Ezekiel 20:1-49
20 Satvea vorsachea panchvea mhoineachea dhavea disa, Izraelache thodde vhoddil Jehova kitem sangonk sodhta tem zannam zaunk mhojea lagim aile ani mhojea mukhar ieun bosle.
2 Jehovacho sondex porot ek pavtt mhaka mellʼllo. Tannem mhaka mhunnttlem:
3 “Munxachea puta, Izraelachea vhoddila lagim uloi ani tankam sang, ‘Akʼkhea Vixvacho Dhoni Jehova oxem mhunntta: “Hanv kitem sangonk sodhtam tem zannam zaunk tumi hanga aileat kai? ‘Hanv mhojea jivacho soput gheun sangtam, hanv tumkam zobab diunchom na,’ oxem Akʼkhea Vixvacho Dhoni Jehova mhunntta.”’
4 “Tum tancho neai korunk* toiar asa kai? Munxachea puta, tum tancho neai korunk toiar asa kai? Tanchea purvozamnim koslim vitt haddtta toslim kamam kelʼlim tim tankam kolloi.
5 Tankam sang, ‘Akʼkhea Vixvacho Dhoni Jehova oxem mhunntta: “Jea disa hanvem Izraelak vinchun kaddlolo, tea disa hanvem Jakobachea ghoranneachea sonstik* soput dilʼlo* ani Ejiptt desant hanvem tankam mhoji vollokh korun dilʼli. Hoi, hanvem soput gheun tankam sanglolem, ‘Hanv tumcho Dev Jehova.’
6 Hanv tankam Ejipttantlean bhair haddttolom, ani zo des hanvem tanchea pasot sodhun dovorlolo,* mhunnche, jea desant dudh ani mhonv vhanvta tea desant hanv tankam vhortolom, mhunn tea disa hanvem soput dilolo. To sogleant sobit des aslo.
7 Uprant hanvem tankam mhunnttlem, ‘Tumchea modlea dor eklean tumchea dolleam mukhar asloleo kanttallo haddtta tosleo vostu bhair marcheo. Kanttallo haddtta toslea Ejipttantlea murteamnim* tumkam boxttainakat. Hanv tumcho Dev Jehova.’
8 “‘“Punn te mhojea add gele ani mhojem aikonk toiar nasle. Tanchea mukhar asloleo kanttallo haddtta teo vostu tannim bhair marunk na ani kanttallo haddtta tea Ejipttantlea murteank tannim soddunk na. Taka lagon, hanv Ejipttant tancher mhozo krodh votoitolom ani purnn toren tancher mhozo rag kaddttolom mhunn hanvem soput ghetlo.
9 Punn mhojea nanvam pasot hanvem toxem korunk na. Jea raxttram modem te ravtale, tanchea mukhar mhojea nanvacho opman zauncho nhoi mhunn hanvem oxem kelem. Karonn hanvem tankam* Ejiptta thaun bhair haddlim tednam, hanvem dusrea raxttram mukhar tankam* mhoji vollokh dilʼli.
10 Hea toren hanvem tankam Ejiptt desantlean bhair haddlim ani ranvott vattarant gheun gelom.
11 “‘“Tea uprant hanvem tankam mhoje kaide dile ani mhoje nitiche nirnnoi kolloile. Hea toren, zo konn te pallttolo taka jivit mellttolem.
12 Toxench mhojea modem ani tanchea modem khunna mhunn hanvem tankam sabathache dis dile. Hea toren, hanv Jehova tankam povitr kortam mhunn tankam kollon ietolem.
13 “‘“Punn Izraelachea ghoranneache lok ranvott vattarant mhojea add gele. Te mhojea kaideam pormonnem cholonk nant ani tannim mhoje nitiche nirnnoi nakarle, je eka munxan pallʼlle zalear taka jivit mellttolem. Tannim mhoje sabath purnn toren boxttaile. Tor ranvott vattarant hanv tancher mhozo krodhacho pelo vottoun, tankam kabar kortolom mhunn hanvem soput ghetlo.
14 Punn mhojea nanva pasot hanvem toxem korunk na. Jea raxttram mukhar hanvem tankam* Ejipttantlean bhair haddlolim, tanchea mukhar mhojea nanvacho opman zauncho nhoi mhunn hanvem oxem kelem.
15 Hanv tankam diunchom aslom to des tankam diunchom na mhunn hanvem tankam ranvott vattarant soput gheun sanglem. Tea desant dudh ani mhonv vhanvtalem ani to sogleant sobit des aslo.
16 Hanvem oxem mhunnttlem karonn tannim mhoje nitiche nirnnoi nakarle. Te mhojea kaideam pormonnem cholonk nant ani tannim mhoje sabath boxttaile. Karonn tannim aplem kalliz kanttallo haddtta toslea murteancher lailʼlem aslem.
17 “‘“Punn uprant mhaka* tanchi kakut disli ani hanvem tancho nas korunk na. Hanvem tankam ranvott vattarant kabar korunk na.
