Ezekiel 16:1-63
-
Jeruzalema pasot Devacho mog (1-63)
16 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Jeruzalemak tachea vitt haddtta toslea kamam vixim kolloi.
3 Tum taka sang, ‘Akʼkhea Vixvacho Dhoni Jehova Jeruzalemak oxem mhunntta: “Tuji survat ani tuzo zolm Kananitkarachea desant zalʼlo. Tuzo bapui Amoritkar aslo ani tuji avoi Hititkarn asli.
4 Tujea zolma vixim sangchem zalear, jea disa tum zolmolem, tea disa tujea bomlechi dori katrunk nasli, tuka udkan dhuvun nitoll korunk naslem, tuka mittan rogddunk naslem ani tuka kopddeamnim guttlaunk naslem.
5 Konnench tuji matui kakut korun hachea modli ekui vost tujea pasot korunk na. Konnench tuji doia-maia korunk na. Tachea bodlek, tum zolmolem tea disa tannim tuzo dves kelo, dekhun tuka uktea mollar oxench uddoilem.
6 “‘“Hanv thoim thaun pasar zatolom tednam, tum apleach rogtant paim martalem tem hanvem polloilem. Tum apleach rogtant lolltta tem polloun hanvem mhunnttlem: ‘Jivem rav!’ Hoi, tum apleach rogtant lollttalem tednam hanvem mhunnttlem: ‘Jivem rav!’
7 Xetant vaddttolea tonna bhaxen hanvem tuzo ankddo khub vaddoilo. Tum vaddlem ani vhodd zalem ani tunvem apleak sobit moladik vostu ghalun nettoilem. Tujem horddem* vaddlem ani tuje kensui vaddle, punn tujea angak kopdde nasle, tum vingllench aslem.”’
8 “‘Hanv pasar zatalom ani hanvem tujer dhean dilem tednam, tum mogan poddpachea piraier pavlam mhunn hanvem polloilem. Tor hanvem mhozo kopddo* tujer posrailo ani tujem vingllemponn dhamplem. Hanvem soput ghetlo ani tujea sangata ek korar kelo ani tum mhojem zalem,’ oxem Akʼkhea Vixvacho Dhoni Jehova mhunntta.
9 ‘Uprant, hanvem tuka nhanvoilem ani tujem rogot udkan dhuvun kaddlem ani tuka tel kaddlem.
10 Magir hanvem tuka embroidderi kelʼle sobit kopdde ghatle, borea chambddeachim* zotim dilim, tujea toklek mov lugttacho boro kopddo* bandlo ani tuka mharog kopdde ghatle.
11 Hanvem tuka sobit vostu ghalun nettoilem, tujea hatank bresletti* ghatleo ani tujea golleak sorpolli ghatli.
12 Hanvem tujea nakak noth, kanank kanantlim ani tujea tokler ek sobit mukutt pasun dovorlo.
13 Tum apleakuch bhangran ani chandin nettoit ravlem, ani tuje kopdde mov lugttachea borea kopddeache* asle, mharog asle ani tancher embroidderi kelʼli asli. Borem pitt, mhonv ani tel aslolem jevonn tum jevtalem. Tum vaddon ekdom sobit zalem ani ranni zaunk purtem zalem.’”
14 “Akʼkhea Vixvacho Dhoni Jehova mhunntta, ‘Tujea sobitkaiek lagon tujem nanv soglea raxttramnim famad zaunk laglem. Tuji sobitkai poripurnn asli. Karonn hanvem mhojem vorteponn tuka dilʼlem.’”
15 “‘Punn tum tujea sobitkaiecher patieunk laglem, ani tum famad zalem dekhun xindollkechim kamam korunk laglem. Pasar zatolea dor eka dadlea sangata tum lojenastana xindollki korit ravlem, ani tunvem tuji sobitkai tanchea hatant dili.
16 Tunvem tuje thodde kopdde uzar korun veg-vegllea rongache unch zage toiar kele, ani thoim tum tujim xindollkechim kamam kortalem. Tunvem itlim vaitt kamam kelim, jim korunk favo naslim ani hea fuddem porot kednanch korunk favona.
17 Hanvem tuka bhangracheo ani chandicheo jeo sobit vostu* dilʼleo, teo gheun tunvem dadleancheo murteo toiar keleo ani tanchea sangata xindollki keli.
