Ezekiel 28:1-26
28 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Tirachea fuddareak sang, ‘Akʼkhea Vixvacho Dhoni Jehova oxem mhunntta:
“Tujem kalliz gorvan fulʼlam dekhun tum oxem mhunnot ravta, ‘Hanv ek dev.
Hanv doriachea modem eka devachea xinvasonar bosla.’
Punn tum ek dev oxem tuka dista zalear pasun,Tum fokot ek munis zaun asa, dev nhoi.
3 Polloi! Tum svotak, Daniela poros chodd zannvaiecho mhunn somzota.
Tujea thaun kosloch gutt liplolo na oxem tuka dista.
4 Tum tujea zannvaien ani somjikaien khub girest zala,Ani tum tujea bhanddaramnim bhangar ani chandi ektthaim korit ravta.
5 Tunvem tuji kola uzar korun ekdom bore toren veapar-dhondo kelo ani bhorpur girestkai ektthaim keli,Ani tujea girestkaiek lagon tujem kalliz gorvan fulʼlam.”’
6 “‘Taka lagon, Akʼkhea Vixvacho Dhoni Jehova oxem mhunntta:
“Tum tujea kallzant svotak apunn ek dev mhunn somzota dekhun,
7 Hanv pordexiank, raxttrantlea sogleant krur lokank tujea add haddttam,Tunvem tujea zannvaien melloun ghetlolea soglea sobit vostum add te apli tolvar uzar kortole.
Ani tujem mhoimebhorit vorteponn boxttaitole.
8 Te tuka sokol fonddant* uddoitole,Ani uktea doriachea modem bhirankull toren tuzo xevott zatolo.
9 Tori astana, ‘Hanv ek dev,’ oxem tuka jivexim martoleak tum mhunnttolo kai?
Tuka oxudʼdh kortoleachea hatant tum fokot ek munis zaun astolo, dev nhoi.”’
10 ‘Sunot korunk naslolea lokam bhaxen, tuka pordexi lokanchea hatant moronn ietolem,Karonn hanvem svota hem sanglam,’ oxem Akʼkhea Vixvacho Dhoni Jehova mhunntta.
11 Jehovacho sondex porot ek pavtt mhaka mellʼllo. Tannem mhunnttlem:
12 “Munxachea puta, Tirachea raza vixim ek dukhachem git* mhunn ani taka sang, ‘Akʼkhea Vixvacho Dhoni Jehova oxem mhunntta:
“Poripurnntaiechem tum ek udharonn aslo,Tum zannvaien bhorlolo aslo ani tuji sobitkai poripurnn asli.
13 Tum Devache bagent, Eden bagent aslo.
Tuka soglea torechea moladik fatramnim nettoilʼlo—Rubi, topaz ani jasper, krisolaitt, onix ani jedd, safair, peroz, ani emerald.*
Ho dor ek fator bhangracher bosoilʼlo aslo.
Tuka rochlo teach disa te toiar kelʼle.
14 Hanvem tuka makhlo ani rakhonn korpi kerub mhunn nemlo.
Tum Devachea povitr porvotar aslo, ani tum zollttea fatram modem bhonvtalo.
15 Tuka rochlolo tea disa thaun tujeo sogleo vatto chuki vinnem asleo,Tujea bhitor onitivontponn mellʼllem tea disa poriant tum chuki vinnem aslo.
16 Tujea bhorpur veapar-dhondeak lagon,Tum hinvsen bhorlo ani patok korunk laglo.
Taka lagon, tum oxudʼdh mhunn hanv tuka Devachea porvota voilo bhair martolom ani tuzo nas kortolom.Rakhonn korpi keruba, zollttea ujeachea fatram modlean hanv tuka pois xevttun uddoitolom.
17 Tujea sobitkaiek lagon tujem kalliz gorvixtt zalem.
Tujea mhoimevont vorteponnak lagon tunvem tuji zannvai broxtt keli.
Hanv tuka sokol prithumer xevttitolom.
Hanv tuka razam mukhar uddoitolom, jea vorvim te tuka kitem ghoddlam tem polloitole.
18 Tujea vhodd guneanvak lagon, ani tunvem dusreank fosoun kelʼlea veapar-dhondeak lagon, tunvem tuje povitr zage oxudʼdh kele.
Hanv tujea modem uzo pettoitolom ani to uzo tuzo bhosm kortolo.
Prithumer tuka polloitolea sogleam mukhar hanv tuzo gobor korun uddoitolom.
19 Veg-vegllea desantle sogle lok je tuka vollkhotale, te thottakun tuka polloit ravtole.
Tuzo xevott okosmat ani bhirankull ritin zatolo,Ani tuzo sasnak nas zaun voitolo.”’”
20 Jehovacho sondex porot ek pavtt mhaka mellʼllo. Tannem mhunnttlem:
21 “Munxachea puta, tujem tondd Sidona vatten kor ani tachea add bhasaunni kor.
22 Tum oxem sang, ‘Akʼkhea Vixvacho Dhoni Jehova oxem mhunntta:
“Sidona, hanv tujea add asam ani tujea modem mhaka mhoima mellttoli.Hanv tuji zhoddtti korun tuka khast ditolom, ani tuje vorvim hanv ek povitr Dev mhunn dakhoun ditolom tednam, hanv Jehova mhunn lokank vollkhon gheunk poddttolem.
23 Hanv Sidonant pidda dhaddttolom ani tachea rosteancher rogot vhanvtolem.
Tachea add soglea vattamnim tolvar ietoli tednam tachea modem zaite lok moron poddttole,Ani hanv Jehova mhunn tankam vollkhon gheunk poddttolem.
24 “‘“Tea uprant, kantteanchim zhaddam ani toptat tosle kantte, mhunnche Izraelachea ghoranneacho dves korta toslim raxttram, porot kednanch tankam gherav ghalchimnant. Ani hanv Akʼkhea Vixvacho Dhoni Jehova mhunn lokank vollkhon gheunk poddttolem.”’
25 “‘Akʼkhea Vixvacho Dhoni Jehova oxem mhunntta: “Hanvem Izraelachea ghoranneak ximpddailʼlim tea veg-vegllea desam thaun hanv tankam porot ektthaim kortolom tednam, tankam uzar korun soglea raxttranchea nodre mukhar hanv ek povitr Dev mhunn dakhoun ditolom. Ani te tanchea desant ravtole, zo hanvem mhozo sevok Jakobak dilʼlo.
26 Te thoim surokxit ravtole, ghoram bandtole ani drakxanche molle roitole. Tanchea bhonvtonnim ravtolea sogleanchi, mhunnche tancho dves kortat tanchi hanv zhoddtti kortolom ani tankam khast laitolom tednam, te surokxit jietole. Ani hanv tancho Dev Jehova mhunn tankam vollkhon gheunk poddttolem.”’”
