Ezekiel 27:1-36

  • Tirachea buddttolea tarva vixim dukhachem git (1-36)

27  Jehovacho sondex porot ek pavtt mhaka mellʼllo. Tannem mhunnttlem: 2  “Tum zalear, munxachea puta, Tira vixim ek dukhachem git* mhunn 3  ani taka sang,‘Tum zo doriachea darvonttea lagim ravta,Zaitea zunveanchea lokam sangata veapar-dhondo korta,Akʼkhea Vixvacho Dhoni Jehova oxem mhunntta: “Tira, tunvem svota mhunnttlam, ‘Mhoji sobitkai poripurnn asa.’  4  Tuje vattar doriachea modem asat,Ani tujea bandpeamnim tuji sobitkai poripurnn keli.  5  Tannim tujim soglim follim Senirantlea juniper* zhaddam thaun toiar kelim,Ani Lebanonantlem ek cedar* zhadd gheun tannim tujea pasot ek xidd* toiar keli.  6  Tannim Bashanachea oak* zhaddam thaun tuje vole* kele,Tuzo fuddlo bhag Kittimachea zunveam thaun cypress* zhaddachea lakddamnim toiar kelʼlo, zaka hotʼtinche dant uzar korun nettoilʼlem.  7  Tujea xiddicho kopddo, Ejipttantlea veg-vegllea rongachea mov lugttachea kopddea* thaun aslo,Tujea bottichea mallier aslolo mattov, Elishah zunveancher mellttolea nillea suta thaun ani zambllea vula thaun kelʼlo aslo.  8  Tuje tanddeli* Sidon ani Arvada thaun asle. Tira, tuje tarum choloupi tujech kola aslole munis asle.  9  Gebalantlea onnbhov aslolea* ani kola aslolea munxamnim tujeo khanchi bhorun kaddleo,Doriantlim soglim tarvam ani tacher aslole tarvotti tujea lagim veapar-dhondo korunk aile. 10  Tuje foujent, Persia, Lud ani Put, hangasorle munis asle. Te tuje zhuzari asle. Tannim tujer apleo ddhalo ani helmettam lamboilim, ani tannim tuji mhoima vaddoili. 11  Tuje foujent Arvadache munis asle, je tujea bhonvtonnim aslolea durgancher ube asle,Ani tujea gopurancher dhirvont munis pahro kortale. Tujea durganchea sorvbhonvtonnim te apleo gol ddhalo lamboitale,Ani oxem korun tannim tuji sobitkai poripurnn keli. 12  “‘“Tuji bhorpur girestkai polloun Tarshishan tujea sangata veapar-dhondo kelo. Tannim tuka chandi, lokhonn, potrem* ani xinxem* diun tujem saman viktem ghetlem. 13  Javan, Tubal ani Meshekan tujea sangata veapar-dhondo kelo, ani tujea samanachea bodlek tannim tuka gulam dile ani tambeacheo vostu dileo. 14  Togarmachea ghorannean tuka tujea samanachea bodlek ghodde, khenchram* ani zhuzache ghodde dile. 15  Dedanachea lokamnim tujea sangata veapar-dhondo kelo. Tunvem zaitea zunveancher veapareank kamank laile. Tannim tuka dennem mhunn hotʼtinche dant ani khas torechem kallem lakudd* dilem. 16  Tuje koddem zaiteo vostu asat tem polloun, Edoman tujea sangata veapar-dhondo kelo. Tannim tuka peroz fator,* zambllo vul, veg-vegllea rongachi embroidderi, borem lugott, doriantle moladik fator* ani rubi fator* diun tujem saman viktem ghetlem. 17  “‘“Juda ani Izraelan tujea sangata veapar-dhondo kelo. Tannim tujea samanachea bodlek tuka Minithantle gonv, boreo-boreo jevnnacheo vostu, mhonv, tel ani balsam dilem. 18  “‘“Tuje koddem zaiteo vostu ani girestkai asa tem polloun, Damaskan tujea sangata veapar-dhondo kelo. Tujea samanachea bodlek tannim tuka Helbonantlo drakxancho soro ani Zaharantlo vul* dilo. 19  Uzal hea vattarantlea, Vedan ani Javanan tujea samanachea bodlek tuka lokhnnacheo vostu, tiki* ani vasachi boddi dili. 20  Dedanan tujea sangata ghoddeachea fattir ghalun bostat tea kopddeacho* veapar-dhondo kelo. 21  Tunvem Arbi lokank ani Kedarachea soglea mukheleank kamank dovorle, je menddurleanche, menddreanche ani bokddeanche veapari asle. 22  Sheba ani Ramachea veapareamnim tujea sangata veapar-dhondo kelo. Tujea samanachea bodlek tannim tuka soglea toreche bore cher,* moladik fator ani bhangar dilem. 23  Haran, Kane ani Eden toxench Sheba, Ashur ani Kilmadachea veapareamnim tujea sangata veapar-dhondo kelo. 24  Te tujea bazarant sobit kopdde ani nillea rongachem lugott ani veg-vegllea rongachi embroidderi kelʼlea kottancho veapar-dhondo kortale. Teach borabor veg-vegllea rongacheo karpetti ekdom bore toren doriemnim bandun haddttale ani viktale. 25  Tarshishachim tarvam tujem saman gheun bhonvtalim,Taka lagon, tum doriachea modem bhorpur vozon gheun astalem ani bhorlolem* astalem. 26  Tuje tanddeli tuka khol doriant gheun gele,Udentechea varean doriachea modem tuka foddun uddoilem. 27  Tuji girestkai, tujem saman, tuzo veapar, tuje tarvotti ani tuje tarum choloupi,Tujeo khanchi bhorun kaddpi, tuje veapari ani tuje sogle zhuzari—Tujea bhitor aslole sogle lok—Tuzo nas zatolo tea disa, doriachea modem buddon voitole. 28  Tuje tarum choloupi bob marun roddttat tednam, doria dege voile vattar thorthortole. 29  Sogle tanddeli ani tarvotti,Ap-aplea tarvantle denvon zomnicher ube ravtole. 30  Te vhoddlean bob marun ani dukhan roddttole,Te aplea mathear dhulʼl uddoun gobrant lollttole. 31  Te aple kens tastole ani sak ghaltole,Te tujea pasot dukh kortole ani vhoddlean bob marun roddttole. 32  Te tujea pasot roddttole, dukhachem git* gaitole ani oxem mhunnttole: ‘Doriachea modem vogi poddlam tea Tira sarkem konn asa? 33  Tujem saman doriantlean ietalem tednam tum zaitea desantlea lokank dhadoxi kortalem. Tuji bhorpur girestkai ani veaparak lagon prithumeche raza girest zale. 34  Punn atam tum uktea doriant, udkachea kholaient funttlam,Tujea sangata tuzo soglo veapar ani tuje lok buddleat. 35  Zunveam voile sogle lok thottakun tuka polloitole,Ani tanchea razank kampero suttʼttolo, ani tanchea tonddar bhirant sarki dison ietoli. 36  Raxttrantle veapari tuji hi poristhiti polloitole ani ojap zaun fivnneo* ghaltole. Tuzo xevott okosmat ani bhirankull ritin zatolo,Ani tuzo sasnak nas zaun voitolo.’”’”

