Ezekiel 40:1-49
40 Ami koidi aslim tea 25-avea vorsachea survatek, mhunnche xaracher* kobzo korun 14-vea vorsachea poilea mhoineachea dhavea disa, Jehovacho hat mhojer aslo ani to mhaka tea xarant gheun gelo.
2 Deva koddlean mhaka dorxonam mellʼllim, jea vorvim to mhaka Izrael desant gheun ailo, ani tannem mhaka eka unch porvotacher ubo kelo. Tea porvotar dokxinne vatten mhaka eka xara sarkem kitem tori dislem.
3 Tannem mhaka thoim haddlo tednam, hanvem thoim ek munis polloilo. Tachem rup tambea sarkem aslem. Tachea hatant sonnbim-anchi ek dori ani mezpachi ek boddi* asli, ani to darvontteacher ubo aslo.
4 Tea munxan mhaka mhunnttlem: “Munxachea puta, hanv tuka dakhoitolom tem soglem tum dhean diun polloi, bariksannen aik ani dhean di, karonn tuka heach pasot hanga haddla. Tum polloita tem soglem vochon Izraelachea ghoranneak sang.”
5 Hanvem tea Devmondirachea* bhair, charui vatten ek vonott polloili. Tea munxachea hatant, sov hat lamb mezpachi ek boddi asli (dor eka hatachea lambaie sangata anik char bottam mezunk zai).* To ti vonott mezunk laglo ani tachi dattai ani unchai ek-ek boddi asli.
6 Uprant to tea darvonttea* koddem ailo, zachem tondd udente vatten aslem ani to tache panvdde choddlo. Uprant tannem tea darvontteacho umbro mezlo, ani tachi rundai ek boddi asli. Dusrea umbreachi rundai pasun ek boddi asli.
7 Darvonttea bhitor rakhonndaranche rum asle. Dor eka rumachi lambai ani rundai ek-ek boddi asli. Ani dor eka ruma thaun dusrea ruma modem panch hatancho ontor aslo. Darvontteachea bolkanva lagim aslolo umbro, zo bhitorle vatten aslo, tachi rundai ek boddi asli.
8 Uprant tannem bhitorle vatten aslolem bolkanv mezlem, ani tem ek boddie itlem aslem.
9 Magir tannem darvontteachem bolkanv mezlem, jem atth hat aslem. Uprant tannem tache kuxiche khambe mezle ani tanche zokh don hat asle, ani hea darvontteachem bolkanv bhitorlea vatten aslem.
10 Udentechea darvontteachea dor eka bhagacher rakhonndaranche tin-tin rum asle ani te tinui ekach zokhache asle, ani donui vattemnim aslole kuxiche khambe ekuch zokhache asle.
11 Uprant tannem darvontteachea bhitor sorchea vattechi rundai mezli, ji 10 hat asli ani tea darvontteachi lambai 13 hat asli.
12 Rakhonndaranchea rumanchea donui vattemnim lhan vonnot aslolo zo zago aslo, to ek hata itlo aslo. Donui vatten aslole rakhonndaranche rum sov hatam itle asle.
13 Uprant tannem eka vatten aslolea rumachea voilea bhaga* thaun dusrea rumachea voilea bhaga poriant darvontteachi rundai mezli. Ti 25 hat rund asli. Rumachi bhitor sorchi vatt eka-meka mukhar asli.
14 Uprant tannem kuxiche khambe mezle, zachi unchai 60 hat asli. Angnnachea sorvbhonvtonnim aslolea darvontteachea donui kuxichea khambeanchi unchai pasun 60 hat asli.
15 Darvontteachea bhailea bhaga thaun, bhitorlea vatten tachea bolkanvachea mukhailea bhaga meren tachi lambai 50 hat asli.
16 Rakhonndaranchea rumank ani darvontteachea bhitorlean dor eka vatten aslolea kuxichea khambeank zonelam aslim. Tim zonelam bhitorlean rund aslim ani bhailean oxir aslim. Bolkanva bhitorlean pasun dor eka vatten zonelam aslim. Ani donui vatten aslolea khambeank khazurachea zhaddachim chitram aslim.
17 Uprant to mhaka bhailea angnnant gheun ailo ani hanvem jevpache rum polloile,* ani angnnant sorvbhonvtonnim fatramnim toiar kelʼli vatt asli. Sogle mellon 30 jevpache rum asle.
