Ezekiel 43:1-27
43 Uprant to mhaka udente vatten fuddo korun aslolea darvonttea lagim gheun gelo.
2 Thoim, Izraelachea Devachi mhoima udente thaun ieta ti hanvem polloili, ani tacho avaz ghos-ghoxeamnim vhanvtolea udka sarko aslo, ani prithum tache mhoimen chokchoktali.
3 Hanvem thoim jem polloilem, tem hanv* xaracho nas korunk ailʼlom tea vellar polloilʼlea dorxona sarkem aslem. Hem dorxon, hanvem Kebar nhoim-e lagim polloilʼlem toxench aslem, ani hanv zomnir umto poddlom.
4 Uprant, hanvem Jehovachi mhoima udente vatten fuddo korun aslolea darvontteantlean Devmondirant* bhitor sorta ti polloili.
5 Uprant ek xokti* mhaka ubarun bhitorlea angnnant gheun geli, ani hanvem Jehovachea mhoimen mondir bhorlam tem polloilem.
6 Tea uprant hanvem Devmondirantlean mhoje lagim konn tori uloita tacho avaz aikolo, ani to munis mhojea kuxik ieun ubo ravlo.
7 Tannem mhaka mhunnttlem:
“Munxachea puta, ho mhojea xinvasonacho zago ani mhoje paim dovorpacho zago, zoim hanv Izraelachea lokam modem sodankal ravtolom. Izraelachem ghorannem ani tache raza, dusrea devam sangata xindollki korun,* ani moron gelʼlea tanchea razanchea moddeamnim porot kednanch mhojem povitr nanv boxttaunchenant.
8 Tannim aplo umbro mhojea umbrea kuxik ghatlo ani aplea darvontteacho khambo mhojea darvontteachea khambea kuxik ghatlo, mhojea ani tanchea modem fokot ek vonott asli. Oslim vitt haddtta toslim kamam korun tannim mhojem povitr nanv boxttailem, taka lagon hanvem ragan bhoron tancho nas korun uddoilo.
9 Atam tannim dusrea devam sangata xindollki korop* soddun diunchi ani aplea razanchim moddim mhojea thaun pois vhorchim, tednam hanv tanchea modem sodankal ravtolom.
10 “Punn tum, munxachea puta, Izraelachea ghoranneachea lokank tancheach guneanvak lagon loz bhogchi ani tannim tachea plana vixim xikchem mhunn tankam Devmondira vixim sang.
11 Tankam tannim kelʼlea soglea kamam vixim loz bhogta zalear tum tankam Devmondirachea plana vixim, tachea manddavolli vixim, tachea bhair ani bhitor sorchea vattem vixim sang. Tankam Devmondirache sogle plan ani tache nem-kaide dakhoi, ani tem soglem tachea dolleam mukhar boroi, jea vorvim te Devmondirachea soglea planancher dhean ditole ani tache nem-kaide pallttole.
12 Ho Devmondiracho kaido. Porvota voir aslolo soglo vattar bhov povitr zaun asa. Polloi! Hoch Devmondiracho kaido.
13 “Vedichem zokh hatachea zokha pormonnem oxem asa (dor eka hatachea lambaie sangata anik char bottam mezunk zai).* Vedicho sokoilo bhag ek hat unch, ani charui vatten tachea voilea bhaga poros ek hat bhair asa. Taka degek sorvbhonvtonnim ek bordder asa, zachi rundai ek vet* asa. Ho vedicho sokoilo bhag.
14 Vedichea sokoilea bhagacher aslolo dusro bhag, don hat unch asa ani charui vatten tachea voilea bhaga poros ek hat bhair asa. Tachea tisrea bhagachi unchai char hat asa, ani to tachea voir aslolea zollovpachea zagea poros charui vatten ek hat bhair asa.
15 Vedicho zollovpacho zago char hat unch asa ani tachea charui konnxeam thaun char xingam voir sortat.
16 Vedicher aslolo zollovpacho zago choukoni asa. To 12 hat lamb ani 12 hat rund asa.
17 Vedicho tisro bhag charui vattemnim 14 hat lamb ani 14 hat rund asa, ani tachea bhonvtonnim asloli bordder ordo hat asa. Vedicho sokoilo bhag sogle vatten ek hat bhair asa.
“Ani vediche panvdde udente vatten fuddo korun asat.”
18 Uprant tannem mhaka mhunnttlem, “Munxachea puta, Akʼkhea Vixvacho Dhoni Jehova oxem mhunntta: ‘Hulpailʼleo bhetto bhettounk ani tacher rogot ximpddaunk, vedi bandtana him nirdexonam pall.’
19 “Akʼkhea Vixvacho Dhoni Jehova oxem mhunntta: ‘Tum hinddantlea eka tornattea boilak ghe ani mhojea mukhar seva kortat tea Zadokachea sonstintlea Levi kullantlea iadnikank, to patka pasot bhett mhunn bhettounk di.
20 Vedi patka thaun nitoll ani xudʼdh zaunchi mhunn, tunvem tea boilachem rogot gheun vedicher aslolea charui xingancher, vedichea tisrea bhagachea charui konnxeancher ani sorvbhonvtonnim borddericher launchem.
21 Uprant tea tornattea boilak, mhunnche patka pasot asloli bhett ghe ani ti lasounk povitr zagea bhair, Devmondirachea nemlolea zagear vhor.
22 Dusrea disa patka pasot bhett mhunn ek khot naslolo bokddo bhettoi. Tornattea boilachem bolidan bhettoun vedi thaun patok pois korun ti xudʼdh kortale toxe, te hea bokddeachem bolidan bhettoun vedi thaun patok pois kortole ani ti xudʼdh kortole.’
23 “‘Vedi thaun patok pois korun, ti vedi xudʼdh kelea uprant, tum tujea hinddantlo ek khot naslolo tornatto boil ani ek khot naslolo menddro ghetolo ani bolidan mhunn bhettoitolo.
24 Tunvem tankam Jehova pasot bhettounk zai, ani iadnikamnim tancher mitt ximpddaunk zai ani ek hulpailʼli bhett mhunn Jehovak bhettounk zai.
25 Tum sodam, sat dis poriant ek bokddo, tujea hinddantlo ek tornatto boil ani ek menddro, patka pasot bhett mhunn bhettoitolo. Him zonvaram khot naslolim* asonk zai.
26 Sat dis poriant tannim ti vedi xudʼdh korchi, nitoll korchi ani ti uzar korunk lagon toiar korchi.
27 Vediche xudʼdh korche sat dis somplea uprant, atthvea disa ani tachea uprant, iadnik tumcheo* hulpailʼleo bhetto ani xanticheo bhetto vedicher bhettoitole, ani hanv tumkam lagon khuxal zatolom,’ oxem Akʼkhea Vixvacho Dhoni Jehova mhunntta.”
Footnotes
^ Vo ghoddie, “to.”
^ Utran utor, “ghorant.”
^ Hanga uzar kelʼlea Hebrev utracho orth, povitr xokti vo ek devdut zaunk xokta.
^ Mhunnche, dusrea devanchi bhokti korun.
^ Mhunnche, dusrea devanchi bhokti korop.
^ Hem lamb hatachea mapak suchit korta. Mahiti B14 polloi.
^ Mhunnche, hatachem vet, sumar 22.2 cm (8.75 in.). Mahiti B14 polloi.
^ Vo “zonvaram poripurnn.”
^ Mhunnche, lokancheo.
