Ezekiel 34:1-31
34 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Izraelachea gonvlleam add bhasaunni kor. Bhasaunni kor ani tea gonvlleank sang, ‘Akʼkhea Vixvacho Dhoni Jehova oxem mhunntta: “Izraelachea gonvlleancher hai, je fokot aplench pott bhorit asat! Hinddachem pott bhorop gonvlleanchem kam nhoi kai?
3 Tumi zonvaranchi chorob khatat, tanchea vulan kelʼle kopdde ghaltat, ani mottea-mottea zonvarank martat, punn tumi hinddak upaxim dovortat.
4 Tumi oskot asloleak ghottai diunk na, duent asloleak boro korunk na, ghavo zalʼleak molom-pottʼtti korunk na, bhottokloleak porot haddunk na vo sanddloleak tumi sodhunk vochonk nant. Tachea bodlek, tumi tancher krur toren odhikar choloilo ani tancher zulum kelo.
5 Tankam gonvlli naslo dekhun, tim hanga-thoim ximpoddlim ani moidanantlea soglea ranvotti zonvaram pasot jevonn koxim zalim.
6 Mhojim menddram soglea porvotancher ani dor eka unch dongracher bhottkot ravlim ani akʼkhea prithumer hevtten-tevtten ximpoddlim. Ani tankam porot haddunk vo tankam sodhunk konnuch vochonk na.
7 “‘“Taka lagon, gonvlleamno, Jehovacho ho sondex aikat:
8 ‘Akʼkhea Vixvacho Dhoni Jehova oxem mhunntta, “Hanv mhojea jivacho soput gheun sangtam, hanv panvl ghetolonch. Mhojim menddram xikar zaleant, soglea ranvotti zonvaranchem jevonn zaleant, karonn tankam gonvlli naslo. Mhojea gonvlleamnim mhojea menddrank sodhunk nant. Tachea bodlek, te aplinch pottam bhorit ravle ani tannim mhojea menddrank upaxim dovorlim.”’
9 Taka lagon, gonvlleamno, Jehovacho ho sondex aikat.
10 Akʼkhea Vixvacho Dhoni Jehova oxem mhunntta: ‘Hanv hea gonvlleanchea add asam ani hanv tanche koddlean mhojea menddrancho hixob ghetolom.* Hanv tankam hea fuddem mhojea menddrank chorounk* diunchom na ani te gonvlli porot kednanch aplem pott bhorunk xokchenant. Hanv mhojea menddrank tanchea tonddantlim soddoitolom, jea udexim tim porot kednanch tanchea pasot jevonn zaunchimnant.’”
11 “‘Akʼkhea Vixvacho Dhoni Jehova oxem mhunntta: “Hanv hanga asam, ani hanv svota mhojea menddrank sodhun haddttolom ani tanchi kallji ghetolom.
12 Zoso ek gonvlli hanga-thoim ximpoddlolea aplea menddrank sodhun haddtta ani tankam khavoita-pivoita, teach toren hanv mhojea menddranchi kallji ghetolom. Hanv tankam tea soglea zageam voilean porot haddttolom, zoim tim kallea-kitt kupanchea ani datt kallkhachea disa hanga-thoim ximpoddlolim.
13 Hanv tankam veg-vegllea desantlean bhair haddttolom. Hanv tankam tea soglea desantlean ektthaim kortolom ani tankam tanchea svotachea desant gheun ietolom. Hanv tankam Izraelachea porvotancher, nhoim-e lagim ani lok ravtat toslea zageancher chorvak vhortolom.
14 Hanv tankam ekdom borea chorvachea zagear choroitolom, ani tim Izraelachea unch porvotancher chorov khatolim. Thoim tim hirvea moidanar visov ghetolim ani Izraelachea porvotancher ekdom boro chorov aslolea zagear chorov khatolim.”
15 “‘Akʼkhea Vixvacho Dhoni Jehova mhunntta, “Hanv svota mhojea menddrank chorov khaunk vhortolom ani hanv svota tankam visov gheupachea zagear vhortolom.