18 Tunvem tuje embrodderi kelʼle kopdde vhoron tankam* nhesoile, tunvem tankam mhojem tel ani mhozo dhump bhettoilo.
19 Hanvem tuka khaunk zo unddo dilʼlo—borem pitt, tel ani mhonv uzar korun toiar kelʼlo unddo dilʼlo—to pasun tunvem vhoron tea murteank pormollit* bhett mhunn bhettoilo. Tunvem oxench kelem,’ oxem Akʼkhea Vixvacho Dhoni Jehova mhunntta.”
20 “‘Mhojea pasot zolmak haddlolea tujea putank ani dhuvank tunvem ghetlim ani hea murteank bolidan mhunn bhettoilim. Tor tujim xindollkechim kamam chodduch zaunk nant kai?
21 Tunvem mhojea putank jivexim marun uddoile ani tankam bolidan mhunn ujeant bhettoile.
22 Tunvem tujim soglim vitt haddtta toslim kamam kortana ani xindollkechim kamam kortana, tujea bhurgeponnachea disancho ugddas korunk na, jednam tujea kuddicher kopdde nasle, tum vingllem aslem ani tum apleach rogtant paim marun lollttalem.
23 Tujer hai! Tunvem kelʼlea soglea noxttea kamank lagon tujer hai,’ oxem Akʼkhea Vixvacho Dhoni Jehova mhunntta.
24 ‘Tunvem khotti bhokti korunk tujea pasot ek zago bandlo ani dor eka nakear ek unch zago toiar kelo.
25 Dor eka rosteachea famad zageacher tunvem tuje unch zage bandle, ani thoim thaun pasar zatolea sogleank tunvem tukach bhettoun tuji sobitkai vitt haddtta tosli keli, ani tunvem tujim xindollkechim kamam vaddoilim.
26 Tunvem kuddicho sombond dovrunk axen pettlolea tujea xezaream sangata, mhunnche Ejipttachea putam sangata xindollki keli ani mezunk zainant titlim xindollkechim kamam korun mhozo rag vaddoilo.
27 Taka lagon, hanv atam tujea add mhozo hat ubartolom ani tujeo jevnna-khannacheo vostu unneo kortolom ani tuka tuzo dves kortolea bailanchea hatant, mhunnche Filistevkaranchea dhuvanchea hatant ditolom, zankam tujim burxim kamam polloun dhokʼko boslolo.
28 “‘Itlem korun pasun tuka dhadosponn mellonk na dekhun tunvem Asiriechea putam sangata xindollkechim kamam kelim. Punn tanchea sangata xindollki korunui tuka dhadosponn mellonk na.
29 Taka lagon, tum veapareanchea desant* ani Kaldeikaram sangata anikui chodd xindollkechim kamam korunk laglem, punn oxem korunui tum dhadoxi zaunk na.’
30 Akʼkhea Vixvacho Dhoni Jehova mhunntta, ‘Eke loz naslole xindoll baile bhaxen tunvem heo sogleo vostu keleo tednam, tujem kalliz kitlem mhunn duent* aslem!*
31 Punn tunvem dor eka rosteachea sogleant famad zagear tujea pasot khotti bhokti korunk ek zago bandlo, ani dor eka nakeacher tunvem ek unch zago toiar kelo tednam, tum dusrea xindoll bailam sarkem naslem, karonn tum konnanch koddlean poixe ghenaslem.
32 Tum osli ek pordvar korpi bail zaun asa, ji aplea ghovak soddun onvollkhi dadleam fattlean voita!
33 Lok soglea xindoll bailank ek dennem ditat. Punn tunvem, tujea fattlean apleo loingik itsa purnn korunk ietat tea lokank dennim dileant. Tum lonch* diun sogle kodden aslolea lokank aplea sangata xindollki korunk apoita.
34 Tum dusrea xindoll bailam poros samkench vegllem. Tujea osli xindollki korpi bail anik khoinch na! Tujea lagim ietat tea dadleam koddlean poixe gheunchea bodlek tum tankam poixe dita. Tuji chal samki veglli asa.’
35 “Taka lagon, age xindoll baile, Jehova kitem sangta tem aik.
