Ezekiel 9:1-11
9 Uprant tannem mhaka vhoddlea avazan mhunnttlem: “Hea xarak khast ditolea munxank apoi. Dor eka munxak tachea hatant nisonttonachem hotʼtear gheun ieunk sang!”
2 Utʼtore vatten aslolea unchlea darvonttea koddlean sov munis ietat te hanvem polloile. Dor eka munxachea hatant churo korta toslem hotʼtear aslem. Tanchea modem anik ek munis aslo zannem mov lugttache kopdde* ghatlole. Tachea bhenddak pen ani xastreachi inkachi battli bandloli asli. Te sogle munis Devmondirant aile ani tambeachea vedi lagim ube ravle.
3 Tednam kerubincher asloli Izraelachea Devachi mhoima tancher thaun mondirachea darachea umbrear aili. Magir mov lugttache kopdde ghatlolea, ani bhenddak pen ani inkachi battli bandun aslolea munxak to* ulo marunk laglo.
4 Jehovan taka mhunnttlem: “Akʼkhea Jeruzalem xarant bhonv ani thoim zata tea vitt haddtta toslea kamank lagon je roddttat ani dukh kortat tanchea sogleanchea koplancher ek khunna kadd.”
5 Uprant tannem urlolea sov munxank mhaka aikonk ieta toxem mhunnttlem: “Tumi hea munxa fattlean akʼkhea xarant vochat ani lokank marun uddoiat. Tumi tanchi matxi pasun kakut korinakat ani tankam doia-maia dakhoinakat.
6 Zanntteank, tornatteank, lhan-lhan bhurgeank, ankvar cheddvank, bailank, sogleank marun uddoiat, konnakuch soddinakat. Punn zachea mathear khunna kaddloli asa tachea lagim vochonakat. Tumi hem kam mhojea povitr zagear thaun suru korat.” Tor tea munxamnim sogleant poilim tea vhoddilank marun uddoile, je Devmondira mukhar asle.
7 Uprant tannem tankam mhunnttlem: “Vochat! Hea mondirak oxudʼdh korat ani marun udoilʼlea lokanchea moddeamnim tachim angnnam bhorat.” Tor te thoim thaun gele ani tannim xarantlea lokank marun uddoile.
8 Te lokank marun uddoitale tednam hanv ekttoch urlom. Hanv zomnir umto poddlom ani hanvem vhoddlean mhunnttlem: “Akʼkhea Vixvachea Dhonia Jehova Deva! Tum heach toren Jeruzalemacher tuzo krodhacho pelo votoit ravtolo kai? Izraelachea urlolea soglea lokancho tum nas kortolo kai?”
9 Tednam tannem mhaka mhunnttlem: “Izraelachea ani Judachea ghoranneacho guneanv khubuch vhodd asa. Akʼkho des rogtan bhorla ani xarant sogle koddem broxttachar asa. Karonn te mhunnttat, ‘Jehovan ho des soddun dila. Jehova amkam polloina.’
10 Mhaka* tanchi matxi pasun kakut dischina ani hanv tankam doia-maia dakhounchom na. Hanv tankam tanchea vagnnukecho porinnam bhogunk laitolom.”
11 Uprant hanvem tea munxak polloilo zo mov lugttache kopdde ghalun aslo, ani bhenddak pen ani inkachi battli bandun aslo. To porot ailo ani tannem mhunnttlem: “Tunvem mhaka jem korunk adnea dilʼli, hanvem toxench kelem.”