16 Sanddlolea menddreak hanv sodhtolom, bhottokloleak porot gheun ietolom, mar lagloleache ghave bandtolom ani zo oskot asa taka ghottai ditolom, punn zo motto ani ghott-mutt asa tacho hanv nas kortolom. Hanv tachi zhoddtti korun taka khast laitolom.”
17 “‘Mhojea menddramno, tumkam zalear, Akʼkhea Vixvacho Dhoni Jehova oxem mhunntta: “Hanv beginuch eka menddrum modem ani dusrea menddrum modem, toxench menddream ani bokddeam modem neai kortolom.
18 Tumi ekdom borea chorvachea mollar chorov khailo to puro nhoi kai? Tumchim urlolim-i chorvachim mollam tumi tumchea paim-amnim maddounk zai kai? Ani samkem nitoll udok pielea uprant, urlolea udkant paim marun tumi tem khodoll korunk zai kai?
19 Tumi tumchea paim-amnim maddoun uddoilam tea mollar mhojea menddramnim chorvak voichem kai, ani tumche paim marun tumi khodoll kelʼlem udok tannim pieunchem kai?”
20 “‘Taka lagon, Akʼkhea Vixvacho Dhoni Jehova tankam oxem mhunntta: “Polloi, mottʼttea ani barik menddrum modem hanv svota neai kortolom,
21 karonn tumi soglea duent menddrank tumchea kuximnim* ani bhuzamnim dhuklit ravle, ani te pois ximpddom poriant tumi tumchea xingamnim tankam marit ravle.
22 Hanv mhojea menddrank salvar kortolom ani te porot kednanch konnanchech xikar zaunchenant. Hanv eka menddru modem ani dusrea menddru modem neai kortolom.
23 Hanv tancher eka gonvlleak, mhozo sevok Davidak upzoitolom, ani to tankam khaunk chorov ditolo. To svota tankam chorov ditolo ani tancho gonvlli zatolo.
24 Ani hanv Jehova tancho Dev zatolom, ani mhozo sevok David tancho mukheli zatolo. Hanvem svota, Jehovan hem sanglam.
25 “‘“Hanv tanchea sangata xanticho ek korar kortolom, ani desantlea bhirankull ranvotti zonvarank kaddun uddoitolom, jea vorvim tim ranvott vattarant surokxit ritin jietolim ani ranamnim nhidtolim.
26 Hanv tankam ani mhojea dongra bhonvtonnim aslolo vattar ek besanv koso kortolom, ani hanv sarkea vellar paus poddom-so kortolom. Pausa bhaxen besanvam thoim votʼtolim.
27 Moidanantlim zhaddam aplim follam ditolim ani zomin aplem pik ditoli. Ani mhozo lok desant surokxit jietolo. Tancher dovorlolem zum hanv moddttolom ani hanv tankam gulamponnantlean soddoitolom tednam hanv Jehova mhunn tankam vollkhon gheunk poddttolem.
28 Tea uprant, porot kednanch raxttram tancho xikar korchimnant, ani prithume voilim ranvotti zonvaram tankam khaun uddounchimnant. Tim surokxit ritin jietolim ani tankam konnuch bhieonchona.*
29 “‘“Hanv tankam oslo ek mollo ditolom, zo tachea pikek lagon famad zatolo, tea uprant te porot kednanch tea desant bhukek lagon morchenant, ani dusrim raxttram porot kednanch tancho opman korchimnant.
30 ‘Hanv Jehova tancho Dev tanchea sangata asam, ani tim, mhunnche Izraelachem ghorannem mhoje lok zaun asat mhunn tankam vollkhon gheunk poddttolem,’ oxem Akʼkhea Vixvacho Dhoni Jehova mhunntta.”’
31 “‘Tumi zalear, mhojea menddramno, hanv kallji ghetam tea menddramno, tumi fokot munis zaun asat ani hanv tumcho Dev,’ oxem Akʼkhea Vixvacho Dhoni Jehova mhunntta.”
