Ezekiel 26:1-21
26 Mhaka 11-vea vorsa, mhoineachea* poilea disa Jehovacho sondex mellʼllo. Tannem mhunnttlem:
2 “Munxachea puta, Jeruzalema add Tiran oxem mhunnttlam, ‘Hem xar jem desam pasot eka darvonttea sarkem aslem tem moddon poddlam. Borem zalem! Atam soglem mhojea lagim ietolem ani hanv girest zatolem.’
3 Taka lagon, Akʼkhea Vixvacho Dhoni Jehova oxem mhunntta: ‘Tira, hanv tujea add asam ani doria aplim lharam ubarta tea toren, hanv zaitea raxttrank tujea add ubo kortolom.
4 Tim Tirachim durgam koslloun uddoitolim ani tache gopur moddun uddoitolim. Hanv tachi mati khorpun kaddttolom ani taka chokchokit uktea khoddpa sarkem kortolom.
5 Tem doria modem, vhoddlim-vhoddlim rampnnechim zallam sukoupacho zago zatolem.’
“‘Karonn hem hanvem svota sanglam. Tem raxttram pasot lutticho mhal zatolem,’ oxem Akʼkhea Vixvacho Dhoni Jehova mhunntta.
6 Ani tachea kheddea ganvamnim ravtoleank* tolvarin marun uddoitole ani hanv Jehova mhunn lokank vollkhon gheunk poddttolem.’
7 “Akʼkhea Vixvacho Dhoni Jehova oxem mhunntta: ‘Hanv utʼtore thaun Babilonacho Raza Nebukadnezarak* Tiracher akromonn korunk haddttam. To razancho raza zaun asa. Tachea lagim bhorpur ghodde, zhuzache roth, ghoddesvar ani ek vhoddli fouz asa.
8 To kheddea ganvamnim aslolea tujea ravpachea zageancho nas* korun uddoitolo. To tujer akromonn korunk bhonvtonnim durig ubem korun gherav ghaltolo. To durgam bhonvtonnim matiechi ani fatranchi choddtti toiar kortolo. Ani tujea add vhoddli ddhal ubi kortolo.
9 To durgam moddun uddoitat toslim vhoddlim sadonam* uzar korun tujim durgam moddun uddoitolo ani aplea kuraddeamnim* tuje gopur foddun uddoitolo.
10 Tache ghodde itle astole ki te dhanvtana ubta tea dhulʼlint tum dixtti poddchem na. Durgam moddlolea xarant munis vadolla bhaxen bhitor ghustat toxe, to tujea darvontteantlean bhitor sortolo, ani tednam tachea ghoddesvaranchea, rodhanchea ani rothanchea avazan tujim durgam thorthortolim.
11 Tache ghodde aplea fuddamnim* tuje sogle roste maddoitole. Aplea tolvarin to tujea lokank marun uddoitolo ani zomnir poddon tujea vhoddlea-vhoddlea khambeancho churo zatolo.
12 Te tuji girestkai ani tujem veapar-dhondeachem saman luttun vhortole, te tujim durgam ani tujim sobit borim-borim ghoram moddun uddoitole, magir te tuje fator, tujeo lakddacheo vostu ani mati udkant uddoitole.’
13 “‘Hanv tujea gitancho avaz bond kortolom, ani tea uprant tujea kinoreancho* avaz kednanch aikonk ieunchona.
14 Hanv tuka chokchokit uktea khoddpa sarkem kortolom, ani tum vhoddlim-vhoddlim rampnnechim zallam sukoupacho zago zatolem. Tuka porot kednanch bandun kaddchenant, karonn hanvem Jehovan svota hem sanglam,’ oxem Akʼkhea Vixvacho Dhoni Jehova mhunntta.
15 “Akʼkhea Vixvacho Dhoni Jehova Tirak oxem mhunntta: ‘Tum poddttolem, ani tea avazan tujea bhitor mortat te lok* pirgotole tednam ani tujea modem lokank jivexim martole tednam, zunve thorthorchenant kai?
16 Doriache sogle kunvor* tanchea xinvasonar thaun sokol denvtole, aple kott* ani embroidderi kelʼle kopdde kaddun uddoitole ani bhirantin koddkoddttole.* Te zomnir bostole, thorthorot ravtole ani thottakun tuka polloit ravtole.
17 Te tujea pasot dukhachem git* gaitole ani tuka mhunnttole:
“Tum tem xar zaun asa zachi lok vhoddvik kortale, doriantlean lok ieun tujea bhitor ravtale,Doriacher tuzo ani tujea lokancho tabo aslo,Tunvem prithume voilea soglea lokam modem bhirant posrailoli. Atam polloi, tuzo koso mhunn nas zaun gela!
18 Tum poddttolem tea disa zunve thorthortole,Tum nanch zatolem tednam doriache zunve ghabortole.”’
19 “Karonn Akʼkhea Vixvacho Dhoni Jehova oxem mhunntta: ‘Hanv tuji poristhiti tea xaram bhaxen kortolom jim nas zaun geleant ani zoim konnuch ravona. Ghos-ghoxeamnim vhanvpi udok hanv tujer haddttolom ani tum khol udkant buddttolem.
20 Hanv zoso dusreank sokol fonddant* haddttam, toso hanv tuka-i sokol fonddant haddttolom. Adlea kallar thaun melole lok jea zagear asat, thoim hanv tuka haddttolom. Hanv tuka sogleant sokoilea zagear ravonk laitolom. Zaitea tempa thaun nas zalʼlea zageam sangata ani sokol fonddant voitat tanchea sangata, hanv tuka ravonk laitolom, jea vorvim tujea bhitor porot kednanch lok ravchenant. Uprant, hanv jiveanchea desak mhoima haddttolom.*
21 “‘Hanv tujer okosmat odruxtt haddttolom, ani tum porot kednanch dischem na. Te tuka sodhtole, punn tum tankam porot kednanch mellchem na,’ oxem Akʼkhea Vixvacho Dhoni Jehova mhunntta.”
Footnotes
^ Ho khoincho mhoino tem sarkem khoborna.
^ Utran utor, “ravtolea dhuvank.”
^ Utran utor, “Nebukadrezar,” veglle toren boroilʼlem nanv.
^ Utran utor, “tolvarin kabar.”
^ Vo “akromonn korunk uzar kelʼli gaddi.” Mhunnche, durgam moddun uddounk uzar kortat tem mexin.
^ Vo “tolvarimnim.”
^ Vo “futtamnim.” Inglez bhaxent “hooves.”
^ Hi ek vazoupachi vost jika gitara bhaxen tar astat, punn ticho akar gitara bhaxen na. Inglez bhaxent tika “harp” mhunnttat.
^ Utran utor, “jivexim marlole lok.”
^ Vo “mukheli.”
^ Vo “hat naslole kott.”
^ Utran utor, “bhirantiche kopdde ghaltole.”
^ Hem dukh kortat tea vellar gaitat toslem git.
^ Vo “purpachea fonddant.”
^ Vo “desak nettoitolom.”
