Ezekiel 5:1-17
5 “Tum zalear, munxachea puta, tujea pasot ek dharechi tolvar ghe ani mhaleachea* vakora bhaxen ti uzar kor. Ti gheun tuje tokleche kens tas ani khadd kadd. Magir tum tuje taslole kens zokhunk ek tagddi ghe ani tache tin vantte kor.
2 Xarache veddo ghalpache dis somplea uprant tum tujea kensancho ek vantto ujeant lasoun uddoitolo. Uprant, tum tujea kensancho dusro vantto gheun, to tum xara* bhonvtonnim tolvarin katortolo ani tisro vantto tum varear ximpddaitolo. Ani hanv ek tolvar gheun tachea fattik lagtolom.
3 “Tujea tisrea vantteantle thodde kens gheun, te tunvem ghatlolea kopddeak guttlaun dovrunk zai.
4 Uprant tea vantteantle anik thodde kens gheun ujeant ghal ani te purnn toren lasoun uddoi. Hoch uzo Izraelachea soglea ghoranneak posortolo.
5 “Akʼkhea Vixvacho Dhoni Jehova oxem mhunntta: ‘Hem Jeruzalem zaun asa. Tachea bhonvtonnim aslolea raxttram modem hanvem taka dovorlam.
6 Punn tem mhojea nitichea nirnnoi-am ani mhojea kaideam add gelam ani tannem bhonvtonnchea raxttram ani desam poros chodd noxttim kamam keleant. Tachea lokamnim mhoje nitiche nirnnoi nakarle ani te mhojea kaideam pormonnem cholonk nant.’
7 “Taka lagon, Akʼkhea Vixvacho Dhoni Jehova oxem mhunntta: ‘Tujea bhonvtonnim aslolea soglea raxttram poros tum chodd vaitt toren vaglem ani tum mhojea kaideam pormonnem cholonk na vo tunvem mhoje nitiche nirnnoi pallunk nant. Tachea bodlek, tunvem tujea bhonvtonnchea soglea raxttranche nitiche nirnnoi pallʼlle.
8 Taka lagon, Akʼkhea Vixvacho Dhoni Jehova oxem mhunntta: “Ago xara, hanv tujea add asam. Hanv svota soglea raxttram mukhar tuji zhoddtti kortolom.
9 Tunvem kelʼlea soglea vitt haddtta toslea kamank lagon, hanvem aiz poriant korunk na ani fuddem kednanch korchom na toxi hanv tuji poristhiti korun soddttolom.
10 “‘“Tujea modem aslole bapui aplea putanchem mas khatole, ani put aplea bapainchem mas khatole. Hanv tujea lokank khast ditolom ani je vanchon urtole tankam soglea vatten* ximpddaun uddoitolom.”’
11 “Akʼkhea Vixvacho Dhoni Jehova mhunntta, ‘Tunvem mhozo povitr zago, kanttallo haddtta toslea murteamnim ani vitt haddtta toslea tujea soglea kamamnim oxudʼdh kela. Taka lagon, hanv mhojea jivacho soput gheun sangtam, hanv-ui tuka nakartolom. Mhaka* tuji matxi pasun kakut dischina ani hanv tuka doia-maia dakhounchom na.
12 Tujea lokancho tisro vantto pidden* mortolo vo bhuk poddon kabar zaun voitolo. Anik ek tisro vantto tujea bhonvtonnim tolvarin moron poddttolo. Ani urlolo tisro vantto, hanv soglea vatten* ximpddaun uddoitolom. Ani hanv tolvar gheun tanchea fattik lagtolom.
13 Tednam mhozo rag xant zatolo, mhozo krodh unno zatolo ani mhaka dhadosponn mellttolem. Hanv mhozo krodh tancher votoun tankam khast laitolom tednam hanv Jehova hem uloilʼlom mhunn tankam vollkhon gheunk poddttolem. Karonn tannim fokot mhojich bhokti korchi mhunn hanv opekxa kortam.
14 “‘Hanv tuka padd korun uddoitolom ani bhonvtonnchea raxttram modem tuzo opman zatolo ani tujea koddlean voita to dor eklo tujim fokannam kortolo.
15 Hanv ragan ani krodhan bhoron tuji zhoddtti kortolom ani tuka khor khast ditolom tednam, bhonvtonnchim soglim raxttram tuka polloun hanstolim ani tuji fokannam kortolim. Tum tanchea pasot ek xittkaunni koxem zatolem, ani tujem nisontton polloun tim samkim thottaktolim. Hanvem Jehovan, hem sanglam.
16 “‘Tancho nas korunk, hanv tancher moronn haddtta tosle bhukeche bann soddttolom. Hanv tumcher soddttolom te bann tumcho nas korun uddoitole. Hanv jevnnachem itlem unnemponn haddttolom* ki bhuk poddon poristhiti anikui paxtt zatoli.
17 Hanv tumchea modem bhuk posraitolom ani bhirankull ranvotti zonvarank dhaddttolom. Ani tim tujea bhurgeank tuje koddlean kaddun ghetolim. Piddek lagon ani rogot varoilolean tujean anik sosunk zaina oxem zatolem, ani hanv tujea add ek tolvar dhaddttolom. Hanvem Jehovan, hem sanglam.’”
Footnotes
^ Inglez bhaxent “barber.”
^ Utran utor, “tachea.”
^ Utran utor, “soglea varear,” mhunnche, varem marta tea dor eke vatten.
^ Utran utor, “Mhojea dolleank.”
^ Vo “duensan.”
^ Utran utor, “soglea varear,” mhunnche, varem marta tea dor eke vatten.
^ Utran utor, “Hanv tumchea unddeacho dor ek danddo moddun uddoitolom.” Ho ghoddie unddo lamboupachea danddeak suchit korta.
