Ezekiel 30:1-26
30 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, tum bhasaunni kor ani oxem mhunn, ‘Akʼkhea Vixvacho Dhoni Jehova oxem mhunntta:
“Bob marun roddat ani mhunnat, ‘Hai! To dis ieta!’
3 Karonn to dis lagim pavla, hoi, Jehovacho dis lagim pavla.
To kallea-kitt kupancho dis, to raxttranchi zhoddtti korpacho vell astolo.
4 Ejiptta add ek tolvar ietoli, ani thoim jivexim marun uddoiloleanchim moddim polloun Ethiopia bhirantin kamptolo.
Tachi girestkai kaddun ghetlea ani tacheo buniadi moddun uddoileat.
5 Ethiopia, Put, Lud ani tanchea modem ravtole pordexi,*Ani Kubache lok, toxench tanchea sangata korar kelʼlea desache put,*Te sogle tolvarin moron poddttole.”’
6 Jehova oxem mhunntta:
‘Ejipttak tenko ditat te pasun poddttole,Taka jea bollacher gorv aslo, to sokol denvtolo.’
“‘Migdol te Siene poriant te sogle desant tolvarin moron poddttole,’ oxem Akʼkhea Vixvacho Dhoni Jehova mhunntta.
7 ‘Te padd zaun gelʼlea desam poros anikui padd zatole. Tachim svotachim xaram padd zaun gelʼlea xaram poros anikui chodd padd zaun urtolim.
8 Hanv Ejipttak uzo laitolom ani tachea soglea sangateancho bhosm zatolo, tednam hanv Jehova mhunn tankam vollkhon gheunk poddttolem.
9 Tea disa, svotacher chodduch bhorvonso aslolea Ethiopien thorthorchem mhunn, hanv tarvancher sondexkar dhaddttolom. Ejipttacher ietolea disak lagon, Ethiopieche lok bhirantin kamptole, karonn to dis ietoloch.’
10 “Akʼkhea Vixvacho Dhoni Jehova oxem mhunntta: ‘Babilonacho Raza Nebukadnezarachea* hatant, Ejipttachea porzank hanv kabar korun uddoitolom.
11 To ani tache soinikanche zome raxttrantle sogleant krur lok zaun asat. Desacho nas korunk te ietole. Te Ejiptta add apli tolvar uzar kortole ani jivexim marun uddoilolea lokanchea moddeamnim des bhortole.
12 Hanv Nil Nhoim-chea kanalank sukhi zomin korun soddttolom ani ho des noxttea munxank viktolom. Ho des ani tantunt asa tem soglem, hanv pordexi lokanchea hatan padd korun soddttolom. Hanvem Jehovan svota hem sanglam.’
13 “Akʼkhea Vixvacho Dhoni Jehova oxem mhunntta: ‘Hanv kanttallo haddtta toslea murteancho* pasun nas kortolom, ani Nofachea* kosloch valor naslolea devank kabar korun uddoitolom. Hea fuddem, Ejiptt desantlo eklo-i kunvor* aschona. Ani hanv Ejiptt desant bhirant posraitolom.
14 Hanv Pathrosak padd korun soddttolom, Zoanant uzo laitolom ani No* xaracher zhoddttechem formonn martolom.
15 Hanv Sinacher, Ejipttachea kilʼleacher mhozo rag votoitolom, ani No xarant ravpi lokancho nas korun uddoitolom.
16 Hanv Ejipttant uzo laitolom. Sinacher bhirant bostoli, dusman No xarant bhitor ghustole ani Nofacher* disa-uzvaddant akromonn kortole!
17 On* ani Pibesethache tornatte tolvarin moron poddttole, ani tim xaram koident voitolim.
18 Hanv Tehafnehesant Ejipttachem zum moddttolom tednam, disachea vellar thoim kallokh zatolo. Taka jea bollacher gorv aslo to kabar zaun voitolo, kupam taka dhamptolim, ani tachim nogram koident voitolim.
19 Hanv Ejipttacher zhoddttechem formonn martolom, ani hanv Jehova mhunn tankam vollkhon gheunk poddttolem.’”
20 Uprant, 11-vea vorsachea poilea mhoineachea satvea disa, Jehovacho sondex mhaka mellʼllo. Tannem mhunnttlem:
21 “Munxachea puta, hanvem Ejipttacho raza Faraoh-cho hat moddun uddoila. Tacho moddlolo hat boro korunk to bandchenant, vo tolvar dhorunk xokta toso to ghott zauncho mhunn taka molom-pottʼtti korchenant.”
22 “Taka lagon, Akʼkhea Vixvacho Dhoni Jehova oxem mhunntta: ‘Polloi, hanv Ejipttacho raza Faraoh-chea add asam. Ani hanv tache donui hat moddun uddoitolom, ghott asa to ani moddlolo asa to-ui moddun uddoitolom. Hanv tachea hatantli tolvar sokol uddoitolom.
23 Uprant, hanv Ejipttkarank dusrea raxttramnim ani veg-vegllea desamnim ximpddaitolom.
24 Hanv Babilonachea razache hat ghott kortolom* ani mhoji tolvar tachea hatant ghaltolom. Hanv Faraoh-che hat moddun uddoitolom, ani eka mortolea munxa bhaxen to tachea* mukhar vhoddlean pirgotolo.
25 Hanv Babilonachea razache hat ghott kortolom, punn Faraoh-che hat oskot zaun poddttole. Hanv Babilonachea razachea hatant mhoji tolvar ghaltolom ani to ti tolvar Ejiptt desa add uzar kortolo tednam, hanv Jehova mhunn tankam vollkhon gheunk poddttolem.
26 Hanv Ejipttkarank dusrea raxttramnim ani veg-vegllea desamnim ximpddaitolom ani hanv Jehova mhunn tankam vollkhon gheunk poddttolem.’”
Footnotes
^ Vo “ani dusrea raxttrantle sogle lok.”
^ Hanga ghoddie Ejiptta lagim hat melloilʼlea Izraelitkaram vixim sanglam.
^ Utran utor, “Nebukadrezar,” veglle toren boroilʼlem nanv.
^ Jem Hebrev utor hanga uzar kelam, tem ghoddie “xenn” hea orthachea utrak sombondit asa, ani tem eka vostuchi kitli vitt ieta tem dakhounk uzar kortat.
^ Vo “Memfisachea.”
^ Vo “mukheli.”
^ Mhunnche, Thebes.
^ Vo “Memfisacher.”
^ Mhunnche, Heliopolis.
^ Vo “razachem boll vaddoitolom.”
^ Mhunnche, Babilonachea raza mukhar.
