Ezekiel 8:1-18
8 Sovʼvea vorsachea sovʼvea mhoineachea panchvea disa, hanv mhojea ghorant boslolom ani Judache mukheli mhojea mukhar boslole tednam Akʼkhea Vixvacho Dhoni Jehovachi xokti mhojer kam korunk lagli.*
2 Hanvem polloilem tednam mhaka konn tori dislo, zachem rup ujea bhaxen aslem. Tachea bhenddachea sokoilo bhag ujea sarko distalo ani bhenddacho voilo bhag bhangar ani chandi bhaxen chokchoktalo.
3 Uprant tannem hata bhaxen kitem tori fuddem kaddun mhojea matheache kens dhorle. Ani Deva koddlean mellʼllolea dorxonam vorvim, mhaka eke xokten* mollba ani prithume modem uklun Jeruzalemant vhelo. Te xokten mhaka mondirachea utʼtorek aslolea darvontteant bhitor sortat thoim haddlo. Thoim Devak rag haddtta ti murti dovorloli asli.
4 Ani polloi! Izraelachea Devachi mhoima thoim asli. Ti mhoima hanvem falkeachea moidanar polloilʼli toxich asli.
5 Uprant tannem mhaka mhunnttlem: “Munxachea puta, upkar korun tuji nodor utʼtore vatten mar.” Tor hanvem utʼtore vatten nodor marli ani thoim vedichea darvontteachea utʼtore vatten bhitor sortat thoim Devak rag haddtta ti murti asli.
6 Magir tannem mhaka mhunnttlem: “Munxachea puta, Izraelachem ghorannem hanga koslim noxttim ani vitt haddtta toslim kamam korta tem tum polloita nhoi? Heoch vostu mhaka mhojea povitr zagear thaun pois vochonk laitat. Punn atam tum hachea poros anikui chodd noxttim ani vitt haddtta toslim kamam polloitolo.”
7 Uprant to mhaka angnnant bhitor sorta thoim gheun ailo ani hanvem thoim vonttik ek burak asa to polloilo.
8 Tannem mhaka mhunnttlem: “Munxachea puta, hea vonttik ek vhoddlo burak kor.” Tor hanvem tea vonttik ek vhoddlo burak kelo, ani thoim bhitor vochonk ek vatt asa ti hanvem polloili.
9 Tannem mhaka mhunnttlem: “Bhitor voch, ani thoim lok kitlim vaitt ani vitt haddtta toslim kamam kortat tem polloi.”
10 Tor hanv bhitor gelom, ani hanvem nodor marli tednam thoinchea vonttir veg-vegllea toreche pott goxttun choltat tosle pranni, oxudʼdh zonvaram ani Izraelachea ghoranneachim vitt haddtta toslea murteanchim* chitram sogle kodden kantoilʼlim aslim tim hanvem polloilim.
11 Ani tanchea mukhar Izraelachea ghoranneache 70 vhoddil ube asle. Tanchea modem Shafanacho put Jazania aslo. Dor eka vhoddilachea hatant tachem dhumpannem aslem ani tantuntlo pormollit dhumpacho dhunvor kupa bhaxen voir voitalo.
12 Tannem mhaka mhunnttlem: “Munxachea puta, Izraelachea ghoranneache vhoddil hanga kallkhant kitem kortat, tem tum polloita nhoi? Dor eklo bhitorlea kuddamnim tancheo murteo dovorleat thoim kitem korta, tem tum polloita nhoi? Karonn te mhunnttat, ‘Jehova amkam polloina. Jehovan ho des soddun dila.’”
13 Uprant tannem mhaka mhunnttlem: “Te kortat tea vitt haddtta toslea kamam poros anikui noxttim kamam tum polloitolo.”
14 Tor to mhaka Jehovachea ghorachea* utʼtore vatten aslolea darvontteantlean bhitor sortat thoim gheun ailo. Thoim thoddeo bailo boson Tamuz deva pasot roddttaleo teo hanvem polloileo.
15 Uprant tannem mhaka mhunnttlem: “Munxachea puta, tum hem soglem polloita nhoi? Te kortat tea vitt haddtta toslea kamam poros anikui noxttim kamam tum polloitolo.”
16 Tor to mhaka Jehovachea ghorachea bhitorlea angnnant gheun ailo. Thoim Jehovachea mondirant bhitor sortat tea zagear, bolkanvachea ani vedichea modem sumar 25 munis asle. Te sogle Jehovachea mondira vatten apli fatt korun asle ani tanchim tonddam udente vatten aslim. Udente vatten aslolea suriak te paim-am poddttale.
17 Uprant tannem mhaka mhunnttlem: “Munxachea puta, tum hem soglem polloita nhoi? Judachem ghorannem oslim vitt haddtta toslim kamam korun akʼkho des hinvsen bhorta ani mhaka rag haddit ravta, ti ek lhan vost oxi tuka dista kai? Polloi, te to khando* mhojea naka lagim haddttat.
18 Tor atam hanv ragan bhoron tankam khast ditolom. Mhaka* tanchi matxi pasun kakut dischina ani hanv tankam doia-maia dakhounchom na. Te mhojea kanant vhoddlean bob marun roddlearui hanv tanchem aikochom na.”
Footnotes
^ Utran utor, “hat mhojer ailo.”
^ Hanga uzar kelʼlea Hebrev utracho orth, povitr xokti vo ek devdut zaunk xokta.
^ Jem Hebrev utor hanga uzar kelam, tem ghoddie “xenn” hea orthachea utrak sombondit asa, ani tem eka vostuchi kitli vitt ieta tem dakhounk uzar kortat.
^ Vo “mondirachea.”
^ Ho khando murte puje pasot uzar kortale mhunn dison ieta.
^ Utran utor, “Mhojea dolleank.”