18 Ranvott vattarant hanvem tanchea putank sanglem, ‘Tumi tumchea purvozanchea nem-kaideam pormonnem cholonakat vo tanche nitiche nirnnoi pallinakat vo kanttallo haddtta toslea tanchea murteank lagon tumkanch oxudʼdh korun ghenakat.
19 Hanv tumcho Dev Jehova. Tumi mhojea kaideam pormonnem cholat, mhoje nitiche nirnnoi pallat ani tea pormonnem vagat.
20 Tumi mhoje sabath povitr mhunn lekhat ani he sabath mhojea ani tumchea modem ek khunna koxe zatole, ani hanv tumcho Dev Jehova mhunn tumkam kollon ietolem.’
21 “‘“Punn tanche put mhojea add vochonk lagle. Te mhojea kaideam pormonnem cholonk nant, ani tannim mhoje nitiche nirnnoi manun gheunk nant ani te pallunk nant, je eka munxan pallʼlle zalear taka jivit mellttolem. Tannim mhoje sabath boxttaile. Tor ranvott vattarant hanv tancher mhozo krodhacho pelo votoitolom ani purnn toren tancher mhozo rag kaddttolom mhunn hanvem soput ghetlo.
22 Punn hanvem toxem korunk na. Mhojea nanva pasot hanvem mhakach addailo. Jea raxttram mukhar hanvem tankam* Ejipttantlean bhair haddlolim tanchea mukhar mhojea nanvacho opman zauncho nhoi mhunn hanvem oxem kelem.
23 Toxench, hanv tankam dusrea raxttramnim ani veg-vegllea desamnim ximpddaitolom mhunn hanvem ranvott vattarant soput ghetlolo.
24 Karonn te mhojea nitichea nirnnoi-am pormonnem cholonk nant, tannim mhoje kaide nakarle ani mhoje sabath boxttaile. Toxench te aplea purvozanchea kanttallo haddtta toslea murteam fattlean gele.*
25 Je nem-kaide bore nhoi, ani jea nirnnoi-am pormonnem cholʼlolean tankam jivit mellonk xokona, te hanvem tankam pallunk dilʼle.
26 Te aplea dor eka malgoddea bhurgeak ujeant bolidan mhunn bhettoitale tednam hanvem tankam tanchea bolidanak lagon oxudʼdh zaunk dile. Hea vorvim tancho nas zauncho ani hanv Jehova mhunn tankam kollon ieunchem mhunn hanvem oxem kelem.”’
27 “Taka lagon munxachea puta, Izraelachea ghoranneak sang, ‘Akʼkhea Vixvacho Dhoni Jehova oxem mhunntta: “Tumche purvoz pasun heach toren mhojea sangata ovisvaxiponnan vagle ani tannim mhojea nanvacho opman kelo.
28 Zo des hanvem tankam ditolom mhunn soput dilʼlo tea desant hanv tankam gheun ailom. Punn tannim thoinche unch-unch dongor ani panamnim bhorlolim zhaddam polloilim tednam, te thoim bolidanam ani mhaka rag haddtta tosleo bhetto bhettounk lagle. Toxench, tannim thoim pormollit dhump ani soreacheo bhetto bhettoileo.
29 Tor hanvem tankam vicharlem, ‘Tumi hea unch zagear kiteak voitat? (Tea zageak aiz pasun Unch Zago mhunnttat.)’”’
30 “Atam tum Izraelachea ghoranneak sang, ‘Akʼkhea Vixvacho Dhoni Jehova oxem mhunntta: “Tumchea purvozamnim kanttallo haddtta toslea murteam fattlean vochon mhozo visvasghat kelo toso* tumi-i tanchea fattlean vochon svotak oxudʼdh kortat kai?
31 Kanttallo haddtta toslea tachea soglea murteank bolidanam bhettoun ani tumchea putank ujeant bhettoun tumi aiz poriant tumkanch oxudʼdh kortat kai? Izraelachea ghorannea, tumi oslim kamam korun pasun tumi vichartat tacho hanv tumkam zobab ditolom oxem tumkam dista kai?”’
“Akʼkhea Vixvacho Dhoni Jehova mhunntta, ‘Hanv mhojea jivacho soput gheun sangtam, hanv tumkam zobab diunchom na.
32 Ani tumi monantuch mhunnttat, “Ami dusrea raxttram sarkim zaum-ia, lakddachea ani fatrachea devachi bhokti* kortat tea dusrea desantlea lokam sarkim zaum-ia.” Punn tumi chintʼtat tem hanv kednanch zaunk diunchom na.’”
33 “Akʼkhea Vixvacho Dhoni Jehova mhunntta, ‘Hanv mhojea jivacho soput gheun sangtam, hanv ek raza mhunn tumcher raj choloitolom, ani mhozo xoktivont hat ubarun tumkam khast ditolom ani mhozo krodhacho pelo tumcher votoitolom.
34 Hanv mhozo xoktivont hat ubarun ani mhozo krodhacho pelo votoun, tumkam dusrea desantlean bhair haddttolom, ani tumi ximpoddleat tea desantlean tumkam ektthaim kortolom.
35 Hanv tumkam dusrea desantlea ranvott vattarant vhortolom ani thoim tumchea mukhar ravon tumchea add kes zhogoddttolom.’
