Ezekiel 32:1-32
32 Ani 12-vea vorsachea 12-vea mhoineachea poilea disa, Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Ejipttacho raza Faraoh vixim ek dukhachem git* mhunn ani taka sang,‘Raxttram modem tum eka ghott tornattea xinva sarko aslo,Punn tuka vogi kela.
Tum doriantlea eka vhoddlea bhirankull prannea sarko aslo, zo tujea nhoim-emnim ragan udok usllaitalo.
Tujea paim-amnim tum udok haloitalo ani tea* nhoim-entlem udok khodoll kortalo.’
3 Akʼkhea Vixvacho Dhoni Jehova oxem mhunntta:
‘Zaitea raxttranchea eka zomeak* uzar korun hanv tujer mhojem zall uddoitolom,Te tuka mhojea vhoddlea zallan fosoun, voddun voir kaddttole.
4 Hanv tuka zomnicher soddun ditolom,Hanv tuka uktea moidanar uddoitolom.
Mollba voilea soglea suknneank hanv tujer bosonk laitolom,Ani akʼkhea prithumechea ranvotti zonvarank tujem mas diun hanv tankam dhadoxi kortolom.
5 Hanv tujea moddeachem mas porvotancher uddoitolom,Ani tujea urlolea kuddkeamnim falkim bhortolom.
6 Tujea thaun vhanvtolea rogtan hanv zomin bhizoitolom, porvotanche tengxe meren bhizoitolom.
Tujea rogtan nhoim-o bhortoleo.’*
7 ‘Ani tuzo nas zalea uprant,* hanv mollob dhamptolom ani noketrancho uzvadd kaddun uddoitolom.
Hanv suria kupamnim dhamptolom,Ani chondrim aplo uzvadd diunchona.
8 Tuka lagon, hanv mollbar aslole sogle toreche uzvadd paloitolom,Ani hanv tujea desacher kallokh posraitolom,’ oxem Akʼkhea Vixvacho Dhoni Jehova mhunntta.
9 ‘Hanv tujea koideank dusrea raxttramnim vhortolom tednam, tum vollkhona tea desamnim vhortolom tednam,Hanv veg-vegllea desantlea lokanchim kallzam dukhi kortolom.
10 Hanv veg-vegllea desam mukhar mhoji tolvar uzar kortolom* tednam tuji poristhiti polloun tanche raza bhirantin koddkoddttole,Ani tanche lok thottaktole ani tankam dhokʼko bostolo.
Tum poddttolo tea disa,Te thambonastana thorthortole, dor eklo aplea jivak lagon bhietolo.’
11 Karonn Akʼkhea Vixvacho Dhoni Jehova oxem mhunntta:
‘Babilonachea razachi tolvar tujer ietoli.
12 Tachea xoktivont zhuzareanchea tolvarimnim hanv tujea porzank marun uddoitolom,Te sogle, raxttram modem sogleant krur zhuzari zaun asat.
Te Ejipttacho gorv sokol haddttole, ani tachea soglea porzank pusun kaddttole.
13 Tachea nhoim-e lagim ravtolea soglea gorvam-menddrancho hanv nas korun uddoitolom,Ani hea fuddem khoincheach munxache paim vo gorvam-menddranchim fuddam* tika mhelli korchimnant.’
14 ‘Tea vellar hanv tanchem udok nitoll kortolom,Ani tancheo nhoim-o tela bhaxen vhanvom-xeo kortolom,’ oxem Akʼkhea Vixvacho Dhoni Jehova mhunntta.
15 ‘Hanv Ejiptt ek padd zalʼlem oronnʼnnem korun soddttolom tednam, eka bhorlolea desak ritem korun soddttolom tednam,Tantunt ravpi soglea lokank marun uddoitolom tednam,Hanv Jehova mhunn tankam vollkhon gheunk poddttolem.
16 Hem ek dukhachem git zaun asa, ani lok hem git mhunnttolech.Raxttrancheo dhuvo hem git gaitolim.
Tim Ejiptta pasot ani tachea soglea porje pasot hem git gaitolim,’ oxem Akʼkhea Vixvacho Dhoni Jehova mhunntta.”
17 Uprant 12-vea vorsa, mhoineachea* 15-vea disa, Jehovacho sondex mhaka mellʼllo. Tannem mhunnttlem:
18 “Munxachea puta, Ejipttachea porje pasot vhoddlean bob marun rodd ani taka* zomni sokol hadd. Taka ani xoktivont raxttranchea dhuvank, khol fonddant voitoleam sangata sokol hadd.
19 “‘Tuka kitem dista, tum sonvsarant sogleant sobit asa kai? Sokol voch, ani sunot korunk naslolea lokam sangata poddon rav!’
20 “‘Tolvarin jivexim marloleam modem te poddttole. Taka* tolvarichea adhin kelam, taka tachea porje sangata voddun pois gheun vochat.
