Ezekiel 44:1-31
44 To porot mhaka, udente vatten fuddo korun aslolea povitr zageachea bhailea darvonttea lagim gheun ailo, ani to darvontto bond aslo.
2 Uprant Jehovan mhaka mhunnttlem: “Ho darvontto bonduch urtolo. To ukto korchenant ani khoinchoch munis tea darvontteantlean bhitor sorchona. Karonn Izraelacho Dev Jehova, tea darvontteantlean bhitor sorla, tor to bonduch uronk zai.
3 Punn mukheli, tea darvonttea bhitor Jehova mukhar unddo khaunk bostolo, karonn to ek mukheli zaun asa. To darvontteachea bolkanva thaun bhitor sortolo ani tantuntlean bhair voitolo.”
4 Uprant, to mhaka utʼtorechea darvontteantlean Devmondirachea fuddle vatten gheun ailo. Hanvem polloilem tednam, Jehovachem mondir Jehovachea mhoimen bhorlolem mhaka dislem. Tor hanv zomnir umto poddlom.
5 Tednam Jehovan mhaka mhunnttlem: “Munxachea puta, dhean di. Jehovachea mondirachea nem-kaideam vixim hanv tuka sangtam teo sogleo vostu aik ani hanv tuka dakhoitam tem soglem bariksannen polloi. Devmondirachea bhitor sorchea vattecher ani povitr zagear thaun bhair sorchea soglea vattencher bariksannen dhean di.
6 Add vochpi Izraelachea ghoranneachea lokank tunvem oxem sangonk zai, ‘Akʼkhea Vixvacho Dhoni Jehova oxem mhunntta: “Izraelachea ghoranneachea lokamno, atam puro! Tumchim vitt haddtta toslim kamam chodd zaleant.
7 Kallzachi ani kuddichi sunot korunk naslolea pordexiank tumi mhojea povitr zagear bhitor haddttat tednam, te pordexi mhojem Devmondir boxttaitat. Eke vatten tumi mhaka unddo, chorbi ani rogot bhettoitat, ani dusre vatten tumchim soglim vitt haddtta toslim kamam korun mhozo korar moddttat.
8 Tumi mhojea povitr vostunchi kallji gheunk na. Tachea bodlek, mhojea povitr zagea voilim kamam korunk tumi dusreank nemtat.”’
9 “‘Akʼkhea Vixvacho Dhoni Jehova oxem mhunntta: “Kallzachi ani kuddichi sunot korunk naslolea, Izraelant ravpi khoincheach pordexian mhojea povitr zagear bhitor sorchem nhoi.”’
10 “‘Kanttallo haddtta toslea tanchea murteam* fattlean vochonk Izrael mhojea thaun pois gelo tednam, je Levit mhojea thaun pois gele tankam aplea guneanvancho porinnam bhogcho poddttolo.
11 Mhojea povitr zageache sevok zaun te Devmondirachea darvontteanchi dekhrekh kortole, ani Devmondirant seva kortole. Te hulpailʼli bhett ani lokam pasot bolidan mhunn bhettounk haddlolea zonvarank jivexim martole, ani lokanchi seva korunk te tanchea mukhar ube ravtole.’
12 Akʼkhea Vixvacho Dhoni Jehova oxem mhunntta, ‘Tea Levitamnim kanttallo haddtta toslea murteam mukhar lokanchi seva keli. Hea toren, te Izraelachea ghorannea pasot ek addkholltta toslo fator zale, zaka lagon Izraelachea ghorannean patok kelem. Tor hanvem tanchea add mhozo hat ubarun soput ghetla ki te tanchea guneanvacho porinnam bhogtole.
13 Mhoje iadnik mhunn mhoji seva korunk te mhojea mukhar ieunchenant, vo mhojea khoincheach povitr vo bhov povitr vostum lagim te voichenant. Tannim kelʼlea vitt haddtta toslea kamank lagon tankam loz bhogchi poddttoli.
14 Punn thoim kortat tea sevechi ani thoinchea soglea kamachi dekhrekh korunk, hanv Devmondirachi zobabdari tanchea hatant ghaltolom.’