36 Akʼkhea Vixvacho Dhoni Jehova oxem mhunntta: ‘Tum loingik itsen samki pettlea mhunn tunvem ukteponnim dakhoun dilem, ani tujea mog korpeam sangata ani kanttallo haddtta toslea murteam* sangata, xindollkechem kam korun tunvem tujem vingllemponn dakhoilem, ani tea murteam pasot tunvem aplea putanchem pasun rogot bolidan mhunn bhettoilem,
37 dekhun hanv tujea soglea mog korpeank ektthaim kortolom zankam tunvem khuxal kele. Hanv tankam sogleank ektthaim kortolom zancho tum mog kortalem, ani tanchea sangata hanv tankam-i ektthaim kortolom, zancho tum dves kortalem. Hanv tankam soglea vattentlean ektthaim korun tujea add ube kortolom ani hanv tuje kopdde kaddun tuka vingllem kortolom ani te tujem vingllemponn polloitole.
38 “‘Pordvar kortat ani khun kortat tea bailank ditat ti khast hanv tuka ditolom. Hanv ragan ani krodhan bhoron tujem rogot varoitolom.
39 Hanv tuka tanchea hatant ditolom, ani khotti bhokti korunk tunvem bandlole zage te moddun uddoitole ani te tuje unch zage sokol uddoitole. Te tuje kopdde kaddun uddoitole ani tujem sobit bhangar-xingar* kaddun ghetole ani tuka samkem vingllem korun soddttole.
40 Te tujea add lokancho ek zomo gheun ietole ani tuka fatraitole ani aplea tolvarin tuka jivexim martole.
41 Te tujim ghoram lasoitole ani zaitea bailam mukhar tuka khast ditole. Hanv tujim xindollkechim kamam bond kortolom ani tum tujea mog korpeank poixe divop bond kortolem.
42 Hanv tujer mhozo rag kaddttolom ani mhozo krodh thondd zatolo. Hanv xant zatolom ani porot kednanch ragar zaunchom na.’
43 “Akʼkhea Vixvacho Dhoni Jehova mhunntta, ‘Tunvem tuje bhurgeponnache dis ugddas korunk nant, ani him soglim kamam korun tunvem mhaka rag haddlo dekhun tujea korneancho porinnam hanv tukach bhogunk laitolom. Ani tujim burxim kamam ani soglim vitt haddtta toslim kamam tum porot kednanch korchem na.
44 “‘Polloi! Mhunnʼnneo uzar korpi soglim tujea vixim hi mhunnʼnni mhunnttolim: “Avoi toxich dhuv.”
45 Tum tujea avoi bhaxenuch. Tujea avoin pasun aplea ghovak ani bhurgeank kainch valorachim nhoi koxim lekhlim. Ani tum tujea bhoinnam bhaxenuch, zannim aplea ghovank ani bhurgeank kainch valorachim nhoi koxim lekhlim. Tuji avoi Hititkarn asli ani tuzo bapui Amoritkar aslo.
46 “‘Tuji vhoddli bhoinn Samaria zaun asa. Ti aplea dhuvam* sangata tujea utʼtorek* ravta. Ani tuji dhaktti bhoinn Sodom zaun asa. Ti aplea dhuvam sangata tujea dokxinnek* ravta.
47 Tum tanchea vaitt vattemnim cholʼlem ani tunvem tanchim vitt haddtta toslim kamam kelim itlench nhoi, punn thoddeach vella bhitor tum tanchea poros chodd vaitt ritin vagonk laglem.’
48 Akʼkhea Vixvacho Dhoni Jehova mhunntta, ‘Hanv mhojea jivacho soput gheun sangtam, tuji bhoinn Sodom ani tichea dhuvamnim korunk nant toslim kamam tunvem ani tujea dhuvamnim kelim.
49 Polloi! Tuji bhoinn Sodomacho guneanv ho: Tem ani tacheo dhuvo gorvixtt asleo. Tim kosloch usko nastana susegad aslim. Tanchea lagim bhorpur jevonn aslem. Tori astana, goribank ani dukhi asloleank tannim modot korunk na.
50 Tannim aplo gorv soddun diunk na, ani tim mhojea nodren vitt haddtta toslim kamam korit ravlim. Taka lagon, tancho nas korop sarkem oxem mhaka dislem.
51 “‘Tunvem jitlim patkam kelim, tachea poros ordim pasun Samarien korunk nant. Tum tujea bhoinnam poros chodd vitt haddtta toslim kamam korit ravlem. Ani tujea vitt haddtta toslea soglea kamank lagon, tujeo bhoinno tujea poros chodd nitivontponnan vagtat oxem dista.
