Ezekiel 45:1-25
45 “‘Tumi desachi zomin daiz mhunn vanttʼttole tednam, tantuntlo ek povitr bhag tumi Jehova pasot ek denngi mhunn bhettounk zai. Tachi lambai 25,000 hat* ani rundai 10,000 hat asonk zai. Ho akʼkho vattar* ek povitr bhag zatolo.
2 Hea bhaga bhitor povitr zagea pasot, 500 hat lamb ani 500 hat rund ek choukoni zago astolo. Ani tachea charui vatten 50 hat rund chorvachem moll astolem.
3 Povitr bhagantlean 25,000 hat lamb ani 10,000 hat rund zago kuxin kaddun dovor. Tea zagear Devmondir astolem, je sogleam-von povitr astolem.
4 Zomnicho ho povitr bhag iadnikam pasot astolo, je Devmondirache sevok zaun asat, ani Jehova lagim vochon tachi seva kortat. Ho tanchea ghoram pasot ek zago astolo, ani Devmondira pasot ek povitr zago astolo.
5 “‘Devmondirache sevok aslolea Levitam pasot 25,000 hat lamb ani 10,000 hat rund ek bhag astolo ani 20 jevpache rum tanchea daizacho vantto koxe astole.
6 “‘Tum xaracho bhag mhunn 25,000 hat lamb (ho bhag povitr denngechea bhaga itloch asonk zai) ani 5,000 hat rund zago kuxin dovor. Ho zago Izraelachea akʼkhea ghorannea pasot astolo.
7 “‘Povitr denngechea bhagachea donui vatten ani xarachea bhagachea donui vatten mukhelea pasot zomin astoli. Hi zomin povitr denngechea bhaga ani xarachea bhagachea lagim astoli. Ti udente vatten ani ostome vatten astoli. Tachi lambai, udentechea xime thaun te ostomechea xime poriant dusrea kullank mellʼllolea eka bhaga itlich astoli.
8 Izraelant ho zago mukheleacho vantto astolo. Hanvem nemlole mukheli hea fuddem porot kednanch mhojea lokam sangata vaitt toren vagchenant, ani Izraelachea ghoranneachea kullam pormonnem te to zago vanttun ditole.’
9 “Akʼkhea Vixvacho Dhoni Jehova oxem mhunntta: ‘Izraelachea mukheleamno, tumchem chodd zalem!’
“‘Tumi kortat ti maramari ani zulum bond korat. Sodanch neai-an ani nitivontponnan vagat. Mhojea lokanchea zageacher kobzo korop bond korat,’ oxem Akʼkhea Vixvacho Dhoni Jehova mhunntta.
10 ‘Tumi uzar kortat teo tagddeo, efa* mapam ani bath* mapam sarkim asonk zai.
11 Tumchim efa ani bath, ekuch mapachim asonk zai. Bath mapant, homer* mapacho dhavo bhag asonk zai, ani efa mapant, homer mapacho dhavo bhag asonk zai. Donui mapam homer mapa pormonnem asonk zai.
12 Ek shekel,* 20 gerah* asonk zai. Ani 20 shekel, 25 shekel ani 15 shekel, sogle mellon tumchea pasot ek maneh* zatolem.’
13 “‘Tumi denngi mhunn hem soglem bhettounk zai: gonvachea dor eka homera thaun efacho sovʼvo vantto, ani zovachea* dor eka homera thaun efacho sovʼvo vantto.
14 Telacho tharailʼlo bhag, bath mapa pormonnem asonk zai. Bath, ho cor* hacho dhavo bhag zaun asa, ani dha bath, ek homer zaun asa. Karonn dha bath mhunnttlear ek homer.
15 Ani Izraelachea hindda thaun, dor 200 menddram modlem ek menddrum diunk zai. Him soglim denngim lokanchea patkanchea farikponna pasot, daneachi bhett, hulpailʼli bhett ani xantichim bolidanam mhunn astolim,’ oxem Akʼkhea Vixvacho Dhoni Jehova mhunntta.
16 “‘Desantle sogle lok hi denngi Izraelant aslolea mukheleak ditole.
17 Punn porbanchea disamnim, novea chondrimachea* disamnim, Sabathachea disamnim ani Izraelachea ghorannea pasot aslolea soglea porbanchea disamnim, hulpailʼleo bhetto, daneachi bhett ani soreachi bhett diunchi zobabdari mukheleachi astoli. Izraelachea ghoranneachea patkachea farikponnak lagon, patka pasot bhett, daneachi bhett, hulpailʼli bhett ani xantichim bolidanam tannem diunk poddttolim.’
18 “Akʼkhea Vixvacho Dhoni Jehova oxem mhunntta: ‘Poilea mhoineachea poilea disa, tunvem hinddantlo koslench khot naslolo ek boil haddunk zai, ani povitr zagear thaun patok pois korun, to zago xudʼdh korunk zai.
19 Iadnik tea patkachea bolidanachem thoddem rogot gheun Devmondirachea darvontteachea khambeacher, vedichea bhagachea charui konnxeancher ani bhitorlea angnnachea darvontteachea khambeacher laitolo.
20 Konnui chukon vo nokllo astana patok korta tednam mhoineachea satvea disa tunvem oxem korunk zai, ani tumi Devmondira pasot patkachem farikponn diunk zai.
21 “‘Poilea mhoineachea 14-vea disa tumi Paskachi porob korunk zai. Sat disa poriant tumi khomir naslolo unddo khaunk zai.
22 Tea disa mukheli aplea pasot ani desantlea soglea lokam pasot, patka pasot bhett mhunn ek tornatto boil ditolo.
23 Porbeche satui dis, dor disa to Jehovak ek hulpailʼli bhett mhunn khot naslole sat tornatte boil ani khot naslole sat menddre ditolo. Toxench, patka pasot bhett mhunn to dor disa ek bokddo ditolo.
24 Tea bhair, tannem dor eka tornattea boila pasot daneachi bhett mhunn ek efa, ani dor eka menddrea pasot ek efa diunk zai. Toxench, dor eka efa pasot telachem ek hin* diunk zai.
25 “‘Satvea mhoineachea 15-vea disa, porbeche satui dis tannem tich patka pasot asloli bhett, hulpailʼli bhett, daneachi bhett ani tel diunk zai.’”
Footnotes
^ Hem lamb hatachea mapak suchit korta. Mahiti B14 polloi.
^ Vo “Tachea xime bhitor aslolo soglo zago.”
^ Mahiti B14 polloi.
^ Mahiti B14 polloi.
^ Mahiti B14 polloi.
^ Mahiti B14 polloi.
^ Mahiti B14 polloi.
^ Vo “mins.” Mahiti B14 polloi.
^ Inglez bhaxent taka “barley” mhunnttat.
^ Mahiti B14 polloi.
^ Vo “omaxechea.” Chondrimacho lhanso bhag disonk suru zata to dis.
^ Mahiti B14 polloi.
