Ezekiel 2:1-10
2 Uprant tannem mhaka mhunnttlem: “Munxachea puta,* tujea paim-ancher ubo rav. Hanv tujea lagim ulounk sodhtam.”
2 To mhojea lagim ulounk laglo tednam, povitr xokti mhojer aili ani mhaka mhojea paim-ancher ubo kelo, zaka lagon zo mhojea lagim uloitalo tachem hanv aikonk pavlom.
3 Tannem mhaka mhunnttlem: “Munxachea puta, hanv tuka Izraelachea lokam lagim dhaddttam, hanv tuka mhojea add gelʼlea raxttram lagim dhaddttam. Aplea purvozam bhaxen he lok pasun aiz poriant mhojea add oprad korit asat.
4 Hanv tuka oslea putam lagim dhaddttam, je hottʼtti* ani nibor kallzache asat. Tum vochon tankam oxem sang, ‘Akʼkhea Vixvacho Dhoni Jehova oxem mhunntta.’
5 Te tujem aikom vo na aikom—karonn te add voita toslea ghoranneache lok zaun asat—tanchea modem ek provadi aslo mhunn tankam khorench kollon ietolem.
6 “Punn munxachea puta, tujea bhonvtonnim kantteanchim jhilkuttam ani kantte asat* ani tum vinchvam modem ravta zalear pasun, tum tankam bhienaka, ani tanchea utrankui bhienaka. Te add voita toslea ghoranneache lok zaun asat, tor tanchea utrank lagon bhienaka ani tanchem tondd polloun ghabornaka.
7 Tannim aikom vo na aikom, tunvem tankam mhozo sondex diunkuch zai, karonn te add voitat tosle lok zaun asat.
8 “Punn tum munxachea puta, hanv sangtam tem aik. Hea add voita toslea ghoranneam bhaxen tum zainaka. Tujem tondd ugodd ani hanv tuka ditam tem kha.”
9 Hanvem polloilem tednam, konn tori mhojea vatten aplo hat fuddem kaddtta to mhaka dislo, ani tea hatant ek boroilʼlo kovllo* hanvem polloilo.
10 Tannem to kovllo mhojea mukhar ugddun dovorlo tednam, tachea donui vatten, fuddlean ani fattlean boroilʼlem aslem tem hanvem polloilem. Tacher dukhachim gitam,* dukh korop ani bob marun roddop, hea vixim boroilʼlem aslem.