52 Hea toren tunvem tujea bhoinnanchim kamam sarkim mhunn dakhoun dilim* dekhun atam tuka opman soscho poddttolo. Tunvem tanchea poros chodd vitt haddtta toslim kamam korun patok kelem dekhun, tim tujea poros chodd nitivont asat. Tor tujeo bhoinno chodd nitivont asat mhunn tunvem dakhoun dilam dekhun, atam loz bhog ani opman sosun ghe.’
53 “‘Hanv tanchea koidi kelʼlea lokank, mhunnche Sodomachea ani tachea dhuvanchea koideank, toxench Samariechea ani tachea dhuvanchea koideank ektthaim kortolom. Tanchea sangata hanv tujea-i koideank ektthaim kortolom.
54 Hea vorvim tuzo opman zatolo. Tankam bhuzvonn diunk tunvem jem kitem kelem, taka lagon tuka opman sosunk poddttolo.
55 Tujea bhoinnanchi, Sodomachi ani Samariechi toxench tanchea dhuvanchi poristhiti poilim bhaxen zatoli. Ani tujea dhuvam sangata tuji poristhiti pasun poilim asli toxi zatoli.
56 Tum gorvixtt zalem tea disa, tuka tuji bhoinn Sodomacho itlo kanttallo ailo ki tum tachem nanv pasun gheunk sodhinaslem.
57 Tujem noxtteponn uktem zai poriant tum oxench vaglem. Atam Siriecheo dhuvo tujeo moskoreo kortat ani tujea bhonvtonnim asloleo Filistevkarancheo dhuvo tuka tomnne martat.
58 Tuka tujea burxea kamancho ani vitt haddtta toslea kamancho porinnam bhogcho poddttolo,’ oxem Jehova mhunntta.”
59 “Akʼkhea Vixvacho Dhoni Jehova oxem mhunntta: ‘Atam hanv tujea sangata tench kortolom jem tunvem mhojea sangata kelam. Hanvem tujea sangata kelʼlo korar moddun tunvem tuzo soput kainch valor naslolo koso lekhlo.
60 Punn tujea tornattponnachea disamnim hanvem tujea sangata kelʼlo korar hanv ugddas dovortolom. Ani hanv tujea sangata sodankal urta toslo korar kortolom.
61 Tum tuje vhoddle ani dhaktte bhoinnik apnnaitolem tednam, tuzo poilincho sobhav ugddas korun tuka tujich loz distoli. Uprant hanv tujea bhoinnank tujeo dhuvo koxeo tukach ditolom, punn hanvem tujea sangata kelʼlea korarak lagon nhoi.’
62 “‘Hanv svota tujea sangata mhozo korar stapon kortolom, ani hanv Jehova mhunn tuka vollkhon gheunk poddttolem.
63 Tunvem kelʼlea soglea patkank lagon hanv tuka bhogxitolom tednam, tuka tuji poilinchi vagnnuk ugddasak ietoli ani opmanak lagon tuka itli loz distoli ki tum tujem tondd ugoddchem na,’ oxem Akʼkhea Vixvacho Dhoni Jehova mhunntta.”
Footnotes
^ Inglez bhaxent taka “breasts” mhunnttat.
^ Vo “ghagro.”
^ Hanga uzar kelʼlem Hebrev utor tahash, doriantlea pranneak suchit korta, zaka Inglez bhaxent seal mhunnttat. Tem ddolfina itlem vhodd asta.
^ Inglez bhaxent taka “fine linen” mhunnttat. Xobdhkox polloi.
^ Vo “maskoteo.”
^ Inglez bhaxent taka “fine linen” mhunnttat. Xobdhkox polloi.
^ Vo “nettouncheo vostu.”
^ Mhunnche, dadleanchea murteank.
^ Vo “khuxal korunk.”
^ Utran utor, “Kanan desant.”
^ Vo “oskot.”
^ Vo ghoddie, “tuzo mhaka khub rag ieta.”
^ Inglez bhaxent taka “bribe” mhunnttat.
^ Jem Hebrev utor hanga uzar kelam, tem ghoddie “xenn” hea orthachea utrak sombondit asa, ani tem eka vostuchi kitli vitt ieta tem dakhounk uzar kortat.
^ Vo “tujeo nettouncheo vostu.”
^ Hanga ghoddie bhonvtonnchea nogram vixim sanglam.
^ Utran utor, “daveak.”
^ Utran utor, “uzveak.”
^ Vo “tum tujea bhoinnanchea favorant uloilem.”
