Ezekiel 35:1-15
-
Seirachea porvotam vixim bhasaunni (1-15)
35 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Seirachea dongri vattara vatten tujem tondd kor ani tachea add bhasaunni kor.
3 Taka sang, ‘Akʼkhea Vixvacho Dhoni Jehova oxem mhunntta: “Seirachea dongri vattara, hanv tujea add asam, ani hanv tujea add mhozo hat ubartolom ani tuka padd korun soddttolom.
4 Hanv tujim xaram padd korun soddttolom ani tum samko osadd zatolo. Ani hanv Jehova mhunn tuka vollkhon gheunk poddttolem.
5 Karonn tunvem sodanch Izraelitkaram sangata dusmankai keli. Te trasant asle ani tankam xevottachi khast mellchi asli tednam tunvem tankam tolvarichea tabeant dile.”’
6 “Akʼkhea Vixvacho Dhoni Jehova oxem mhunntta, ‘Taka lagon, hanv mhojea jivacho soput gheun sangtam, hanvem tuka marun uddounchi toiari kelea ani moronn tujea fattik lagtolem. Tunvem rogtacho dves kelʼlo dekhun moronn tujea fattik lagtolem.
7 Hanv Seirachea dongri vattarak padd korun soddttolom ani thoim thaun ieta vo voita tea dor ekleacho hanv nas korun uddoitolom.
8 Hanv tanche porvot, jivexim marun uddoilolea lokanchea moddeamnim bhortolom. Tujea dongrancher, tujea falkeamnim ani tujea vhallamnim tolvarin marun uddoilolea lokanchim moddim poddlolim astolim.
9 Hanv tuka sasnak padd korun uddoitolom ani tujea xaramnim porot kednanch lok ravchenant. Ani hanv Jehova mhunn tuka vollkhon gheunk poddttolem.’
10 “Khorem mhunnttlear, hanv Jehova svota tea donui raxttram sangata aslom tori astana tunvem mhunnttlem, ‘Him donui raxttram ani he donui des mhoje zatole ani ami tancher kobzo kortole.’
11 Akʼkhea Vixvacho Dhoni Jehova mhunntta, ‘Taka lagon, hanv mhojea jivacho soput gheun sangtam. Jea toren tunvem tancho dves kelo, tanchea sangata ragan vaglo ani tanchi nattkai keli, toso hanv-ui tujea sangata vagtolom. Hanv tuji zhoddtti kortolom tednam, hanv konn to tankam dakhoun ditolom.
12 Tednam tuka kollon ietolem ki Izraelachea porvotancho opman korunk tum jem uloilo tem soglem hanvem, Jehovan, svota aikolem. Tunvem mhunnttlem, “Tankam padd korun soddleat ani ami tankam khaun uddounche mhunn amkam dileat.”
13 Tum gorvan bhoron mhojea add uloilo ani tunvem mhozo khub opman kelo. Hanvem tem soglem aikolem.’
14 “Akʼkhea Vixvacho Dhoni Jehova oxem mhunntta: ‘Hanv tuka padd zalʼlem oronnʼnnem korun soddttolom tednam akʼkhi prithum khuxalkai monoitoli.
15 Izraelachea ghoranneachem daiz padd kelʼlem tednam tunvem khuxalkai monoili, tor atam hanv-ui tujea sangata tosoch vagtolom. Seirachea dongri vattara, hoi, Edomachea akʼkhea vattara, tum padd zaun voitolo, ani hanv Jehova mhunn tankam vollkhon gheunk poddttolem.’”
