Ezekiel 6:1-14
6 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Izraelachea porvotam vatten tujem tondd kor ani tanchea add bhasaunni kor.
3 Tum tankam sang, ‘Izraelachea porvotamno, Akʼkhea Vixvacho Dhoni Jehovacho sondex aik: Akʼkhea Vixvacho Dhoni Jehova, porvotank, dongrank, vhallank ani falkeank oxem mhunntta: “Polloi! Hanv tumchea add ek tolvar haddttolom ani tumchea unch zageancho nas kortolom.
4 Hanv tumchea vedincho purnn toren nas kortolom, tumchim dhumpachim stenddam moddun uddoitolom, ani jivexim marlolea tumchea lokank kanttallo haddtta tea tumchea murteam* mukhar uddoitolom.
5 Hanv Izraelachea lokanchim moddim tanchea kanttallo haddtta tea murteam mukhar uddoitolom, ani tumchim haddam tumchea vedichea sorvbhonvtonnim ximpddaitolom.
6 Tumi ravtat tea soglea zageanchem nisontton zatolem, tumchea unch zageancho purnn toren nas zatolo ani te padd zaun urtole. Tumchea vedincho purnn toren nas zaun tancho churo zatolo. Tumcheo kanttallo haddtta teo murteo kabar zaun voitoleo. Tumchim dhumpachim stenddam moddon voitolim ani tumchea hatanchim kamam nanch zatolim.
7 Jivexim marlolea lokanchim moddim tumchea modem poddlolim astolim, ani tednam hanv Jehova mhunn tumkam vollkhon gheunk poddttolem.
8 “‘“Punn hanv tumchea modlea thoddea lokank jivo dovortolom. Tumi dusrea desamnim ximpoddttole tednam tumchea modle thodde lok tolvari thaun vanchtole.
9 Ani vanchon urlolea jea lokank dusrea raxttram modem koidi korun vhortole, te thoim mhozo ugddas kortole. Tanchea ovisvaxi* kallzak lagon tannim mhaka fatt keli ani tanche dolle kanttallo haddtta toslea murteank axelʼle asle* dekhun, mhojem kalliz kitlem dukhovlem tem tankam kollon ietolem. Tannim kelʼlea soglea vaitt ani vitt haddtta toslea kamanchi tankam loz distoli ani vitt ietoli.
10 Hanv Jehova, ani hanvem tankam tancher odruxtt haddttolom mhunn dilʼli dhomkaunni poki nasli mhunn tankam vollkhon gheunk poddttolem.”’
11 “Akʼkhea Vixvacho Dhoni Jehova oxem mhunntta: ‘Niraxiponnan talleo vazoi ani dukhant tuje paim dhaddai, ani Izraelachea ghorannean kelʼlea soglea vaitt ani vitt haddtta toslea vostunk lagon dukh kor. Karonn te tolvarin, bhuken ani pidden moron poddttole.
12 Zo pois asa to pidden mortolo, zo lagim asa to tolvarin moron poddttolo, ani zo hea vostum thaun pollon voita ani vanchon urta to bhuken mortolo. Ani hanv mhozo soglo rag tancher votoitolom.
13 Jea lokank jivexim marun uddoitole tanchim moddim, tanchea kanttallo haddtta tea murteam modem, tanchea vedinchea sorvbhonvtonnim, tanchea dor eka unch dongracher, tanchea soglea porvotanchea tengxer, tanchea dor eka hirvea panamnim bhorlolea zhadda ponda ani vhoddlea zhaddanchea khandeam ponda poddlolim astolim, zoim te aplea kanttallo haddtta tea murteank khuxal korunk pormollit bolidanam bhettoitale. Tednam hanv Jehova mhunn tumkam vollkhon gheunk poddttolem.
14 Hanv mhozo hat ubarun tancho des padd korun soddttolom. Tanche sogle ravpache zage Dibla lagim aslolea ranvott vattara poros chodd padd zaun voitole. Ani tednam hanv Jehova mhunn tankam vollkhon gheunk poddttolem.’”
