Ezekiel 31:1-18
-
Ejiptt poddlem, vhoddlem cedar-achem zhadd (1-18)
31 Uprant, 11-vea vorsachea tisrea mhoineachea poilea disa, Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Ejipttacho raza Faraoh ani tachea porzank sang,‘Tujea itlo vorto konn asa?
3 Ek Asiriekar aslo, to Lebanonantlea eka cedar* zhadda bhaxen aslo,Tache khande sobit asle, tem datt panamnim bhorlolem aslem ani savlli ditalem, tem zhadd khub voir poriant vaddlem.
Tachi tengxi mollba itli unch pavloli.
4 Bhorpur udkak lagon tem khub vaddlem, zomni ponda aslolea zhorink lagon tem khub vhoddlem zalem.
Tem zhadd zoim roilʼlem, tachea bhonvtonnim udkacheo zhori asleo,Tanche vhall moidanantlea soglea zhaddank udok pavoitale.
5 Taka lagon, tem moidanantlea soglea zhaddam poros vhodd zalem.
Taka zaiteo tallio aileo ani tache khande vaddot gele,Karonn tachea bhonvtonnim aslolea zhorimnim bhorpur udok aslem.
6 Mollba voilim soglim suknnim tachea talliencher ghontter kortalim,Soglim ranvotti zonvaram tachea khandeam ponda porank zolm ditalim,Ani vhoddlim-vhoddlim raxttram tachea savllent ravtalim.
7 Tachim pallam khol udka meren pavlolim dekhun,Tem khub sobit zalem ani tache khande lamb zaun mhoimebhorit zale.
8 Devachea bagent aslolem khoinchench cedar* zhadd tachea bhaxen naslem.
Khoincheach juniper* zhaddak tachea osleo tallio nasleo,Ani khoincheach plen* zhaddanche khande tachea bhaxen nasle.
Devachea bagentlem khoinchench zhadd tachea itlem sobit naslem.
9 Hanvenuch taka sobit kelem ani bhorpur panamnim bhorlem,Ani khorea Devachea bagentlea, mhunnche Edenantlea soglea dusrea zhaddank tachi nattkai zatali.’
10 “Taka lagon, Akʼkhea Vixvacho Dhoni Jehova oxem mhunntta: ‘Tem* itlem unch vaddlem ki tachi tengxi kupank tenkonk lagli, ani tachea unchaiek lagon tachem kalliz gorvixtt zalem.
11 Hanv taka raxttrantlea sogleant xoktivont raz cholovpeachea hatant ditolom. To tachea add panvl ghetoloch, ani tachea noxtteponnak lagon hanv taka nakartolom.
12 Ani pordexi, je raxttram modem sogleam-von krur asat, te taka katrun uddoitole ani porvotar soddttole. Tachim panam falkeant poddttolim ani tache moddlole khande desantlea zhorimnim poddon urtole. Tachea savllent ravtale te prithume voile sogle des tachea thaun pois voitole ani taka soddun ditole.
13 Mollba voilim soglim suknnim moddon poddlolea tea zhaddachea modlea bhagacher ravtolim ani soglim ranvotti zonvaram tachea khandeancher ravtolim.
14 Udkachea zhorim lagim lailʼlem khoinchench zhadd tachea itlem unch vaddchem nhoi, vo tachi tengxi mollbak tenkchi nhoi, ani bhorpur udok mellʼllolea khoincheach zhaddachi lambai tachea itli zaunchi nhoi dekhun oxem zatolem. Karonn tankam sogleank mornnachea adhin kortole, ani khol fonddant voitat tea munxam sangata te sogle prithumechea khala voitole.’
15 “Akʼkhea Vixvacho Dhoni Jehova oxem mhunntta: ‘Tem zhadd Fonddant* voitolem tea disa, hanv lokank dukh korunk laitolom. Hanv udkacheo nhoim-o dhamptolom ani tacheo zhori addaitolom. Taka lagon, zhaddank bhorpur udok mellop bond zatolem. Tea zhaddak lagon, hanv Lebanonant kallokh posraitolom ani moidanantlim soglim zhaddam sukon voitolim.
16 Moron sokol khol fonddant voitat tanchea sangata hanv taka Fonddant* uddoitolom tednam, tem poddtta tea avazan hanv raxttrank thorthorom-xim kortolom. Ani Eden bagentlim soglim zhaddam ani Lebanonantlim veg-vegllim boreantlim-borim zhaddam, zankam sogleank borem udok mellttalem, tankam prithumechea khala bhuzvonn mellttoli.
17 Tim tachea sangata sokol Fonddant* geleant, tolvarin zankam jivexim marleant tanchea lagim tim geleant. Tachea sangata, jim taka tenko ditalim* ani raxttram modem tachea savllent jietalim tim-ui sokol fonddant geleant.’
18 “Akʼkhea Vixvacho Dhoni Jehova mhunntta: ‘Tujea itli mhoima ani vorteponn Edenachea khoinchea zhaddak aslem? Tori astana, Edenachea zhaddam sangata tum-ui mortolench. Thoim tum tolvarin marun uddoilʼleam sangata, sunot korunk nasloleam sangata poddon urtolem. Faraoh-chi ani tachea soglea porzanchi oxich poristhiti zatoli.’”