18 Darvontteachea lagim aslolea fatramnim toiar kelʼlea vattechi rundai tea darvontteachea lambaie itlich asli. Hi vatt bhitorlea angnna poros sokol asli.
19 Uprant tannem sokoilea darvontteachea ani bhitorlea angnnant voitolea darvonttea modem ontor mezlo. Ho ontor 100 hat aslo. Udentechea ani utʼtorechea darvontteacho ontor pasun titloch aslo.
20 Bhailea angnnant aslolea darvontteachem tondd utʼtore vatten aslem. Tea munxan tachi lambai ani rundai mezli.
21 Darvontteachea donui vattamnim rakhonndaranche tin-tin rum asle. Tachea kuxichea khambeanchem ani bolkanvachem zokh poilea darvonttea itlench aslem. Utʼtorecho darvontto pasun 50 hat lamb ani 25 hat rund aslo.
22 Tachim zonelam, tachem bolkanv ani tacher kaddlolea khazurachea zhaddanchim chitranchem zokh, udentechea darvonttea itlench aslem. Tachea lagim pavonk sat panvdde choddonk poddttale ani tachem bolkanv tachea mukharuch aslem.
23 Utʼtorechea darvonttea mukhar bhitorlea angnnant ek darvontto aslo, ani udentechea darvonttea mukhar bhitorlea angnnant ek darvontto aslo. Tannem eka darvonttea thaun dusrea darvonttea meren zokh kaddlem ani tacho ontor 100 hat aslo.
24 Uprant to mhaka dokxinne vatten gheun ailo, ani hanvem dokxinne vatten ek darvontto polloilo. Tannem tache kuxiche khambe ani tachem bolkanv mezlem ani tanchem zokh dusrea darvontteam itlench aslem.
25 Tea darvontteachea donui vatten aslolim zonelam ani tea bolkanvak aslolim zonelam dusrea darvontteachea zonelam bhaxenuch aslim. Dokxinnecho darvontto pasun 50 hat lamb ani 25 hat rund aslo.
26 Tachea lagim pavonk sat panvdde choddonk poddttale ani tachem bolkanv tachea mukharuch aslem. Ani tea bolkanvachea kuxichea khambeancher khazurachea zhaddanchim chitram aslim, dor eke vatten ek zhaddachem chitr aslem.
27 Bhitorlea angnnant ek darvontto aslo, zachem tondd dokxinne vatten aslem. Tea munxan dokxinne vatten aslolea donui darvontteam modlo ontor mezlo. Ho ontor 100 hat aslo.
28 Uprant to mhaka dokxinnechea darvontteantlean bhitorlea angnnant gheun ailo. Tannem ho darvontto mezlo tednam, tachem zokh dusrea darvontteam itlench aslem.
29 Tachea rakhonndaranche rum, tache kuxiche khambe, ani tachea bolkanvachem zokh heram itlench aslem. Tea darvontteachea ani tea bolkanvachea donui vatten zonelam aslim. To darvontto 50 hat lamb ani 25 hat rund aslo.
30 Bhitorlea angnnachea soglea darvontteank bolkanv asle. Te 25 hat lamb ani 5 hat rund asle.
31 Tachea bolkanvachem tondd bhailea angnna vatten aslem ani kuxichea khambeancher khazurachea zhaddachim chitram aslim. Tachea lagim pavonk atth panvdde choddonk poddttale.
32 To mhaka udentechea darvontteachea angnnant gheun ailo tednam tannem to darvontto mezlo. Tachem zokh dusrea darvontteam itlench aslem.
33 Tachea rakhonndaranchea rumanchem, tachea kuxichea khambeanchem, ani tachea bolkanvachem zokh heram itlench aslem. Tea darvontteachea ani tea bolkanvachea donui vatten zonelam aslim. To darvontto 50 hat lamb ani 25 hat rund aslo.
34 Tachea bolkanvachem tondd bhailea angnna vatten aslem ani tachea kuxichea khambeancher khazurachea zhaddachim chitram aslim. Tachea lagim pavonk atth panvdde choddonk poddttale.
35 Uprant to mhaka utʼtorechea darvonttea lagim gheun ailo ani tannem to darvontto mezlo. Tachem zokh dusrea darvontteam itlench aslem.