21 “‘Fonddachea* kholaie thaun bore-bore xoktivont zhuzari tachea lagim ani tachea modot korpea lagim uloitole. Tankam tolvarin jivexim martole, te sokol voitolech ani sunot korunk nasloleam bhaxen thoinch poddon urtole.
22 Asiria aple porje sangata thoim asa. Tachea sorvbhonvtonnim tanche fondd asat, te sogle tolvarin moron poddleat.
23 Tache fondd prithumechea* kholaiek asat, ani tachi porza tachea fonddachea sorvbhonvtonnim asa. Tannem jiveanchea desant bhirant posrailʼli dekhun tankam sogleank tolvarin marun uddoile.
24 “‘Elam thoim asa, tachea fonddachea sorvbhonvtonnim tacheo porza asat, te sogle tolvarin moron poddleat. Jiveanchea desant tannim bhirant posrailʼli dekhun, sunot korunk naslolea poristhitint te thoim sokol geleat. Atam tea khol fonddant voitoleam sangata tankam loz bhogchi poddttoli.
25 Jivexim marun uddoilʼlea lokam modem tannim taka* khatt toiar kelea, tachea fonddachea sorvbhonvtonnim tacheo sogleo porza asat. Te sogle sunot korunk naslole asat ani tankam tolvarin jivexim marleat, karonn tannim jiveanchea desant bhirant posrailʼli. Atam tea khol fonddant voitoleam sangata tankam loz bhogchi poddttoli. Jivexim marun uddoiloleam sangata taka ghatla.
26 “‘Thoim Meshek, Tubal ani tancheo* sogleo porza asat. Tanche* fondd tachea sorvbhonvtonnim asat. Te sogle sunot korunk naslole asat ani tankam tolvarin topleat, karonn tannim jiveanchea desant bhirant posrailʼli.
27 Sokol Fonddant* zhuzachim hotʼtearam gheun geloleam sangata, mhunnche, sokol poddlolea sunot korunk naslolea xoktivont zhuzaream sangata, te thoim poddon urchenant kai? Tancheo tolvari lok tanchea tokle* ponda dovortole ani tanchim patkam tanchea haddancher dovortole, karonn hea xoktivont zhuzareamnim jiveanchea desant bhirant posrailʼli.
28 Punn tuka zalear, sunot korunk nasloleam sangata chiddʼddun uddoitole, ani tolvarin jivexim marloleam sangata tum poddon urtolo.
29 “‘Edom thoim asa, tache raza ani tache sogle mukheli thoim asat. Te xoktivont asle zalear pasun, tolvarin jivexim marun uddoilolea lokam modem tankam ghatlole asat. Te pasun sunot korunk nasloleam sangata, ani khol fonddant voitoleam sangata poddlole astole.
30 “‘Utʼtoreche sogle kunvor* soglea Sidonitkaram sangata thoim asat. Tannim aplea xoktechea bollar bhirant posrailʼli, tori astana tancho opman zaun, jivexim marun uddoilolea lokam sangata te sokol geleat. Tolvarin marun uddoilolea lokam sangata, sunot korunk naslole poristhitint te thoim poddon astole, ani sokol khol fonddant voitoleam sangata tankam loz bhogchi poddttoli.
31 “‘Faraoh hem soglem polloitolo, ani tache porje sangata jem ghoddlem, taka lagon taka bhuzvonn mellttoli. Faraoh-k ani tachea akʼkhea foujek tolvarin marun uddoitole,’ oxem Akʼkhea Vixvacho Dhoni Jehova mhunntta.
32 “‘Faraoh-n jiveanchea desant bhirant posrailʼli dekhun, taka ani tachea soglea porzank sunot korunk nasloleam sangata, ani tolvarin jivexim marun uddoilolea lokam sangata marun uddoitole,’ oxem Akʼkhea Vixvacho Dhoni Jehova mhunntta.”
Footnotes
^ Hem dukh kortat tea vellar gaitat toslem git.
^ Utran utor, “tanchea.”
^ Vo “raxttranchi ek zomat.”
^ Utran utor, “Nhoim-encheo dego tujea thaun (tuka gheun) bhortoleo.”
^ Vo “Ani tum palvolea uprant.”
^ Vo “tolvar haloun dhomkaitolom.”
^ Vo “futtam.” Inglez bhaxent “hooves.”
^ Ho ghoddie 12-vo mhoino asonk xokta. Vers 1-ak sor korat.
^ Mhunnche, Ejipttachem raxttr.
^ Mhunnche, Ejipttachem raxttr.
^ Vo “khol fonddachea.”
^ Mhunnche, Elamachem raxttr.
^ Utran utor, “tacheo.”
^ Utran utor, “Tache.”
^ Hem ghoddie, eka zhuzareak man diunk taka tachea tolvari sangata purtale, taka suchit korta.
^ Vo “fuddari.”
