Ezekiel 33:1-33
33 Jehovacho ho sondex mhaka mellʼllo. Tannem mhunnttlem:
2 “Munxachea puta, tujea lokam lagim uloi ani tankam sang,“‘Hanvem khoinchea-i desacher tolvar haddli zalear, ani tea desantlea soglea lokamnim eka munxak vinchun aplo rakhonndar mhunn nemlo zalear,
3 ani desacher tolvar ieunchi asa mhunn to rakhonndar polloita ani to xing* vazoun lokank xittkaita zalear,
4 tea xingacho avaz aikon zo konn ti xittkaunni manun ghena, ani tolvar ieun tacho jiv kaddtta zalear, tachea mornnacho toch zobabdar zatolo.*
5 Tannem xingacho avaz aikon pasun, xittkaunni pallunk na. To svota tachea mornnacho zobabdar zatolo.* Tannem xittkaunni pallʼlloli zalear, tacho jiv salvar zatolo aslo.
6 “‘Punn desacher tolvar ieta tem polloun pasun rakhonndar xing vazoina, ani taka lagon lokank xittkaunni mellona, ani tolvar ieun tanchea modlea ekleacho jiv gheta zalear, to munis apleach guneanvak lagon mortolo, punn tachea rogtacho hixob hanv tea rakhonndara koddlean ghetolom.’*
7 “Munxachea puta, tuka zalear, hanvem Izraelachea ghoranneacho rakhonndar mhunn nemla. Tum mhojea tonddantlo sondex aikota tednam, mhojea pasot tankam xittkaunni di.
8 Jednam hanv eka noxtteak oxem mhunnttam, ‘Noxttea munxa, tum mortoloch,’ punn tum tachea lagim uloun, tannem apli noxtti vatt bodolchi mhunn taka xittkaina zalear, to noxtto munis aplea guneanvak lagon mortolo punn tachea rogtacho hixob hanv tuje koddlean ghetolom.*
9 Punn tum eka noxtteak tannem apli vaitt vatt soddun diunchi mhunn xittkaunni dita, tori astana to apli vagnnuk bodlunk nakarta zalear, to tachea guneanvak lagon mortolo, punn tum zalear tuzo jiv vanchoitolo.
10 “Ani tum, munxachea puta, Izraelachea ghoranneak sang, ‘Tumi oxem mhunnttlam: “Amchea opradanchea ani patkanchea vojea khala ami chepleant. Tankam lagon ami oskot zait voitat, tor ami koxe mhunn jive urtole?”’
11 Tankam sang, ‘“Hanv mhojea jivacho soput gheun sangtam,” oxem Akʼkhea Vixvacho Dhoni Jehova mhunntta, “Ek noxtto munis morta tednam hanv khuxal zaina. Tachea bodlek, to aplem noxtteponn soddun dita ani jieta, tednam mhaka khuxalkai melltta. Izraelachea ghoranneachea lokamno, mhojea lagim porot ieiat, tumchi vaitt vatt soddun mhojea lagim porot ieiat, tumi tumcho jiv kiteak hogddaunk sodhtat?”’
12 “Ani tum, munxachea puta, tujea lokank sang, ‘Ek nitivont munis oprad korunk lagta zalear, tannem adim kelʼlim nitivontponnachim kamam taka salvar korunk xokchimnant. Toxench, eka noxttea munxan aplem noxtteponn soddun dilem ani to porot ailo zalear, tannem adim kelʼlea noxttea kamank lagon tacho nas zaunchona. Nitivont munis patok korta tea disa, tachim adlim nitivontponnachim kamam taka salvar korunk xokchimnant.
13 Zor hanv eka nitivont munxak oxem sangtam: “Tum khorench jietolo,” punn to apleach nitivontponnachea kamancher visvas dovorta ani vaitt tem* korta zalear, tannem kelʼlim khoinchinch nitivont kamam hanv ugddas dovorchom na. Punn tannem kelʼlea vaitt kamak lagon to mortolo.
14 “‘Ani zor hanv eka noxtteak oxem sangtam: “Tum khorench mortolo,” ani to apli patkam soddun neai-an ani nitivontponnan vagonk lagta,
15 ani to noxtto ghannak dovorloli vost* ani apnnem luttloleo vostu porot dita ani apli vaitt kamam soddun jivitak pavoita te kaide palltta zalear, to khorench jivo urtolo. To morchona.
16 Tannem poilim jitlim patkam kelʼlim, tea khoincheach patkak lagon hanv tache koddlean hixob gheunchom na.* To neai-an ani nitivontponnan vagla dekhun to khorench jivo urtolo.’
17 “Punn tujea lokamnim oxem mhunnttlam, ‘Jehova onʼneai korta,’ punn khorem mhunnttlear tech onʼneai kortat.
