Ezekiel 21:1-32
21 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Jeruzalema vatten tujem tondd kor ani tachea povitr zageam add kollounni kor. Izraelachea desa add bhasaunni kor.
3 Izrael desak sang, ‘Jehova oxem mhunntta: “Hanv tujea add asam. Hanv tolvar dovorpachea begantlean tolvar bhair kaddttolom ani tujea bhitor ravta tea soglea nitivont ani noxttea lokank marun uddoitolom.
4 Dokxinne thaun utʼtore meren soglea nitivont ani noxttea lokank marun uddounk, tolvar dovorpachea begantlean mhoji tolvar hanv bhair kaddttolom.
5 Tednam hanvem, Jehovan, mhoji tolvar bhair kaddlea mhunn soglea lokamnim vollkhon gheunk poddttolem. Ti porot begant voichina.”’
6 “Munxachea puta, tum* lokam mukhar bhirantin koddkoddon haskar-suskar sodd. Hoi, tanchea mukhar khub dukhi zaun pirgot rav.
7 ‘Tum kiteak pirgota?’ oxem tannim vicharlem zalear tum tankam sang, ‘Eke khobrek lagon.’ Karonn hi khobor lokank mellttolich, ani tednam sogleanchim kallzam bhirantin pigollttolim. Sogleanche hat oskot zatole, te dhir soddun ditole ani dor ekleachea dimie voilean udok gollttolem.* Akʼkhea Vixvacho Dhoni Jehova mhunntta, ‘Polloi! Oxem ghoddttolench, oxem khorench ghoddttolem.’”
8 Jehovacho sondex porot ek pavtt mhaka mellʼllo. Tannem mhunnttlem:
9 “Munxachea puta, tum hi bhasaunni kor ani oxem sang, ‘Jehova oxem mhunntta: “Tum oxem mhunn, ‘Ek tolvar! Tea tolvarik dhar kaddlea ani tika chokchokit kelea.
10 Khub lokank marun uddounk tika dhar kaddlea, zoglam marta toxi jhigjhigunk tika chokchokit kelea.’”’”
“Ami khuxal zaunchem nhoi kai?”
“‘Ti* dor eka zhaddak nakarta toxi mhojea putachea-i rajeachea danddeak* nakartoli kai?
11 “‘Hanvem ti tolvar chokchokit korunk ani uzar korunk dilea. Jivexim marun uddovpeachea hatant diunchi mhunn tea tolvarik dhar kaddlea ani chokchokit kelea.
12 “‘Munxachea puta, vhoddlean rodd, vhoddlean bob marun rodd. Karonn mhojea lokam add tolvar ailea. Izraelachea soglea mukheleam add ti ailea. Mhojea lokam sangata te pasun moron voitole. Tor tum dukhan tujea zangllacher mar.
13 Karonn mhojea lokanchi topasnni kelea, ani tolvarin rajeachea danddeak* nakarlo zalear kitem zatolem? To* sasnak kabar zatolo,’ oxem Akʼkhea Vixvacho Dhoni Jehova mhunntta.
14 “Ani tum, munxachea puta, bhasaunni kor ani tujea hatamnim talli vazoun tin pavtt, ‘Ek tolvar!’ oxem mhunn. Hi tolvar lokancho jiv gheupi, charui vatten tankam gherav ghalpi ani vhodd promannan jivexim marun uddoupi tolvar zaun asa.
15 Lokanchem kalliz bhirantin koddkoddttolem ani zaite lok xarachea darvontteam lagim poddttole. Hanv tolvarin lokancho nas kortolom. Hoi, ti zoglavnnea sarki jhigjhigta ani tika jivexim marun uddounk chokchokit kelea!
16 Uzvea vatten tuji dhar dakhoi! Dave vatten ghunv! Tuka jea vatten voicho hukum dila tea vatten voch!
17 Hanv pasun mhojea hatamnim talleo martolom ani mhozo rag kaddttolom. Hanvem Jehovan svota hem sanglam.”
18 Jehovacho sondex porot ek pavtt mhaka mellʼllo. Tannem mhunnttlem:
19 “Tum zalear, munxachea puta, Babilonachea razachi tolvar ieunchi mhunn don vatto toiar kor. Heo donui vatto ekach desantlean suru zatoleo ani jea zagear hea rosteacheo don vatto toiar zaun don xaramnim voitat thoim khunna mhunn khambo ubo korcho.