36 Tachea rakhonndaranchea rumanchem, tachea kuxichea khambeanchem, ani tachea bolkanvachem zokh heram itlench aslem. Taka donui vatten zonelam aslim. To darvontto 50 hat lamb ani 25 hat rund aslo.
37 Tache kuxiche khambe bhailea angnna vatten asle ani tachea kuxichea khambeancher khazurachea zhaddachim chitram aslim. Tachea lagim pavonk atth panvdde choddonk poddttale.
38 Darvontteanchea kuxichea khambeam lagim bhitor sorchi vatt aslolo ek jevpacho rum aslo. Thoim hulpailʼleo bhetto mhunn bhettounk haddlolea zonvaranchem mas dhuitale.
39 Hulpailʼleo bhetto, patkachim bolidanam ani farikponnacheo bhetto mhunn haddlolea zonvarank jivexim marunk, darvontteachea bolkanvachea donui vatten don mezam aslim.
40 Utʼtorechea darvonttea koddem voita tea vatter, bhitor sortat thoim bhailean don mezam aslim. Darvontteachea bolkanvachea dusrea vatten pasun don mezam aslim.
41 Darvontteachea donui vatten char-char mezam aslim. Soglim mellon atth mezam aslim, zancher bolidanam mhunn haddlolea zonvarank jivexim martale.
42 Hulpailʼleo bhetto bhettoupachim charui mezam kantoilʼlea fatra thaun kelʼlim. Tea mezanchi lambai dhedd hat, rundai dhedd hat ani unchai ek hat asli. Tea mezancher, hulpailʼleo bhetto ani dusrim bolidanam mhunn zonvarank jivexim marunk uzar zatalim teo vostu dovortale.
43 Bhitorlea vonttincher sogle koddem vostu dovrunk char bottam rund zage* toiar kelʼle asle ani bhett mhunn bhettoilolem mas mezancher dovorlolem astalem.
44 Bhitorlea angnnachea darvonttea bhair gavpeam pasot jevpache rum asle. He rum bhitorlea angnnant utʼtorechea darvonttea lagim asle ani tanchi bhitor sorchi vatt dokxinne vatten asli. Anik ek jevpacho rum udentechea darvonttea lagim aslo ani tachi bhitor sorchi vatt utʼtore vatten asli.
45 Tea munxan mhaka mhunnttlem: “Dokxinne vatten tondd aslolo ho jevpacho rum Devmondirant seva korunk zobabdar aslolea iadnikam pasot asa.
46 Ani utʼtore koddem tondd aslolo jevpacho rum vedi lagim seva korchi zobabdari aslolea iadnikam pasot asa. He Zadokachea sonstintle zaun asat. Levi ghoranneantlea heach iadnikank Jehova mukhar vochon tachi seva korunk nemleat.”
47 Tea uprant tannem bhitorlem angonn mezlem. Tem angonn choukoni aslem, ani tem 100 hat lamb ani 100 hat rund aslem. Devmondira mukhar vedi asli.
48 Uprant to mhaka Devmondirachea bolkanvant gheun ailo, ani tannem bolkanvachea kuxichea khambeanchem zokh kaddlem. Dor ek khambo panch hat lamb aslo. Ani darvontto dor eke vatten tin hat rund aslo.
49 Bolkanv 20 hat lamb ani 11* hat rund aslem. Tachea meren pavonk lokank thodde panvdde choddonk poddttale. Bolkanvachea kuxichea khambeam lagim anik don khambe asle. Dor eka khambea lagim ek khambo aslo.
Footnotes
^ Mhunnche, Jeruzalem.
^ Mahiti B14 polloi.
^ Utran utor, “ghorachea.” Odheai 40-48-ant jea-jea zagear “ghor” hea utracho orth Devmondir vo Devmondir ani tachea bhonvtonnim asloleo bilddingo oso zata, thoim “Devmondir” hem utor uzar kelʼlem asa.
^ Hem lamb hatachea mapak suchit korta. Mahiti B14 polloi.
^ Ho darvontto ek vhoddlem bildding aslem zantunt zaite rum asle.
^ Hem ghoddie rakhonndaranchea rumachea sogleant voilea bhagak suchit korta.
^ Vo “hanvem rum polloile.”
^ Vo “khonn.” Inglez bhaxent “shelves.”
^ Vo ghoddie, “12.”
