Ezekiel 13:1-23
13 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Izraelachea provadeam add bhasaunni kor. Je apnnench ghoddloleo bhasaunneo sangtat* tankam oxem sang, ‘Jehovacho sondex aik.
3 Akʼkhea Vixvacho Dhoni Jehova oxem mhunntta: “Tea murkh provadeancher hai, je apleach monantleo bhasaunneo kortat, punn khorem mhunnttlear tannim koslench dorxon pollounk na!
4 Izraela, tuje provadi padd zalʼlea zageamnim ravtolea koleam bhaxen zaleat.
5 Jehovacho dis ieta tednam Izrael zhuzant thir urchem mhunn, tumi Izraelachea ghorannea pasot tanchea fatranchea durgank ailʼleo vero bhorun kaddunk thoim voichenant.”
6 “Tannim khottim dorxonam polloileant ani khotti bhasaunni kelea. Jehovan tankam dhaddunk nant, tori astana te mhunnttat, ‘Ho Jehovacho sondex zaun asa,’ ani apnnem sanglam tem purnn zatolem mhunn te vatt polloitat.
7 Tumi polloilam tem dorxon khottem nhoi kai? Ani tumi kelea ti bhasaunni ek fott nhoi kai? Hanv kainch ulounk na, tori astana tumi mhunnttat, ‘Ho Jehovacho sondex zaun asa’?”’
8 “‘Taka lagon, Akʼkhea Vixvacho Dhoni Jehova oxem mhunntta: “‘Tumi sanglam tem khottem ani tumchim dorxonam ek fott dekhun hanv tumchea add asam,’ oxem Akʼkhea Vixvacho Dhoni Jehova mhunntta.”
9 Khottim dorxonam polloitat ani fottkiri bhasaunni kortat tea provadeam add hanvem mhozo hat ubarla. Zanchea sangata mhoji laginchi ixttagot asa, tea lokam modem te aschenant, toxench tanchim nanvam Izraelachea ghoranneachea nanvam modem boroilʼlim aschimnant, tea bhair te Izrael desant porot ieunk pavchenant. Tednam hanv Akʼkhea Vixvacho Dhoni Jehova mhunn tumkam vollkhon gheunk poddttolem.
10 Hem soglem tankam ghoddttolem karonn tannim mhojea lokank “Xanti asa!” oxem mhunnon chukichi vatt dakhoilea. Punn khorem mhunnttlear xanti nanch. Konnui ek oskot vonott bandta tednam, te tika chuno kaddttat.’*
11 “Chuno kaddttat tankam, ti vonott poddttoli mhunn sang. Ghogeamnim paus poddttolo, korveancho paus ietolo ani bhirankull vadoll zatolem, jea vorvim ti vonott moddon poddttoli.
12 Ani ti vonott poddttoli tednam lok tumkam vichartole, ‘Tumi kaddlolo chuno khoim gelo?’
13 “Taka lagon, Akʼkhea Vixvacho Dhoni Jehova oxem mhunntta: ‘Hanv ragan bhoron tea vontticher bhirankull vadoll haddttolom, krodhan bhoron ghogeamnim paus haddttolom, ani tiddkin bhoron korveancho paus votoitolom ani tea vontticho nas korun uddoitolom.
14 Hanv tumchi chuno kaddloli vonott moddun zomnir uddoitolom ani tachi buniad poriant disonk lagtoli. Xar poddtta tednam tachea bhitor tumcho nas zaun voitolo, ani hanv Jehova mhunn tumkam vollkhon gheunk poddttolem.’
15 “‘Hanv tea vontticher ani tika chuno kaddttoleancher mhozo soglo rag votoitolom tednam, hanv tumkam mhunnttolom: “Atam ti vonottui uronk na ani tika chuno kaddpi pasun uronk nant.
16 Izraelachea jea provadeamnim Jeruzalem xara pasot bhasaunneo kelʼleo ani xanti nastana-i xantichim dorxonam polloilʼlim, tea soglea provadeancho atam nas zala,”’ oxem Akʼkhea Vixvacho Dhoni Jehova mhunntta.
17 “Munxachea puta, tum zalear, tujea lokam modlea tea bailam lagim uloi jeo apunnuch ghoddoun bhasaunneo kortat. Tum tanchea add bhasaunni kor.
18 Tankam sang, ‘Akʼkhea Vixvacho Dhoni Jehova oxem mhunntta: “Jeo bailo lokank fosoun tancho jiv kaddunk, soglea lokam pasot taviz* ani soglea lokanchea tokle pasot oddnneo kortat tea bailancher hai! Tumi mhojea lokancho jiv gheun aplo jiv vanchouncho proitn kortat kai?
19 Tumi mutt-bhor zovak* lagon ani unddeanchea kuddkeank lagon mhojea lokam modem mhozo opman kortolim kai? Mhojea lokam modle je tumcheo khotteo khobro aikotat, tankam tumi tumchea khottea khobramnim fosoun, marun uddoitolim kai? Hea toren tumi zankam marunk zaina tankam marun uddoun, ani zankam marunk zai tankam jive soddun ditolim kai?”’
20 “Taka lagon, Akʼkhea Vixvacho Dhoni Jehova oxem mhunntta: ‘Bailamno, hanv tumchea tea tavizank lagon tumchea add asam, jim uzar korun lok suknnim zalʼlea bhaxen tumi tancho xikar kortat. Hanv tumchea kompram voir bandlolem taviz kaddun ghetolom. Ani hanv tea lokank suttka ditolom zancho tumi, te suknnim zalʼlea bhaxen xikar kortat.
21 Hanv tumcheo oddnneo pinzun uddoitolom ani mhojea lokank tumchea hatantlean soddoitolom. Tea uprant, porot kednanch tumi tancho xikar korunk xokchimnant. Ani hanv Jehova mhunn tumkam vollkhon gheunk poddttolem.
22 Hanvem nitivont munxak koslench dukh diunk naslem, tori astana tumi tumchea khottea khobramnim taka niraxi kela. Ani noxttea munxan apleo vaitt vatto soddun diuncheo nhoi ani aplo jiv vanchouncho nhoi mhunn tumi taka urba dilea.
23 Taka lagon, atam tumi anik khottim dorxonam pollounk pavchimnant ani fuddar parkhupachem kam korunk pavchimnant. Hanv mhojea lokank tumchea hatantlean soddoitolom, ani hanv Jehova mhunn tumkam vollkhon gheunk poddttolem.’”
