Ezekiel 47:1-23
47 Uprant to mhaka Devmondirachea bhitor sorchea vatter porot gheun ailo. Thoim hanvem Devmondirachea umbrea pondchean udente vatten udok vhanvta tem polloilem, karonn Devmondiracho fuddlo bhag udente vatten fuddo korun aslo. Tem udok Devmondirachea pondchean, uzvea vatten ani vedichea dokxinne vatten vhanvtalem.
2 Uprant to mhaka utʼtorechea darvontteantlean bhair gheun gelo ani udente vatten fuddo korun aslolea bhailea darvonttea lagim gheun gelo. Hanvem uzve vattentlean barik udok vhanvta tem polloilem.
3 To munis aplea hatant mezpachi dori gheun udente vatten bhair gelo tednam, tannem 1,000 hat* mezle ani mhaka thoim thaun udkantlean pasar zaunk sanglem. Tem udok paim-anchea sokoilea bhaga* meren pavtalem.
4 Uprant tannem anik 1,000 hat mezle ani mhaka udkantlean pasar zaunk sanglem, ani tem udok mhojea dimiem meren pavtalem.
Tannem anik 1,000 hat mezle ani mhaka udkantlean pasar zaunk sanglem, ani tem udok mhojea bhendda meren pavtalem.
5 Tannem anik 1,000 hat mezle tednam, tem udok vhalla bhaxen vhanvtalem ani mhojean cholon thoinchean pasar zaunk zalem na. Karonn tem udok itlem khol aslem, ki tantuntlean penvon vochonk poddttalem. Tea vhallantlea udkantlean cholon vochonk zainaslem.
6 Tannem mhaka vicharlem: “Munxachea puta, tunvem hem polloilam?”
Uprant tannem mhaka cholon porot nhoim-chea deger ieunk sanglem.
7 Hanv porot ailom tednam, nhoim-chea deger donui vatten khub zhaddam asat tem hanvem polloilem.
8 Uprant tannem mhaka mhunnttlem: “Hem udok udentechea vattara vatten vhanvta ani Arabantlean* sokol vhanvot doriant voita. Tem doriant pavta tednam, doriantlem udok godd zatolem.*
9 Hem udok* vhanvta title-i kodden bhorpur jive pranni jieunk xoktole. Thoim bhorpur nustem astolem, karonn hem udok thoim vhanvtolem. Doriantlem udok godd zatolem* ani tem udok vhanvta thoim sogleak jivit astolem.
10 “Engedi tem Eneglaim poriant kharvi doria deger ube astole. Thoim tanchim vhoddlim-vhoddlim rampnnechim zallam sukoupacho zago astolo. Vhoddlea Doriantlea* nustea bhaxen, thoim veg-vegllea torechem bhorpur nustem astolem.
11 “Thoim rebddache ani chiklache zage astole. Thoinchem udok godd zaunchem na,* tem kharuch urtolem.
12 “Doria deger donui vatten follam* diupi soglea torechim zhaddam vaddttolim. Tanchim panam sukon voichimnant, ani tim follam divop kednanch bond korchimnant. Mhoineachea-mhoinea tankam novim follam zatolim, karonn tanchea pasot povitr zagear thaun udok vhanvta. Tanchea follam thaun jevonn ani tanchea panam thaun pekovnni mellttoli.”
13 Akʼkhea Vixvacho Dhoni Jehova oxem mhunntta: “Ho toch vattar zaun asa, zo tum Izraelachea 12 kullank daiz mhunn vanttʼttolo. Ani Juzek don vantte mellttole.
14 Tumkam to daiz mhunn mellttolo, dor ekleak ek-sarkoch* vantto mellttolo. Ho des hanv tumchea purvozank ditolom mhunn hanvem soput ghetlolo, ani atam to tumkam daiz mhunn mellʼlla.
15 “Hi utʼtore vatten aslolea desachi xim zaun asa: Ti Vhoddlea Doria thaun, Hethlona thaun Zedad,
16 Hamath, Berotha, ani Sibraim poriant, jem Damask ani Hamathachea vattaram modem asa, thoim thaun Hazer-hatikon poriant, jem Hauranachea ximer asa, thoim poriant asa.
17 Tor ti xim doria thaun Hazarenon poriant, Damaskachea xime vatten tem utʼtore poriant, ani Hamathachea xime poriant astoli. Hi utʼtorechi xim zaun asa.
18 “Udentechi xim, Hauran ani Damaska modlean vochon, Jordana vatten Gilead ani Izrael desa modlean voita. Tumi xime* thaun udentechea doria* poriant mezunk zai. Hi udentechi xim zaun asa.
19 “Dokxinnechi xim, Tamar thaun Meribath-kadeshachea udkam poriant, ani magir Wadi* ani Vhoddlea Doria poriant astoli. Hi dokxinnechi xim zaun asa.
20 “Ostome vatten Vhoddlo Doria asa, zo dokxinneche xime thaun voir Lebohamathachea* mukhar aslolea zageam poriant asa. Hi ostomechi xim zaun asa.”
21 “Tumi ho des tumchea modem, Izraelachea 12 kullam modem vanttun gheuncho.
22 Tumi to tumchea modem, ani tumchea modem ravtana bhurgim zalʼlim tea pordexiam modem, daiz mhunn vanttcho. Te tumchea pasot Izraelant zolm ghetlolea nagrikam sarkech zatole. Izraelachea kullam modem tumchea sangata tankam-i daiz mellttolem.
23 Tunvem tea pordexiak, to ravta tea kullacho vattar daiz mhunn diuncho,” oxem Akʼkhea Vixvacho Dhoni Jehova mhunntta.
Footnotes
^ Hem lamb hatachea mapak suchit korta. Mahiti B14 polloi.
^ Inglez bhaxent “ankle.”
^ Vo “oronnʼnneantlean.”
^ Utran utor, “udok pektolem.”
^ Utran utor, “Teo don nhoim-o.”
^ Utran utor, “udok pektolem.”
^ Mhunnche, Mediteranean Doria.
^ Utran utor, “udok pekchem na.”
^ Utran utor, “jevonn.”
^ Utran utor, “dor ekleak aplea bhava bhaxenuch.”
^ Mhunnche, utʼtoreche xime.
^ Mhunnche, Mittacho Doria (Dead Sea).
^ Mhunnche, Ejipttachi Wadi.
^ Vo “Hamathachea bhitor sorchea vattechea.”
