Ezekiel 39:1-29
39 “Ani tum, munxachea puta, Goga add bhasaunni kor ani taka sang, ‘Akʼkhea Vixvacho Dhoni Jehova oxem mhunntta: “Goga, Meshek ani Tubalachea mukheleanchea odhikarea,* hanv tujea add asam.
2 Hanv tuka portitolom, fuddem dhanvddaitolom, ani utʼtorechea sogleant poisulʼlea vattaram thaun bhair haddun Izraelachea porvotancher haddttolom.
3 Hanv tujea davea hatantlo dhonu kaddun uddoitolom, ani tujea uzvea hatantle bann sokol poddttole.
4 Tum Izraelachea porvotancher poddttolo. Tum, tuje soinikanche sogle zome, ani tujea sangata astole te sogle des poddttole. Hanv tuka soglea torechea xikar korpi suknneanchem ani moidanantlea ranvotti zonvaranchem jevonn zaunk ditolom.”’
5 “‘Tum uktea moidanar poddttolo, karonn hanvem svota hem sanglam,’ oxem Akʼkhea Vixvacho Dhoni Jehova mhunntta.
6 “‘Hanv Magogacher ani zunveancher surokxit ravtat tea sogleancher uzo dhaddttolom, ani hanv Jehova mhunn tankam vollkhon gheunk poddttolem.
7 Mhojea lokam modem, mhunnche, Izraela modem hanv mhojem povitr nanv kolloitolom, ani porot kednanch hanv mhojea povitr nanvacho opman zaunk diunchom na. Ani hanv Jehova, Izraelant Povitr Dev zaun asa mhunn raxttrank vollkhon gheunk poddttolem.’
8 “Akʼkhea Vixvacho Dhoni Jehova oxem mhunntta, ‘Hoi, jea vixim bhasaunni kelʼli ti purnn zaunchi asa, ti khorench purnn zatoli. Hanvem heach disa vixim sanglolem.
9 Izraelache lok ap-aplea xarantlean bhair ietole ani uzo pettounk hotʼtearam zolloitole. Lhan ddhali,* vhoddleo ddhali, dhonu, bann, zhuzache dandde* ani bhale him soglim hotʼtearam te zollov mhunn vapurtole. Sat vorsam meren uzo pettounk te hinch uzar kortole.
10 Xetant vo ranant vochon tankam lakddam ektthaim korunk poddchimnant karonn te hinch hotʼtearam zollov mhunn uzar kortole.’
“‘Jea lokamnim tankam luttlole tankam te luttʼttole. Ani zannim tanche koddlean soglem kaddun ghetlolem, tanchea koddlean te soglem kaddun ghetole,’ oxem Akʼkhea Vixvacho Dhoni Jehova mhunntta.
11 “‘Tea disa hanv Gogak Izraelant ek fondd ditolom. Doriachea udente vatten provas korta tea falkeant to astolo. Tea fonddak lagon falkeantlean ieta-voita tea lokancho rosto bond zatolo. Gogak ani tachea soglea porzank thoim purtole, ani tea zageak Hamon-Gogachem Falkem* oxem nanv ditole.
12 Tankam purun des nitoll korunk, Izraelachea ghoranneak sat mhoine lagtole.
13 Desantle sogle lok tankam purpachea kamank lagtole, ani hanv mhaka mhoima haddttolom tea disa, te apleak ek vhodd nanv zoddun ghetole,’ oxem Akʼkhea Vixvacho Dhoni Jehova mhunntta.
14 “‘Desantlean porot-porot pasar zaunk ani prithumer urlolim moddim purunk munxank nemtole, jea vorvim prithum nitoll zatoli. Hem sodhpachem kam te sat mhoine poriant korit ravtole.
15 Desantlean porot-porot pasar zatoleank eka munxachem hadd dista tednam, te tachea kuxik ek khunna ubi korun dovortole. Uprant, purpachem kam dilʼlem asa te munis Hamon-Gogachea Falkeant tem hadd purtole.
16 Thoim Hamona* nanvachem ek xar pasun astolem. Ani te to des nitoll kortole.’
17 “Punn munxachea puta, Akʼkhea Vixvacho Dhoni Jehova oxem mhunntta: ‘Soglea torechea suknneank ani moidanantlea soglea ranvotti zonvarank oxem sang, “Ektthaim zaiat ani ieiat. Hanv tumchea pasot toiar kortam tea bolidanam bhonvtonnim ektthaim zaiat. Hanvem tumkam sogleank Izraelachea porvotancher ek vhoddlem bolidan toiar kelam. Thoim tumi mas khatole ani rogot pietole.
18 Tumi xoktivont munxanchem mas khatole ani prithumechea mukheleanchem rogot pietole. Hoi, Bashanachea soglea ghott-mutt zonvaranchem—menddreanchem, menddurleanchem, bokddeanchem ani boilanchem—tumi mas khatole ani rogot pietole.
19 Hanv tumchea pasot toiar kortam tea bolidanachi chorob tumi naka zaisor khatole ani tumi taitt zaisor tachem rogot pietole.”’
20 “‘Tumi mhojea mezar pott bhoro poriant, ghoddeanchem, roth choloitoleanchem, xoktivont munxanchem ani soglea torechea zhuzareanchem mas khatole,’ oxem Akʼkhea Vixvacho Dhoni Jehova mhunntta.
21 “‘Hanv raxttram modem mhoji mhoima dakhoun ditolom. Hanvem marlam tem zhoddttechem formonn ani hanvem tanchea modem dakhoilʼli mhoji xokti* soglim raxttram polloitolim.
22 Tea disa thaun, Izraelachea ghoranneak hanv tancho Dev Jehova mhunn vollkhon gheunk poddttolem.
23 Izraelachea ghoranneache lok, tancheach guneanvak lagon ani tancheach ovisvaxiponnak lagon koident gele mhunn raxttrank vollkhon gheunk poddttolem. Taka lagon, hanvem tanchea thaun mhojem tondd lipoilem, tankam tanchea dusmananchea hatant dile, ani te sogle tolvarin moron gele.
24 Tanchea mhelleponna pormonnem ani opradam pormonnem hanv tanchea sangata vaglom, ani hanvem tanchea thaun mhojem tondd lipoilem.’
25 “Taka lagon, Akʼkhea Vixvacho Dhoni Jehova oxem mhunntta: ‘Hanv koident aslolea Jakobachea lokank tanchea desant porot gheun ietolom. Izraelachea akʼkhea ghoranneachi hanv kakut kortolom, ani urben mhojea povitr nanvachi rakhonn kortolom.
26 Tim mhojea lagim ovisvaxiponnan vaglim dekhun tankam loz bhogchi poddttoli. Punn tea uprant, tim tanchea desant surokxit ravtolim ani tankam konnuch bhieonchona.*
27 Hanv tankam veg-vegllea desantlean porot haddttolom ani tankam tanchea dusmananchea desantlean ektthaim kortolom tednam, zaitea raxttrank hanv ek povitr Dev mhunn dakhoun ditolom.’
28 “‘Hanv tankam koidi mhunn raxttram modem dhaddttolom, ani uprant tankam tanchea desant porot ektthaim kortolom. Tanchea modlea konnankuch hanv fattim soddchona. Tednam, hanv tancho Dev Jehova mhunn tankam vollkhon gheunk poddttolem.
29 Tea uprant, hanv porot kednanch tanche koddlean mhojem tondd lipounchom na, karonn hanv Izraelachea ghoranneacher mhoji povitr xokti votoitolom,’ oxem Akʼkhea Vixvacho Dhoni Jehova mhunntta.”
