Ezekiel 29:1-21
29 Dhavea vorsachea, dhavea mhoineachea 12-vea disa, Jehovacho sondex mhaka mellʼllo. Tannem mhunnttlem:
2 “Munxachea puta, Ejipttacho raza Faraoh vatten tujem tondd kor, ani tachea ani akʼkhea Ejiptta add hi bhasaunni kor.
3 Tum oxem mhunn: ‘Akʼkhea Vixvacho Dhoni Jehova oxem mhunntta:
“Ejipttachea raza Faraoh, hanv tujea add asam,Aplea Nil Nhoim-chea* vhallamnim lollttolea, doriantlea vhoddlea ani bhirankull prannea,Tunvem mhunnttlem, ‘Hi Nil Nhoim mhoji.
Hanvem ti mhojea pasot kelea.’
4 Punn hanv tujea daddank* gore ghaltolom ani Nil Nhoim-entlea nusteank tujea khovllank chittkaitolom.
Hanv tuka ani tujea khovllank chittkololea soglea nusteank Nil Nhoim-entlean bhair kaddttolom.
5 Hanv tuka ani tujea Nil Nhoim-entlea soglea nusteank vhoron oronnʼnneant soddttolom.
Tum uktea moidanar poddttolo, ani tujea moddeache ximpoddlole kuddke konnuch ektthaim korchona.
Hanv tuka prithume voilea zonvarank ani mollba voilea suknneak jevonn mhunn ditolom.
6 Tednam Ejipttant ravtolea sogleank hanv Jehova mhunn vollkhon gheunk poddttolem,Karonn Izraelachea ghoranneak tancho adar fokot eka suklolea tonnachea kaddie* sarko aslo.
7 Tannim tuzo hat dhorlo tednam tum chiddʼddolo,Tuka lagon tanchea bhuzak ghavo poddlo.
Modoti pasot te tuka tenkle tednam tum moddlo,Ani tuka lagon tanche paim* lokonk lagle.”
8 “‘Taka lagon, Akʼkhea Vixvacho Dhoni Jehova oxem mhunntta: “Polloi, hanv tujer ek tolvar haddttolom, ani tujea modlea munxank ani zonvarank hanv kabar korun uddoitolom.
9 Ejipttacho nas zatolo ani to padd zatolo, ani hanv Jehova mhunn tankam vollkhon gheunk poddttolem karonn tunvem* mhunnttlem, ‘Nil Nhoim mhoji. Hanvem ti toiar kelea.’
10 Tor, hanv tujea ani tujea Nil Nhoim-chea add asam. Hanv Ejiptt desacho nas korun soddttolom, taka ek suko des korun soddttolom. Migdola thaun Ethiopiechea ximer aslolea Siene poriant, hanv akʼkhea Ejipttak padd korun eka oronnʼnnea bhaxen korun soddttolom.
11 Thoim thaun munis vo gorvam-menddram pasun pasar zaunchimnant, ani 40 vorsam thoim konnuch ravchona.
12 Hanv Ejipttak, padd zaun gelʼlea desam poros anikui padd korun soddttolom, ani 40 vorsam meren tachim xaram padd zaun gelʼlea xaram poros anikui padd zaun urtolim. Hanv Ejipttkarank dusrea raxttramnim ani veg-vegllea desamnim ximpddaitolom.”
13 “‘Karonn Akʼkhea Vixvacho Dhoni Jehova oxem mhunntta: “40 vorsam uprant, veg-vegllea desamnim ximpoddlolea Ejipttachea lokank hanv porot ektthaim kortolom.
14 Hanv Ejipttachea koideank Pathrosachea desant, tanchea mull desant porot haddttolom. Ani thoim rajeam modem tanchem mhotv anik urchem na.
15 Ejiptt dusrea rajeam poros oskot zatolo ani porot kednanch dusrea raxttrancher odhikar cholounk pavchona. Hanv tancho ankddo itlo unno kortolom, ki te porot kednanch dusrea raxttrancher kobzo korunk pavchenant.
16 Izraelachem ghorannem porot kednanch modoti pasot Ejiptta koddem voichem na. Tachea bodlek, Ejiptta lagim vochon tannim kitli vhoddli chuk kelʼli tacho tankam ugddas ietolo. Ani hanv Akʼkhea Vixvacho Dhoni Jehova mhunn tankam vollkhon gheunk poddttolem.”’”
17 Uprant, 27-avea vorsachea poilea mhoineachea poilea disa, Jehovacho sondex mhaka mellʼllo. Tannem mhunnttlem:
18 “Munxachea puta, Babilonacho Raza Nebukadnezaran,* Tiracher akromonn korunk aplea fouje koddlean khub vavr korun ghetlolo. Sogle khoddʼdde zale, tanchim bhuzam solun gelim. Punn Tira lagim zhuz kortana, tannem ani tachea soinikamnim zo vavr kelo, tacho tankam kainch disvoddo mellonk na.
19 “Taka lagon, Akʼkhea Vixvacho Dhoni Jehova oxem mhunntta, ‘Atam hanv, Babilonacho Raza Nebukadnezarak* Ejiptt des ditam. To Ejipttachi sogli girestkai gheun voitolo ani taka luttʼttolo. Ho tachea foujecho disvoddo zatolo.’
20 “Akʼkhea Vixvacho Dhoni Jehova mhunntta, ‘Nebukadnezaran tacher* akromonn korunk zo vavr kelʼlo, taka lagon hanv taka Ejiptt des ditolom, karonn to mhojea pasot vavurlo.’
21 “Tea disa, hanv Izraelachea ghorannea pasot ek xing* kirlom-xem kortolom,* ani tuka tanchea modem ulounk ek sondhi ditolom, ani hanv Jehova mhunn tankam vollkhon gheunk poddttolem.”
Footnotes
^ Hea ani fuddlea versamnim “Nil Nhoim” mhunnttlear, ti nhoim ani tiche kanal.
^ Inglez bhaxent “jaw.”
^ Utran utor, “tonnachea boddie.”
^ Utran utor, “tanchim bhenddam.”
^ Utran utor, “tannem.”
^ Utran utor, “Nebukadrezar,” veglle toren boroilʼlem nanv.
^ Utran utor, “Nebukadrezar,” veglle toren boroilʼlem nanv.
^ Mhunnche, Tiracher.
^ Vo “Izraelachea ghoranneak ghottai ditolom.”