Footnotes

^ Hem dukh kortat tea vellar gaitat toslem git.
^ Xobdhkox polloi.
^ Vo “devdar.” Eke torechem vhoddlem zhadd.
^ Inglez bhaxent “mast.”
^ Vo “xindur.” Eke torechem vhoddlem zhadd.
^ Inglez bhaxent “oar.”
^ Ek zhadd jem pine zhadda bhaxen dista.
^ Inglez bhaxent taka “linen” mhunnttat. Xobdhkox polloi.
^ Inglez bhaxent “rower.”
^ Utran utor, “zannttea.”
^ Inglez bhaxent “lead.”
^ Ek torecho dhatu. Inglez bhaxent “tin.”
^ Gaddum ani ghoddeachi sonsot. Inglez bhaxent “mule.”
^ Ek zhadd zacho bhitorlo bhag khub kallo asta. Inglez bhaxent “ebony.”
^ Inglez bhaxent “turquoise.”
^ Inglez bhaxent “corals.”
^ Ho tambddea rongacho moladik hiro.
^ Vo “ani tambddo-gobra sarkea rongacho vul.”
^ Tikichea zhaddachea familintlench ek zhadd. Inglez bhaxent “cassia.”
^ Vo “vinnun toiar kelʼlea kopddeancho.”
^ Inglez bhaxent “perfume.”
^ Vo ghoddie, “ani mhoimebhorit.”
^ Hem dukh kortat tea vellar gaitat toslem git.
^ Inglez bhaxent taka “whistle” mhunnttat.

Copyrights for this publication