36 “Akʼkhea Vixvacho Dhoni Jehova mhunntta, ‘Hanv Ejipttachea ranvott vattarant tumchea purvozam sangata kes zhogoddlom toso tumchea-i sangata kes zhogoddttolom.
37 Hanv tumkam gonvlleachea danddeachea ponda thaun vochonk laitolom ani korar pallunk laitolom.
38 Punn hanv mhojea add voitat ani mhojea add oprad kortat tea lokank tumchea modle kaddun uddoitolom. Te pordexi mhunn ravtat tea desantlean hanv tankam bhair haddttolom, punn te Izrael desant bhitor sorchenant, ani hanv Jehova mhunn tumkam vollkhon gheunk poddttolem.’
39 “Izraelachea ghoranneachea lokamno, tumkam zalear, Akʼkhea Vixvacho Dhoni Jehova oxem mhunntta: ‘Tumchea modlea dor eklean voichem ani kanttallo haddtta toslea tumchea murteanchi seva korchi, punn uprant tumi mhoje aikonant zalear tumkam tacho porinnam bhogunk poddttolo. Tumi tumchea bolidanamnim ani kanttallo haddtta toslea tumchea murteamnim porot kednanch mhojea povitr nanvacher opman haddunk xokchenant.’
40 “Akʼkhea Vixvacho Dhoni Jehova mhunntta, ‘Mhojea povitr porvotar, Izraelachea eka unch porvotar, Izraelachea ghoranneantle sogle lok mhoji seva kortole. Thoim hanv tumkam manun ghetolom ani thoim tumi mhaka bhetto ani tumchim poilim follam bhetto mhunn bhettoitole ani heo sogleo povitr vostu hanv tumche koddlean manun ghetolom.
41 Jea raxttramnim ani desamnim tumi ximpoddleat, thoim thaun hanv tumkam bhair haddttolom ani ektthaim kortolom tednam, tumi bhettoilʼlea bolidanachea pormollan hanv khuxal zatolom. Ani jea toren hanv tumche koddem vagtolom tea udexim dusrea raxttram mukhar mhoji povitrtai dison ietoli.’
42 “‘Hanvem zo des tumchea purvozank ditolo mhunn soput dilolo, tea desant hanv tumkam gheun ietam tednam hanv Jehova mhunn tumkam vollkhon gheunk poddttolem.
43 Thoim tumkam tumchi vagnnuk ugddas ietoli, ani jim kamam korun tumi svotak oxudʼdh kelʼle tim soglim kamam tumkam ugddas ietolim. Tumi kelʼlea soglea vaitt kamank lagon tumkam tumchoch* kanttallo ietolo.
44 Izraelachea ghorannea, hanv tumchea sangata, tumchea vaitt vagnnuke pormonnem vo tumchea noxttea kamam pormonnem vagchom na. Tachea bodlek, mhojea nanva pasot hanv panvl ghetolom. Hanv oxem kortolom tednam, hanv Jehova mhunn tumkam vollkhon gheunk poddttolem,’ oxem Akʼkhea Vixvacho Dhoni Jehova mhunntta.”
45 Jehovacho sondex porot ek pavtt mhaka mellʼllo. Tannem mhunnttlem:
46 “Munxachea puta, atam tum dokxinne vatten tujem tondd kor, dokxinne vatten kollounni kor ani dokxinne vatten aslolea ranak bhasaunni kor.
47 Dokxinnechea ranak sang, ‘Jehovacho sondex aik. Akʼkhea Vixvacho Dhoni Jehova mhunntta: “Hanv tuka uzo laitolom ani tea ujeant, tujem dor ek hirvea panamnim bhorlolem zhadd ani suklolem zhadd lason kabar zatolem. Ho uzo palvochona. Dokxinne thaun utʼtore meren dor ekleachea tonddak hea ujeacho hulop lagtolo.
48 Tednam soglea lokank kollon ietolem ki hanvem Jehovanuch ho uzo laila, taka lagon ho uzo palvochona.”’”
49 Magir hanvem mhunnttlem: “Akʼkhea Vixvachea Dhonia, Jehova Deva! He lok mhojea vixim oxem mhunnttat, ‘Ho munis fokot umanneamninch* uloita nhoi kai?’”
Footnotes
^ Vo “tum tancher zhoddttechem formonn marunk.”
^ Utran utor, “biek.”
^ Utran utor, “hat ubarlo.”
^ Vo “tanchea pasot vinchun kaddlolo.”
^ Jem Hebrev utor hanga uzar kelam, tem ghoddie “xenn” hea orthachea utrak sombondit asa, ani tem eka vostuchi kitli vitt ieta tem dakhounk uzar kortat.
^ Mhunnche, Izrael.
^ Mhunnche, Izrael.
^ Mhunnche, Izrael.
^ Utran utor, “mhojea dolleank.”
^ Mhunnche, Izrael.
^ Utran utor, “murteancher tanche dolle asle.”
^ Vo “vochon xindoll bailam sarkim kamam kelim toxim.”
^ Vo “seva.”
^ Utran utor, “tumcheach tonddancho.”
^ Vo “mhunnʼnneo uzar korun.”