15 “Akʼkhea Vixvacho Dhoni Jehova oxem mhunntta, ‘Punn Levi kullantle iadnik, Zadokachea putam vixim sangchem zalear, te mhojea mukhar ieun mhoji seva kortole, ani mhojea mukhar ube ravon te mhaka chorbi ani rogot bhettoitole. Karonn Izraelitkar mhojea thaun pois gele tednam pasun, tannim mhojea povitr zagear ap-apleo zobabdareo samballʼlleo.
16 Hech mhojea povitr zagear bhitor sortole, mhoji seva korunk mhojea meza lagim ietole ani mhojea babtint asloleo tancheo zobabdareo te samballttole.
17 “‘Te bhitorlea angnnachea darvontteantlean bhitor sortat tednam, tannim mov lugttache kopdde* ghalunk zai. Bhitorlea angnnachea darvontteant vo tachea bhitor seva kortana, tannem vulache koslech kopdde ghalche nhoi.
18 Tannim aplea tokler mov lugttachea kopddean kelʼle munddaxe* ghalunk zai, ani aplem bhendd dhampunk dhompram itlem pentt* ghalunk zai. Gham ieunk xokta tosle koslech kopdde tannim ghalche nhoi.
19 Bhailea angnnant lok astat thoim voichea poilim, tannim apnnem Devmondirant seva kortana ghatlole kopdde kaddunk zai, ani te jevnnachea povitr rumamnim* dovrunk zai. Uprant tannim dusre kopdde ghalunk zai, jea vorvim te aplea kopddeam udexim apli povitrtai dusreank diunchenant.
20 Tannim aplea tokleche kens tasche nhoi, vo aplea tokleche kens lamb zaunk diunche nhoi. Tannim aplea tokleche kens barik katrunk zai.
21 Iadnikamnim bhitorlea angnnant voichea poilim drakxancho soro pieuncho nhoi.
22 Tannim eke vidvek vo divors zalʼlea bailek apli bail korun gheunchi nhoi. Punn tannim Izrael lokanchea sonstintlea eka ankvar cheddva lagim vo eka iadnikachea vidve lagim kazar zaunk zata.’
23 “‘Tannim mhojea lokank povitr ani sadea vostum modem aslolea ontora vixim xikounn diunk zai. Toxench, tannim tankam oxudʼdh ani xudʼdh vostum modem aslolo ontor xikounk zai.
24 Kesichea vellar tannim neai korpi zaunk zai, mhojea nitichea nirnnoi-am pormonnem tannim nirnnoi gheunk zai. Tannim mhojea soglea porbam vixim aslole nem-kaide pallunk zai, ani mhoje sabath povitr dovrunk zai.
25 Tannim konnancheach moddea lagim voichem nhoi, na zalear te oxudʼdh zatole. Punn tancho bapui, avoi, put, dhuv, bhav vo ankvar bhoinn meli zalear, tannim thoim vochon oxudʼdh zaunk zata.
26 Ani to iadnik xudʼdh zalea uprant, tannem sat dis poriant ravonk zai.
27 To seva korunk bhitorlea angnnant, povitr zagear voita tea disa, tannem aplea patka pasot bhett bhettounk zai,’ oxem Akʼkhea Vixvacho Dhoni Jehova mhunntta.
28 “‘Hem tanchem daiz: Hanv tanchem daiz zaun asam. Tumi tankam Izraelant kosloch vantto diuncho nhoi, karonn hanv tanchea daizacho vantto zaun asam.
29 Daneachi bhett, patka pasot bhett ani farikponnachi bhett khatole te hech zaun asat. Ani Izraelant somorpit kelʼli dor ek vost tanchi zatoli.
30 Tumchea piklolea sogleant borea poilea follancher ani tumchim sogle torechim denngim iadnikanchim zatolim. Toxench, tumchea poilea pikechem sogleant poilim dollun haddlolem pitt tumi iadnikank diunk zai. Oxem kelolean tumchea ghoranneank besanvam mellttolim.
31 Moron poddlolem ani pinzun kuddkean-kuddke korun uddoilʼlem khoinchem-i suknnem vo zonvar mellʼllem zalear, iadnikamnim tem khaunchem nhoi.’
