ Vo “ani tumchi chintpachi rit novi korat.”
