Ezekiel 41:1-26
41 Tea uprant to mhaka Devmondirachea povitr zagea voilea bhailea rumant* gheun ailo. Tannem tea rumachea donui vatten, uzve ani dave vatten aslolea khambeanchem zokh kaddlem. Dor ek khambo sov hat* rund aslo.
2 Hea rumant bhitor sortat ti vatt dha hat rund asli ani bhitor sortat thoim uzvea ani davea vatten aslole khambe panch hat rund asle. Uprant tannem povitr zago mezlo, tachi lambai 40 hat ani rundai 20 hat asli.
3 Uprant to bhitor* gelo ani tannem bhitor sorchea vatte voilea eka khambeachem zokh ghetlem. Te don hatam itle datt asle ani tachi rundai sat hat asli. Tachea bhitor sorchea vattechea kuxik asloleo vontteo sov hat rund asleo.
4 Uprant tannem povitr zagea bhair aslolea rumachem zokh kaddlem. Tachi lambai 20 hat ani rundai 20 hat asli. Tannem mhaka mhunnttlem: “Ho Bhov Povitr zago zaun asa.”
5 Uprant tannem Devmondirachea vonttichem zokh kaddlem. Tem sov hatam itlem datt aslem. Devmondirachea charui vatten rum asle ani dor ek rum char hat rund aslo.
6 Thoim tin mallio asleo, jeo eka-meka voir asleo ani dor eka mallier 30 rum asle. He rum charui vatten aslolea vonttichea adaran ghott asle. Taka lagon, tanchea adarak aslole vanxe Devmondirachea vonttimnim ghusounk nasle.
7 Devmondirachea donui vatten voilea rumam koddem vochonk panvdde* asle, je voir voita toxe rundd zait asle. Sokoile mallie poros modle mallie voile rum rund asle, ani modle mallie poros voile mallie voile rum rund asle.
8 Devmondirachea sorvbhonvtonnim hanvem ek unch manchi polloili, zacher mondirache donui vatten aslole rum bandlole. Tea manchiechi unchai, zomni thaun voilea konnxea meren sov hatanchea akʼkhe boddie itli asli.
9 Rumachea bhailea vonttichi rundai panch hatam itli asli. Tea rumanchea kuxichean ek ukto zago* aslo, zo mondirachoch bhag aslo.
10 Devmondir ani jevpachea rumam modem sogle vatten 20 hat rund zago aslo.
11 Devmondirachea kuxichea rumam modem ani uktea zagea modem, utʼtore vatten bhitor sorchi ek vatt asli. Ani oslich bhitor sorchi vatt dokxinne vatten pasun asli. Devmondirachea sorvbhonvtonnim aslolea uktea zageachi rundai panch hat asli.
12 Jem bildding ostome vatten uktea zageak tondd korun aslem, tem 70 hat rund ani 90 hat lamb aslem. Tea bilddingechea sorvbhonvtonnim asloli vonott panch hatam itli datt asli.
13 Tannem Devmondir mezlem ani tachi lambai 100 hat asli. Tea uktea zageachi, tea bilddingechi* ani tachea vontteanchi lambai pasun 100 hat asli.
14 Udente vatten tondd korun aslolea Devmondirachea fuddlea bhagachi rundai ani uktea zageachi rundai 100 hat asli.
15 Tannem fattle vatten aslolea uktea zageak tondd korun aslolea bilddingechi lambai ani tachea borabor tannem tachea donui vatten asloleo galeri pasun mezleo. Tem soglem 100 hat aslem.
Tannem povitr zageacho bhailo rum, bhitorlo rum ani angnnant aslole bolkanv pasun mezle.
16 Tachea borabor, tannem tea tinui zageancher aslolea umbreanchem, oxir zonelanchem ani galerinchem zokh ghetlem. Umbrea lagim, zomnir thaun zonelam meren lakddacheo pottʼtteo asleo, ani tim zonelam dhamplolim aslim.
17 Tannem bhitor sorchea vattecho voilo bhag, Devmondiracho bhitorlo ani bhailo bhag, ani sorvbhonvtonnim asloli vonott mezli.
18 Tacher kerubinchim ani khazurachea zhaddachim chitram kantoilʼlim aslim. Dor eka zagear don kerubim modem ek khazurachea zhaddachem chitr kantoilʼlem aslem ani dor eka kerubik don tonddam aslim.
19 Ek tondd munxachem ani ek tondd xinvachem* aslem. Munxachem tondd eke vatten aslolea khazurachea zhaddak fuddo korun aslem, ani xinvachem tondd dusre vatten aslolea khazurachea zhaddak fuddo korun aslem. Akʼkhea Devmondirant tim heach toren kantoilʼlim aslim.
20 Devmondira bhitor sortat tea vatter aslolea vontticher, zomnir thaun voir meren kerubinchim ani khazurachea zhaddachim chitram kantoilʼlim aslim.
21 Devmondirache darvontte* choukoni asle. Povitr zagea* mukhar oxem kitem tori aslem
22 jem eka lakddachea vedi sarkem aslem. Tachi unchai tin hat ani lambai don hat asli. Taka char konnxe asle, ani tacho sokoilo bhag* ani tachea kuxiche bhag lakddache asle. Uprant tannem mhaka mhunnttlem: “Hem Jehova mukhar asta tem mez.”
23 Devmondirachea povitr zageak ani Bhov Povitr zageak don-don darvontte asle.
24 Hea darank don zodde* asle, dor eka darak don-don zodde asle.
25 Vonttincher aslem toxem Devmondirachea darancher pasun kerubinchim ani khazurachea zhaddachim chitram kantoilʼlim aslim. Bolkanvachea bhair, fuddlea vatten lakddachi ek pakhatti* asli.
26 Bolkanvachea donui vatten, toxench Devmondirachea kuxik aslolea rumamnim ani lakddachi pakhatti asli thoim, oxir zonelam ani khazurachea zhaddachim chitram pasun aslim.
Footnotes
^ Utran utor, “Devmondir.” Odheai 41 ani 42-ant hea utracho orth povitr zageacho bhailo bhag (Povitr zago) vo akʼkho povitr zago (Devmondir zantunt Povitr ani Bhov Povitr zago mellon asa).
^ Hem lamb hatachea mapak suchit korta. Mahiti B14 polloi.
^ Mhunnche, povitr zageachea bhitorlea bhagant, vo Bhov Povitr zagear.
^ Chodd korun gol ritin bandlole panvdde.
^ Chodd korun hi mondirachea sorvbhonvtonnim cholon vochonk asloli barik vatt zaun asa.
^ Mhunnche, povitr zageachea ostome vatten aslolem bildding.
^ Vo “tornattea xinvachem.”
^ Utran utor, “darvontto.” Ho chodd korun Povitr zageachea bhitor sorchea vattek suchit korta.
^ Chodd korun ho Bhov Povitr zago.
^ Utran utor, “tachi lambai.”
^ Inglez bhaxent “leaves.”
^ Inglez bhaxent “canopy.”
