Ezekiel 3:1-27
3 Uprant tannem mhaka mhunnttlem: “Munxachea puta, tujea mukhar jem asa tem kha.* Ho kovllo kha, ani vochon Izraelachea ghorannea lagim uloi.”
2 Tednam hanvem mhojem tondd ugoddlem, ani tannem mhaka to kovllo khaunk lailo.
3 Magir tannem mhaka mhunnttlem: “Munxachea puta, hanv tuka ditam to ho kovllo kha, ani tujem pott bhor.” Tor, hanv to kovllo khaunk laglom ani to mhojea tonddant mhonva bhaxen godd aslo.
4 Tannem mhaka mhunnttlem: “Munxachea puta, Izraelachea ghorannea lagim voch ani tankam mhozo sondex sang.
5 Hanv tuka oslea lokam lagim dhaddina, zanchi bhas somzonk kotthin vo zanchi bhas tuka khoborna, punn hanv tuka Izraelachea ghorannea lagim dhaddttam.
6 Hanv tuka oslea zaitea raxttram lagim dhaddina, zanchi bhas somzonk kotthin vo zanchi bhas tuka khoborna ani zanchi utram tuka somzonant. Hanvem tuka tanchea lagim dhaddlolo zalear, tim tujem aikotolim aslim.
7 Punn Izraelachem ghorannem tujem aikon gheunchem na, karonn tem ghorannem mhojem aikonk sodhina. Izraelachea ghoranneantlea soglea lokanchem kalliz ani mon nibor asa.
8 Polloi! Hanvem tujem tondd tanchea tonddam itlem ani tujem kopol tanchea koplam itlem ghott kelam.
9 Hanvem tujem kopol hirea bhaxen ghott kelam, eka fatra* poros chodd ghott kelam. Tum tankam bhienaka vo tanchim tonddam polloun ghabornaka, karonn te add vochpi ghoranneache lok zaun asat.”
10 Uprant tannem mhaka mhunnttlem: “Munxachea puta, hanv tuka sangtam tem soglem dhean diun aik ani tem tujea kallzant ghott dovor.
11 Magir, koident aslolea mhojea lokam* lagim tum voch ani tanchea lagim uloi. Te tujem aikom vo na aikom, tum tankam sang, ‘Akʼkhea Vixvacho Dhoni Jehova oxem mhunntta.’”
12 Uprant ek xokti* mhaka ubarun gheun geli, ani mhaka fattlean thaun oxem mhunntta to ek vhoddlo avaz aikonk ailo: “Jehova asa thoim thaun tachea mhoimechi vakhannʼnni zaum.”
13 Ani tea jivea pranneanche pakhotte eka-mekak lagtale to avaz aikonk ietalo, toxench laginch aslolim rodham ghunvtat to avaz ietalo, tea bhair anik ek vhoddlo avaz aikonk ietalo.
14 Magir ti xokti* mhaka aplea sangata ubarun gheun geli. Hanv tea xokte sangata voitalom tednam, mhojea monant koddsann ani rag aslo, ani Jehovachi xokti mhojer kam korunk lagli.*
15 Tor hanv Kebar nhoim-e lagim Tel-abibant koidi aslolea lokam koddem gelom. Te ravtale thoinch hanv ravonk laglom. Mhaka dhokʼko boslolo dekhun, sat dis poriant hanv tanchea modem vogich ravlom.
16 Sat disam uprant Jehovacho sondex mhaka mellʼllo:
17 “Munxachea puta, hanvem tuka Izraelachea ghoranneacho rakhonndar mhunn nemla. Tum mhojea tonddantlo sondex aikota tednam, mhojea pasot tankam xittkaunni di.
18 Jednam hanv eka noxtteak oxem mhunnttam, ‘Tum mortoloch,’ punn tum taka xittkaina ani tannem apli noxtti vatt soddun aplo jiv salvar korcho mhunn tum taka sangona zalear, tachea guneanvak lagon to mortolo karonn to noxtto, punn tachea rogtacho hixob hanv tuje koddlean ghetolom.*
19 Punn tum eka noxtteak xittkaunni dita, tori astana to aplim noxttim kamam ani noxtti vatt soddun dina zalear, to tachea guneanvak lagon mortolo, punn tum zalear tuzo jiv vanchoitolo.
20 Punn ek nitivont munis nitivontponnachi vatt soddun vaitt tem* korta zalear, hanv tachea mukhar addkholl ghaltolom, ani to mortolo. Tunvem taka xittkaunk na zalear to tachea patkak lagon mortolo ani hanv tachim nitivont kamam ugddas dovorchom na, punn tachea rogtacho hixob hanv tuje koddlean ghetolom.*
21 Punn tannem patok korchem nhoi mhunn tum tea nitivont munxak xittkaita, ani to patok korina zalear to salvar zatoloch karonn taka xittkailʼlo, ani tum-ui tuzo jiv vanchoitolo.”
22 Uprant Jehovacho hat mhojer ailo, ani tannem mhaka mhunnttlem: “Utth, ani falkeantlea moidanar voch, ani hanv thoim tujea lagim uloitolom.”
23 Tor hanv utthlom ani falkeachea moidanar gelom ani polloi! mhaka thoim Jehovachi oxi mhoima disli, zoxi hanvem Kebar nhoim-e lagim polloilʼli, ani hanv zomnir umto poddlom.
24 Tednam Devachi xokti mhojea bhitor aili ani tinnem mhaka mhojea paim-ancher ubo kelo, ani Dev mhojea lagim uloilo. Tannem mhunnttlem:
“Voch, ani tujea ghorachem dar bond korun bhitor rav.
25 Munxachea puta, tuka zalear, tanche modem vochonk mellchem nhoi mhunn te tuka doriemnim bandtole.
26 Hanv tuji jib talliek chittkoitolom ani tum mono zatolo, tum tankam sudhraunk pavchona, karonn te add voitat toslea ghoranneache lok zaun asat.
27 Punn hanv tuje lagim uloitam tednam hanv tujem tondd ugoddttolom, ani tunvem tankam oxem sangonk zai, ‘Akʼkhea Vixvacho Dhoni Jehova oxem mhunntta.’ Zo konn aikonk sodhta tannem aikonchem, ani zo konn aikonk nakarta tannem tem nakarchem, karonn te add voitat toslea ghoranneache lok zaun asat.
Footnotes
^ Utran utor, “tuka jem mellʼllam tem kha.”
^ Inglez bhaxent “flint.”
^ Utran utor, “aslolea tujea lokanchea putam.”
^ Hanga uzar kelʼlea Hebrev utracho orth, povitr xokti vo ek devdut zaunk xokta.
^ Hanga uzar kelʼlea Hebrev utracho orth, povitr xokti vo ek devdut zaunk xokta.
^ Utran utor, “hat mhojer ailo.”
^ Vo “punn hanv tuka tachea rogtacho zobabdar kortolom.”
^ Vo “soddun onʼneai.”
^ Vo “punn hanv tuka tachea rogtacho zobabdar kortolom.”
