Ezekiel 38:1-23
38 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Magog desantlo Gog, zo Meshek ani Tubalachea mukheleancho odhikari* asa, tachea add tujem tondd kor ani bhasaunni kor.
3 Oxem mhunn, ‘Akʼkhea Vixvacho Dhoni Jehova oxem mhunntta: “Goga, Meshek ani Tubalachea mukheleanchea odhikarea,* polloi hanv tujea add asam.
4 Hanv tuka portitolom, ani tujea daddamnim* gorio ghaltolom, ani tuka tujea akʼkhe fouje sangata, ghoddeam sangata ani ghoddesvaram sangata, je mhoimebhorit kopdde ghalun asat, tankam sogleank bhair gheun ietolom. Vhoddleo ani lhan ddhalo* gheun aslolea, toxench tolvar gheun aslolea hea vhoddlea foujek* hanv tujea sangata bhair haddttolom.
5 Tanchea sangata Persia, Ethiopia ani Put, hea zageam voile soinik pasun asat. Te sogle lhan ddhalo gheun ani matheak helmett ghalun asat.
6 Gomer ani tache sogle soinikanche zome, utʼtorechea sogleant poisulʼlea vattarantlea Togarmachem ghorannem ani tache sogle soinikanche zome pasun tujea sangata asat. Tujea sangata zaite des asat.
7 “‘“Tum toiar rav, tujea sangata ektthaim zalʼlea akʼkhea foujek gheun toiar rav. Tum tancho odhikari* zatolo.
8 “‘“Zaitea disam uprant tujer dhean ditole.* Jea desantlea lokank tolvari thaun vanchoun haddlole, jea desantlea lokank zaitea desantlean ektthaim korun padd zaun gelʼlea Izraelachea porvotancher haddlole, tea desacher tum xevottachea vorsamnim akromonn kortolo. Hea desant ravtat tankam veg-vegllea desantlean haddlole ani atam te aplea desant surokxit ravtat.
9 Tum vadolla sarko tanchea add ietolo, ani tum tujea soinikanchea zomeam sangata ani zaitea desam sangata tancho des kupam bhaxen dhamptolo.”’
10 “Akʼkhea Vixvacho Dhoni Jehova oxem mhunntta: ‘Tea disa tujea monant veg-vegllea torechim chintnam ietolim ani tum ek manddnni kortolo.
11 Tum mhunnttolo: “Hanv rakhonn naslolea zageancher* akromonn kortolom. Surokxit ani usko nastana ravtat tanchea add hanv ietolom. Vonott, lokhnnache dandde vo darvontte nant, toslea surokxit naslolea zagear jim ravtat, tanchea add hanv ietolom.”
12 Lokank luttunk ani bhorpur luttlolem saman ektthaim korunk tum oxem kortolo. Je zage padd zaun gelʼle punn atam zoim lok ravtat tancher akromonn korunk, toxench jea lokank raxttrantlean porot ektthaim keleat, je bhorpur girestkai ani bhattam-besam ektthaim kortat ani je prithumechea modem ravtat, tancher akromonn korunk tum oxem kortolo.
13 “‘Sheba ani Dedan, toxench Tarshishache veapar-dhondo korpi ani tache sogle zhuzari,* tuka oxe vichartole: “Tum luttlolem saman ektthaim korunk ani luttunk, tea desacher akromonn korta kai? Tunvem tujea soinikank, bhangar ani chandi, girestkai, bhattam-besam ani bhorpur luttlolem saman vhoronk ektthaim keleat kai?”’
14 “Tor munxachea puta, bhasaunni kor ani Gogak oxem sang, ‘Akʼkhea Vixvacho Dhoni Jehova oxem mhunntta: “Mhoji Izrael porza surokxotaien ravtoli tea disa tuka tem kollchem na kai?
15 Tum tujea zagear thaun, utʼtorechea sogleant poisulʼlea vattaram thaun ietolo. Tum ani tujea sangata zaite des ietole. Tumcho sogleancho ek vhoddlo zomo, ek vhoddli fouz ghoddeancher boson ietoli.
16 Desak dhampun uddoitat tea kupam bhaxen tum mhojea Izrael porje add ietolo. Goga, xevottachea disamnim hanv tuka mhojea desa add haddttolom. Hea vorvim, hanv tujea udexim raxttram mukhar svotak povitr kortolom tednam, hanv konn to tankam kollon ietolem.”’
17 “Akʼkhea Vixvacho Dhoni Jehova oxem mhunntta: ‘Hanvem adlea kallar mhojea sevokam udexim, mhunnche, Izraelachea provadeam udexim, zachea vixim sanglolem to tunch nhoi kai? Tuka Izraelitkaram add haddttole mhunn te zaitea vorsam thaun bhasaunni korinasle kai?’
18 “Akʼkhea Vixvacho Dhoni Jehova oxem mhunntta: ‘Jea disa Gog Izrael desacher akromonn kortolo, tea disa mhozo rag samko pettʼttolo.
19 Ragan bhoron ani mhojea krodhachea zollttea ujean hanv uloitolom ani tea disa Izrael desant ek vhoddlo bhuimkamp zatolo.
20 Mhaka lagon doriantlim nustim, mollba voilim suknnim, moidana voilim ranvotti zonvaram, zomnir pott goxttun cholpi sogle pranni ani prithume voile sogle lok bhirantin koddkoddttole, ani porvot kosllon poddttole, khoddpam sokol poddttolim ani dor ek vonott moddon zomnir poddttoli.’
21 “Akʼkhea Vixvacho Dhoni Jehova mhunntta, ‘Hanv mhojea soglea porvotancher, Goga add zhuz* korunk hukum ditolom. Dor eklo aplea bhava add tolvar uzar kortolo.
22 Hanv tacher pidda haddun ani rogtacheo nhoim-o vhanvoun, tachi zhoddtti kortolom.* Hanv tacher ani tachea soinikanchea zomeancher, ani tachea sangata aslolea zaitea desancher ghos-ghoxeamnim paus poddom-so kortolom, korveancho paus haddttolom, ani uzo ani zolltta tosle fator* votoitolom.
23 Hanv zaitea raxttram mukhar svotachi mhoima kortolom, svotak povitr kortolom ani hanv konn to tankam dakhoun ditolom. Ani hanv Jehova mhunn tankam vollkhon gheunk poddttolem.’
Footnotes
^ Vo “Tubalacho mukhel kunvor.”
^ Vo “mukhel kunvra.”
^ Inglez bhaxent “jaw.”
^ Ek lhan ddhal, ji choddxe pavtt dhonu uzar kortat tanchea lagim astali.
^ Vo “zomatik.”
^ Utran utor, “rakhonndar.”
^ Vo “uprant tuka apoitole.”
^ Vo “naslolea khedde ganv aslolea desancher.”
^ Vo “tornatte xinv.”
^ Utran utor, “tolvar uzar.”
^ Vo “tachea sangata kes zhogoddttolom.”
^ Vo “ani gondhok.” Inglez bhaxent “sulfur.”