18 “Punn ek nitivont munis nitivontponnachi vatt soddun vaitt tem korta* zalear, aplea vaittponnak lagon tannem moronk zai.
19 Punn ek noxtto munis aplim noxttim kamam soddun dita ani neai-an ani nitivontponnan vagonk lagta zalear, to jivo urtolo.
20 “Punn tumi oxem mhunnttlam, ‘Jehova onʼneai korta.’ Izraelachea ghoranneachea lokamno, hanv tumchea modlea dor ekleacho tachea kamam pormonnem neai kortolom.”
21 Ami koident aslim tea 12-vea vorsachea dhavea mhoineachea panchvea disa, Jeruzalemantlean vanchlolo ek munis mhojea lagim ailo. Tannem mhaka mhunnttlem: “Xaracher kobzo kela!”
22 To vanchon ailʼlo munis jea sokallim mhojea lagim ailo, tachea adlea sanjer Jehovacho hat mhojer ailo ani tannem mhojem tondd ugoddlem, ani hanv anik mono uronk na.
23 Uprant, Jehovacho sondex mhaka mellʼllo. Tannem mhunnttlem:
24 “Munxachea puta, hea padd zaun gelʼlea xaramnim ravpi lok Izraelachea desa vixim oxem mhunnttat, ‘Abraham ekloch aslo, tori astana ho des taka mellʼllo. Punn ami tor zaite asat, tor dubhav nastana ho des amchoch zaun asa.’
25 “Taka lagon tum tankam sang, ‘Akʼkhea Vixvacho Dhoni Jehova oxem mhunntta: “Tumi rogot aslolem jevonn jevtat ani kanttallo haddtta toslea murteank* axeun polloitat, ani tumi rogot varoit ravtat. Tor tumkam ho des kiteak mellttolo?
26 Tumi tumchea tolvaricher patieun ravtat, vitt haddtta toslim kamam kortat, ani tumchea modlea dor eklean aplea xezareachea bailek oxudʼdh kelea. Tor tumkam ho des kiteak mellttolo?”’
27 “Tunvem tankam oxem sangonk zai, ‘Akʼkhea Vixvacho Dhoni Jehova oxem mhunntta: “Hanv mhojea jivacho soput gheun sangtam, hea padd zalʼlea xaramnim ravtat tim tolvarin mortolim, uktea moidanar asat tankam hanv ranvotti zonvarank jevonn mhunn ditolom, toxench kilʼleamnim ani dholimnim asat tim duensan mortolim.
28 Hanv ho des samko padd korun soddttolom, taka aplea jea bollacher gorv aslo to hanv moddun uddoitolom, ani Izraelache porvot padd zaun voitole, thoim thaun konnuch pasar zaunchona.
29 Ani tanchea vitt haddtta toslea soglea kamank lagon hanv ho des samko padd korun soddttolom tednam hanv Jehova mhunn tankam vollkhon gheunk poddttolem.”’
30 “Munxachea puta, tuje lok vonttim lagim ani ghoranchea darancher tujea vixim uloitat. Te eka-mekak mhunnttat, hoi, dor eklo aplea bhavak oxem mhunntta, ‘Ieiat, ami vochon Jehova koddlean melltta to sondex aikom-ia.’
31 Ani sodanchea bhaxen te tujea lagim ietole ani mhoje lok zalʼlea bhaxen tujea mukhar bostole. Te tujim utram aikotole, punn te tacher kam korchenant. Karonn tanchea tonddan te tuji vhoddvik kortat, punn tanchim kallzam fottingponnachea zoddik axetat.
32 Polloi! Tum tanchea pasot ek mogachem git gavpea sarko zaun asa, zaka ek sobit tallo asa ani zo tar aslolem sadhon ekdom bore toren vazoita. Te tujim utram aikotole, punn konnuch tacher kam korchenant.
33 Ani tum sangta tim utram dubhav nastana purnn zatolinch ani oxem ghoddtta tednam, tanchea modem ek provadi aslo mhunn tankam vollkhon gheunk poddttolem.”
Footnotes
^ Utran utor, “tachem rogot tacheach mathear astolem.”
^ Utran utor, “Tachem rogot tacheach mathear astolem.”
^ Vo “punn hanv tea rakhonndarak tachea rogtacho zobabdar kortolom.”
^ Vo “punn hanv tuka tachea rogtacho zobabdar kortolom.”
^ Vo “ani onʼneai.”
^ Mhunnche, poixe udar gheunk, te farik kori poriant gerentti mhunn dovortat ti vost.
^ Vo “tim hanv ugddas dovorchom na.”
^ Vo “vatt soddun onʼneai korta.”
^ Jem Hebrev utor hanga uzar kelam, tem ghoddie “xenn” hea orthachea utrak sombondit asa, ani tem eka vostuchi kitli vitt ieta tem dakhounk uzar kortat.
