Ezekiel 10:1-22
10 Hanv polloitalom tednam kerubinchea tokle voir kancheche zomnir, safair fatra* bhaxen kitem tori mhaka dislem. Tem pollounk eka xinvasona bhaxen distalem.
2 Uprant mov lugttache kopdde* ghatlolea munxak Devan mhunnttlem: “Kerubinchea sokol ghunvta tea rodham* modem voch, ani kerubinchea modlean zolltte inglle tujea donui hatamnim gheun te xaracher uddoi.” Tednam to munis tea rodham modem gelo tem hanvem polloilem.
3 To munis rodham modem gelo tednam kerub Devmondirachea uzvea vatten ube asle, ani Devmondirachem bhitorlem angonn kupan bhorlolem.
4 Tednam kerubincher asloli Jehovachi mhoima tancher thaun Devmondirachea darachea umbrea koddem aili. Devmondir sovka-sovkas kupan bhorlem ani akʼkhem angonn Jehovachea mhoimechea porzollan bhorlem.
5 Kerubinchea pakhotteancho avaz bhailea angnna meren aikonk ietalo. Tancho avaz Sorvxoktivont Dev uloita tea avaza bhaxen aslo.
6 Uprant Devan mov lugttache kopdde ghatlolea munxak hi adnea dili: “Ghunvta tea rodham modlean ani kerubim modlean thoddo uzo ghe.” Tednam to munis thoim gelo ani rodham lagim ubo ravlo.
7 Uprant, kerubim modlea eklean tanchea modem aslolea ujea vatten aplo hat fuddem korun, thoddo uzo ghetlo ani mov lugttache kopdde ghatlolea munxachea donui hatancher dovorlo. To uzo gheun to munis bhair sorlo.
8 Kerubinchea pakhotteam ponda munxachea hatam sarkem kitem tori distalem.
9 Hanv polloitalom tednam, hanvem kerubinchea kuxin char rodham polloilim. Dor eka kerubichea kuxik ek rodh aslem, ani him rodham krisolaitt hirea* bhaxen chokchoktalim.
10 Tim charui rodham ek-sarkinch distalim, ani polloitana eka rodha bhitor anik ek rodh bosoilam oxem distalem.
11 Tim rodham khoinchea-i vatten voitalim tednam, tim vollonastana vochonk xoktalim. Karonn kerubinchem tondd jea vatten astalem, tea vatten tim vollonastana voitalim.
12 Kerubinchi akʼkhi kudd, tanchi fatt, tanche hat ani tanche pakhotte soglech dolleamnim bhorlole asle. Toxench, tanchea kuxik jim char rodham aslim tancher sogleak dolle asle.
13 Uprant hanvem ek avaz aikolo zo rodhank oxem mhunnon ulo kortalo, “Ghunvtolea rodhamno!”
14 Dor eka pranneak* char tonddam aslim. Poilem tondd kerubichem, dusrem munxachem, tisrem xinvachem ani chovtem tondd ghonnichem aslem.
15 He kerub tech jive pranni asle, zankam hanvem Kebar nhoim-e lagim polloilole. Te voir voitale
16 ani fuddem voitale tednam tanchea sangata rodham-i voitalim. Ani prithume thaun voir uddonk, kerub aple pakhotte voir kaddttale tednam pasun, rodham dusre koddem vollonaslim vo kerubim thaun pois vochonaslim.
17 He jive pranni thambtale tednam tanchea sangata rodham-i thambtalim, ani te voir voitale tednam tanchea sangata rodham-i voir voitalim. Karonn ji xokti jivea pranneancher kam kortali, tich xokti tancher pasun asli.
18 Magir Jehovachi mhoima Devmondirachea darachea umbrear thaun kerubincher vochon ravli.
19 Hanv polloitalom tednam, kerub aple pakhotte voir kaddun prithumer thaun voir uddttat tem mhaka dislem. Kerubinchea sangata rodham-i voir vochonk laglim. Te vochon Jehovachea mondirachea udentechea darvonttea lagim, bhitor sortat thoim ravle, ani Izraelachea Devachi mhoima tancher asli.
20 He tech jive pranni asle, zankam hanvem Kebar nhoim-e lagim Izraelachea Devachea xinvasonachea sokol polloilʼle. Taka lagon, te kerubuch asle mhunn mhaka kollon ailem.
21 Charui kerubink char tonddam ani char pakhotte asle, ani tanchea pakhotteam ponda munxachea hatam sarkem kitem tori distalem.
22 Tanchim tonddam hanvem Kebar nhoim-e lagim polloilʼlea pranneanchea tonddam sarkim aslim. Te fuddem voitale tednam nitt fuddem voitale.
