Ezekiel 36:1-38
36 “Munxachea puta, Izraelachea porvotam vixim hi bhasaunni kor, ‘Izraelachea porvotamno, Jehovacho sondex aikat.
2 Akʼkhea Vixvacho Dhoni Jehova oxem mhunntta: “Dusmanamnim tumchea vixim oxem mhunnttlam, ‘Kitlem borem! Adlea kalla voile unch zage pasun amche zaleat!’”’
3 “Taka lagon oxi bhasaunni kor, ‘Akʼkhea Vixvacho Dhoni Jehova oxem mhunntta: “Dusrea raxttrantlea vanchon urlolea lokamnim tumkam tabeant gheunchim mhunn dusmanamnim soglea vatten tumcher akromonn kelem ani tumkam padd korun uddoile. Tea bhair, lok tumchea vixim fott uloun tumchem nanv piddʼddear kortat.
4 Taka lagon Izraelachea porvotamno, Akʼkhea Vixvacho Dhoni Jehovacho sondex aikat! Akʼkhea Vixvacho Dhoni Jehova, porvotank, dongrank, vhallank, falkeank, padd zaun gelʼlea zageank ani soddun dilʼlea xarank, zankam bhonvtonnchea raxttrantlea urlolea lokamnim luttleat ani zancheo moskoreo keleat, tankam oxem mhunntta.
5 Hankam sogleank Akʼkhea Vixvacho Dhoni Jehova mhunntta: ‘Hanv ragan bhoron dusrea raxttrantlea urlolea lokam add ani akʼkhea Edoma add uloitolom. Desantle chorvache zage aplea tabeant gheunk ani to des luttunk tannim bhorpur khuxal zaun ani tomnne marun mhozo des aplo mhunn sanglem.’”’
6 “Tor Izrael desa vixim bhasaunni kor ani porvotank, dongrank, vhallank ani falkeank sang, ‘Akʼkhea Vixvacho Dhoni Jehova oxem mhunntta: “Polloi! Tuka raxttram koddlean opman sosunk poddla dekhun hanv ragan ani krodhachea ujean uloitolom.”’
7 “Taka lagon, Akʼkhea Vixvacho Dhoni Jehova oxem mhunntta: ‘Hanv svota mhozo hat voir ubartam ani soput gheun sangtam ki atam tumchea bhonvtonnchea raxttrank opman sosunk poddttolo.
8 Punn Izraelachea porvotamno, mhojea Izrael porje pasot tumchea zhaddank zaite khande ietole ani follam zatolim, karonn mhoji porza beginuch porot ietoli.
9 Hanv tumchea sangata asam. Hanv tumcher dhean ditolom, ani tumchi zomin kostolom ani bim vomptolom.
10 Hanv tumchea lokancho, akʼkhea Izraelachea ghoranneacho ankddo khub vaddoitolom. Tachea xaramnim lok porot ravonk lagtole ani tacho padd zalʼlo zago porot bandun kaddttole.
11 Hoi, hanv tachea lokancho ani gorvam-menddrancho ankddo vaddoitolom. Te khub vaddttole ani choddot voitole. Hanv tumchea thoim poilim bhaxen lok ravom-so kortolom. Hanv tumkam, tumi adim ravtalim tachea poros khub bore bhaxen ravonk ditolom, ani hanv Jehova mhunn tumkam vollkhon gheunk poddttolem.
12 Hanv mhojea Izrael porjek tumche voilean ieunk ani vochonk ditolom, ani te tumcher kobzo kortole. Tumi tanchem daiz zatole ani porot kednanch tumi tanchea bhurgeank tanchea thaun kaddun gheunk xokchenant.’”
13 “Akʼkhea Vixvacho Dhoni Jehova oxem mhunntta: ‘Te tumchea vixim mhunnttat, “Tum lokank khaun uddoita, ani raxttram koddlean tanchea bhurgeank kaddun gheta toslo des zaun asa.”’
14 ‘Taka lagon, tum porot kednanch lokank khaun uddounchona vo tujea raxttrantlea bhurgeank kaddun gheunchona,’ oxem Akʼkhea Vixvacho Dhoni Jehova mhunntta.
15 ‘Hanv raxttrank tuzo anik opman korunk diunchom na vo tuka lokanche anik tomnne aikonk poddchenant. Ani tum porot kednanch tujea raxttrank addkhollonk karonn zaunchona,’ oxem Akʼkhea Vixvacho Dhoni Jehova mhunntta.”
16 Jehovacho sondex porot ek pavtt mhaka mellʼllo. Tannem mhunnttlem:
17 “Munxachea puta, Izraelachea ghoranneache lok tanchea desant ravtale tednam, tannim aplea kamamnim ani vagnnuken to des oxudʼdh korun uddoilo. Mhojea nodren tanchim soglim kamam mhoineache pallie itlinch oxudʼdh aslim.
18 Tannim desant rogot varoilʼlem ani tanchea kanttallo haddtta toslea murteamnim* desak oxudʼdh kelʼlo dekhun hanvem tancher mhozo krodhacho pelo votoilo.
19 Hanvem tankam dusrea raxttramnim ani veg-vegllea desamnim ximpddailim. Hanvem tankam tanche vagnnuke pormonnem ani kamam pormonnem khast dili.