20 Tantuntlo khoincho rosto ghetlear tachi tolvar Amonitkaranchem xar Rabant voitoli, ani khoincho rosto ghetlear Judachem ghott durgam aslolem xar Jeruzalemant voitoli tem kollonk tum khunna ubi korun dovor.
21 Karonn jea zagear te don roste veglle zatat tea zagear Babilonacho raza ieun ravtolo ani fuddar parkhupea koddem khoincho rosto gheuncho tem vichartolo. To aple bann haloitolo, aplea murteam* koddlean solʼlo ghetolo ani zonvarachem figd* topastolo.
22 Tachea uzvea hatant asloli fuddar parkhupachi vost, xara bhonvtonnim durgam moddun uddoitat toslim vhoddlim sadonam ubim korunk, jivexim marun uddouncho hukum diunk ani zhuzachi kollounni korunk Jeruzalemachi vatt dakhoitoli. Toxench, xarache darvontte moddun uddoitat toslim vhoddlim sadonam ubim korunk, akromonn korunk durgam bhonvtonnim choddtti toiar korunk, ani gherav ghalunk durig bandunk Jeruzalemachi vatt dakhoitoli.
23 Zannim* soput dilʼlo tankam hi parkhupachi vost khotti koxi distoli. Punn to tanche guneanv ugddas kortolo ani tankam koidi korun vhortolo.
24 “Taka lagon, Akʼkhea Vixvacho Dhoni Jehova oxem mhunntta: ‘Tumi tumche guneanv sogleam mukhar ugddape korun ani tumchea soglea kamamnim tumchim patkam dakhoun diun, tumchech oprad ugddasak haddleat. Atam tumcho ugddas kela dekhun tumkam forsan* voddun vhortole.’
25 “Boroch mar laglolea Izraelachea noxttea mukhelea, tuzo dis aila, tujea xevottachea khasticho vell aila.
26 Akʼkhea Vixvacho Dhoni Jehova oxem mhunntta: ‘Tuzo munddaso* kadd ani tuzo mukutt kadd. Hem aslem toxench urchem na. Sokol asa taka voir kadd ani voir asloleak sokol denvoi.
27 Hanv nas kortolom! Hoi, nas kortolom! Hanv nas kelea bogor ravchom na! Mukutt mellonk kaidea pormonnem zaka hokʼk asa, to ailea bogor, to mukutt konnankuch mellchona. To ietolo tednam hanv taka to ditolom.’
28 “Ani tum, munxachea puta, hi bhasaunni kor ani oxem sang, ‘Akʼkhea Vixvacho Dhoni Jehova Amonitkaram vixim ani te kortat tea opmanachea utram vixim oxem mhunntta.’ Tankam sang, ‘Ek tolvar! Lokank jivexim marunk ek tolvar bhair kaddlea. Jivexim marun uddounk ani zoglam sarki jhigjhigunk, tika chokchokit kelea.
29 Tumchea vixim khottim dorxonam polloileant ani khotteo bhasaunneo keleat. Tori astana, marun uddoilʼlea lokanchea moddeanchea* raxicher tuka uddoitole. Tea noxttea lokanchea raxicher zancho dis aila, zanchea xevottachea khasticho vell aila.
30 Tolvar begant porot dovor. Jea desant tuka rochlolo, jea desant tuji survat zalʼli thoinch hanv tuzo neai kortolom.
31 Hanv tujer mhozo ragacho pelo votoitolom. Hanv tujer mhozo uzo funktolom ani marun uddounk huxar asat toslea doia-maia naslolea lokanchea hatant hanv tuka ditolom.
32 Tum ujeant ghaltat to zollov zatolo, desant tujem rogot vhanvon vetolem ani konnankuch tuzo ugddas urchona, karonn hanvem Jehovan svota hem sanglam.’”
Footnotes
^ Utran utor, “tujem bhendd.”
^ Mhunnche, bhirantin thoinch mutʼtole.
^ Mhunnche, Jehovachi tolvar.
^ Vo “putacho-i rajdondd.” Xobdhkox polloi.
^ Vo “tolvarin rajdondd.” Xobdhkox polloi.
^ Vo “Rajeacho danddo.”
^ Utran utor, “terafim murteam.”
^ Inglez bhaxent taka “liver” mhunnttat.
^ Mhunnche, Jeruzalemant ravpi lok.
^ Utran utor, “hatak dhorun.”
^ Vo “Tuji pogddi.”
^ Utran utor, “lokanchea gomttenchea.”
