Ezekiel 7:1-27
7 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Akʼkhea Vixvacho Dhoni Jehova, Izraelachea desak oxem mhunntta: ‘Xevott aila! Desachea charui konnxeancher xevott aila.
3 Tujer atam xevott aila. Hanv tujer mhozo rag votoitolom ani tujea korneam pormonnem tuji nit kortolom. Toxench, vitt haddtta tea tujea soglea kamank lagon hanv tuje koddlean hixob ghetolom.
4 Mhaka* tuji matxi pasun kakut dischina ani hanv tuka doia-maia dakhounchom na. Tujea korneam pormonnem hanv tuka farik kortolom, ani tuka tujea vitt haddtta tea kamancho porinnam bhogunk poddttolo. Tednam hanv Jehova mhunn tumkam vollkhon gheunk poddttolem.’
5 “Akʼkhea Vixvacho Dhoni Jehova oxem mhunntta: ‘Polloi! Ek odruxtt ieta. Hachea poilim kednanch ieunk na toslem odruxtt ieta.
6 Xevott ieta, to ietoloch. To tumcher okosmat ietolo. Polloi! To ieta.
7 Desant ravtoleamno, atam tumchi palli ailea.* To vell ieta, to dis lagim pavla. Porvotancher soglo gondholl asa, thoim khuxalkaiecho avaz aikonk iena.
8 “‘Hanv beginuch tujer krodhacho pelo votoitolom ani purnn toren tujer mhozo rag votoitolom ani tujea korneam pormonnem tuji nit kortolom. Toxench, vitt haddtta tea tujea soglea kamank lagon hanv tuje koddlean hixob ghetolom.
9 Mhaka* tuji matxi pasun kakut dischina ani hanv tuka doia-maia dakhounchom na. Tujea korneam pormonnem hanv tuka farik kortolom, ani tuka tujeach vitt haddtta tea kamancho porinnam bhogunk poddttolo. Tednam hanv Jehova tumkam khast ditam mhunn, tumkam vollkhon gheunk poddttolem.
10 “‘Polloi, to dis ieta! Polloi, to ieta! Tuji palli ailea.* Danddo toiar asa ani gorv vaddla.
11 Hinvsa noxtteponnacho danddo zalo. Tea uprant, te, tanchi girestkai, tanche lok, toxench tanchem vhoddponn urchem na.
12 To vell ietoloch, to dis ietoloch. Viktem ghevpean khuxal zaunchem nhoi ani vikpean dukh korchem nhoi, karonn tanchea akʼkhea zomeacher mhozo krodh pettla.*
13 Viktoleacho jiv vanchlo zalear pasun to apnnem viklea te zomni lagim porot voichona. Karonn hea dorxonant sanglolea vostuncho akʼkhea zomeacher probhav poddttolo. Konnuch porot ieunchona, ani aplea guneanvak lagon konnuch aplo jiv salvar korunk pavchona.
14 “‘Tannim turturi vazoili, ani sogle toiar zaun ravle. Punn zhuz korunk konnuch vochona, karonn akʼkhea zomeacher mhozo krodh pettla.
15 Bhair tolvar asa, ani bhitor pidda ani bhuk asa. Zo xarachea bhair asa to tolvarin mortolo ani zo xarachea bhitor asa to bhuken ani pidden mortolo.
16 Tanche modle je koxe-i bhaxen salvar zatole te porvotancher pollon voitole, ani dor eklo aplea guneanvak lagon falkeamnim ravtolea parveam bhaxen pirgotolo.
17 Tanche sogleanche hat oskot zatole ani tanchea dimie voilean udok gollttolem.*
18 Tannim sak ghatla ani te bhirantin koddkoddttat. Tankam sogleank lojek ghaltole ani dor ekleache kens tastole.*
19 “‘Te apli chandi rostear uddoitole ani tankam aplea bhangrachi vitt ietoli. Jehovachea ragachea disa tanchi chandi vo bhangar tankam salvar korunk pavchem na. Tem tankam dhadoxi korunk xokchem na vo tanchem pott bhorunk xokchem na. Karonn tim addkhollon poddonk tem* tanchea guneanvachem karonn zalam.
20 Tankam aplea sobit bhangracher khub gorv aslo ani tannim tachea* thaun vitt haddtta tosleo murteo toiar kelʼleo. Taka lagon, hanv tanchem bhangar ani chandi tanchea nodren kanttallo haddtta tosli vost kortolom.
21 Hanv hem soglem* pordexi ani sonvsarantlea noxttea lokanchea hatant ditolom. Te ieun hem luttun vhortole ani oxudʼdh kortole.
22 “‘Hanv tanchea* thaun mhojem tondd vollttolom ani te* mhozo gupit zago* oxudʼdh kortole. Luttpi tantunt ghustole ani to oxudʼdh kortole.
23 “‘Sanklleo* toiar korat, karonn akʼkho des onʼneai korun varoilʼlea rogtan bhorla ani xarant sogleak hinvsa chalu asa.
24 Hanv sonvsarantlea sogleant vaitt raxttrak hanga gheun ietolom ani tem tanchea ghorancher kobzo kortolem. Hanv xoktivont lokancho gorv kabar korun uddoitolom ani tanche povitr zage oxudʼdh zatole.
25 Te dukhan tollmollttat tednam xanti sodhtole punn tankam ti mellchina.
26 Eka-fattlean-ek tancher sonkoxttam ietolim ani tankam eka-fattlean-ek vaitt khobro aikonk mellttoleo. Provadeam koddlean dorxonam mellttolim mhunn lok vatt polloitole, punn tacho kainch faido zaunchona. Iadnik kaido xikovop* ani vhoddil solʼlo divop bond kortole.
27 Raza dukh kortolo ani mukheli niraxiponnache kopdde ghalun ravtolo, ani desantlea lokanche hat bhirantin thorthortole. Te zoxe vagle toso hanv tanchea sangata vagtolom ani tannim zoso neai kelo toso hanv tancho neai kortolom. Tednam hanv Jehova mhunn tankam vollkhon gheunk poddttolem.’”
Footnotes
^ Utran utor, “Mhojea dolleank.”
^ Vo ghoddie, “fulancho har aila.”
^ Utran utor, “Mhojea dolleank.”
^ Vo ghoddie, “Fulancho har aila.”
^ Mhunnche, zomin vikti ghevpeak toxench vikpeak faido zaunchona, karonn sogleancho nas zatolo.
^ Mhunnche, bhirantin thoinch mutʼtole.
^ Mhunnche, dukhan te aplea mathea voile kens kaddun uddoitole.
^ Mhunnche, tanchem chandi ani bhangar.
^ Mhunnche, chandi ani bhangracheo vostu.
^ Mhunnche, murteo toiar korunk uzar kortale tem tanchem chandi ani bhangar.
^ Mhunnche, Devache lok.
^ Mhunnche, dusman.
^ Hem ghoddie Jehovachea mondirachea bhov povitr bhagak suchit korta oxem dista.
^ Mhunnche, koidecheo sanklleo.
^ Vo “Iadnik suchounni divop.”