20 Punn te dusrea raxttram modem gele tednam thoinchea lokamnim oxem mhunnon mhojea povitr nanvacho opman kelo, ‘He Jehovache lok, tori astana tankam tacho des soddcho poddlo.’
21 Izraelachem ghorannem dusrea raxttramnim gelem tednam tannem mhojea povitr nanvacho opman kelo. Taka lagon, mhojea povitr nanvacho mhaka kitlo usko asa tem hanv tankam dakhoitolom.”
22 “Taka lagon, Izraelachea ghoranneak sang, ‘Akʼkhea Vixvacho Dhoni Jehova oxem mhunntta: “Izraelachea ghoranneachea lokamno, hanv tumchea pasot nhoi, punn mhojea povitr nanva pasot panvl ghetolom, zacho tumi dusrea raxttram modem opman kelo.”’
23 Akʼkhea Vixvacho Dhoni Jehova mhunntta, ‘Hanv mhojem vortem nanv povitr kortolonch, zacho tumi dusrea raxttram modem opman kelo. Hea toren, hanv ek povitr Dev mhunn tea raxttrank dakhoun ditolom, tednam hanv Jehova mhunn tankam vollkhon gheunk poddttolem.
24 Hanv tumkam veg-vegllea raxttrantle kaddun haddttolom, soglea desantlean ektthaim kortolom ani porot tumkam tumchea desant haddttolom.
25 Hanv tumcher nitoll udok ximpddaitolom ani tumi nitoll zatole. Tumchea soglea mhelleponna thaun ani tumchea soglea kanttallo haddtta toslea murteam thaun hanv tumkam xudʼdh kortolom.
26 Hanv tumkam ek novem kalliz ditolom ani tumchea bhitor ek novem mon* ghaltolom. Hanv tumchem fatrachem kalliz kaddun tumkam masachem kalliz ditolom.*
27 Hanv mhoji povitr xokti uzar korun tumchem chintop bodoltolom ani hanv tumkam mhojea nem-kaideam pormonnem cholonk laitolom. Tumi mhoje nitiche nirnnoi pallttole ani tea pormonnem vagtole.
28 Uprant, hanvem tumchea purvozank dilʼlea desant tumi ravtole. Tumi mhoje lok zatole, ani hanv tumcho Dev zatolom.’
29 “‘Hanv tumchea soglea mhelleponna thaun tumkam salvar kortolom, hanv daneak hukum ditolom ani bhorpur dano zaum-so kortolom ani hanv tumcher bhuk haddchom na.
30 Hanv zhaddanchim follam ani xetachem pik bhorpur vaddoitolom, jea vorvim bhukek lagon tumkam porot kednanch raxttram modem opman sosunk poddchona.
31 Tea vellar, tumi tumchi vaitt vagnnuk ani tumchim vaitt kamam ugddas kortole. Ani tumchea guneanvak lagon ani tumchea vitt haddtta toslea kamank lagon tumkam tumchoch kanttallo ietolo.
32 Punn hem zannam zaiat: Hanv hem tumkam lagon korina. Izraelachea ghorannea, tumchea vagnnukek lagon loz bhog ani opman sos,’ oxem Akʼkhea Vixvacho Dhoni Jehova mhunntta.
33 “Akʼkhea Vixvacho Dhoni Jehova oxem mhunntta: ‘Jea disa hanv tumkam tumchea soglea guneanvantlean nitoll kortolom, tea disa hanv tumchea xaramnim lok ravom-so kortolom ani tumche padd zaun gelʼle zage porot bandtolom.
34 Pasar zatolea lokank zo des padd zaun gela oso distalo, tea desachi zomin kostole.
35 Ani lok mhunnttole: “Ho padd zaun gelʼlo des Eden bage sarko zala, ani him xaram jim osadd zalʼlim, padd zaun gelʼlim ani moddon poddlolim, tim atam bhonvtonnim ghott durgam aslolea xara bhaxen zaleant ani tantunt lok ravtat.”
36 Moddon poddlam tem hanvem svota Jehovan bandun kaddlam ani padd zaun gelʼlea zomnicher hanvem roilam mhunn tumchea bhonvtonnim urlolea raxttrank tednam vollkhon gheunk poddttolem. Hanvem svota Jehovan hem sanglam, ani hanvem tem purnn kelam.’
37 “Akʼkhea Vixvacho Dhoni Jehova oxem mhunntta: ‘Hanv Izraelachea ghoranneak tanchea lokancho ankddo hindda bhaxen vaddoi mhunn mhoje lagim magonk ditolom, ani hanv tankam vaddoitolom.
38 Povitr lokanchea vhoddlea zomea bhaxen ani porbe vellar Jeruzalemant aslolea zonvaranchea vhoddlea hindda bhaxen,* him padd zaun gelʼlim xaram lokanchea zomeamnim bhortolim. Tednam hanv Jehova mhunn tankam vollkhon gheunk poddttolem.’”
Footnotes
^ Jem Hebrev utor hanga uzar kelam, tem ghoddie “xenn” hea orthachea utrak sombondit asa, ani tem eka vostuchi kitli vitt ieta tem dakhounk uzar kortat.
^ Vo “xokti.” Hebrev bhaxent ru′ach.
^ Mhunnche, Deva koddlean melltta tem margdorxon apnnaunk toiar asa toslem kalliz.
^ Vo ghoddie, “Jeruzalemant bolidan mhunn bhettounk haddlolea menddranchea hinddam bhaxen.”
