Ezekiel 12:1-28
12 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, tum jea lokam modem ravta te add voita toslea ghoranneache lok zaun asat. Tankam dolle asat punn te polloinant, ani tankam kan asat punn te aikonant. Karonn te odhikara add voita toslea ghoranneache lok zaun asat.
3 Tum zalear, munxachea puta, koident vochonk tujem saman band. Uprant disachea vellar lok tuka polloitat tednam tunvem koident vochonk zai. Te tuka polloita astananch, tujea ghora thaun eka dusrea zagear koident voch. Te odhikara add voita toslea ghoranneache lok zaun asat zalear pasun, te ghoddie tujer dhean di-it.
4 Disachea vellar lok tuka polloitat tednam tunvem koident vochonk, bandlolem tujem saman bhair hadd. Ani sanjechea vellar te tuka polloita astananch, ekleak koident vhortat tea bhaxen cholonk lag.
5 “Te tuka polloita astananch, vonttik ek burak mar ani tujem saman gheun tantuntlean bhair sor.
6 Te tuka polloita astanach, tujem saman khandar mar ani kallokh astananch thoinchean voch. Tuka zomin disona zaunk tujem tondd dhamp, karonn hanv tuka Izraelachea ghorannea pasot ek khunna koso kortam.”
7 Mhaka adnea dilʼli toxench hanvem kelem. Koident vochonk eklo aplem saman bhair haddtta toso, hanvem disachea vellar mhojem saman bhair haddlem. Sanjechea vellar hanvem mhojea hatamnim vonttik burak marlo. Magir kallokh zalo tednam hanvem mhojem saman ghetlem, ani tanchea dolleam mukhar tem mhojea khandar gheun bhair sorlom.
8 Sokallim Jehovacho sondex porot ek pavtt mhaka mellʼllo. Tannem mhunnttlem:
9 “Munxachea puta, odhikara add vochpi Izraelachea ghoranneachea lokamnim tuka oxem vicharunk na kai, ‘Tum kitem korta?’
10 Tum tankam sang, ‘Akʼkhea Vixvacho Dhoni Jehova oxem mhunntta: “Ho sondex Jeruzalem xarantlea raz korpea vixim ani xarant aslolea akʼkhea Izraelachea ghorannea vixim asa.”’
11 “Tum tankam sang, ‘Hanv tumchea pasot ek khunna zaun asam. Hanvem zoxem kelam, toxench tanchea sangata ghoddttolem. Te koidi zaun gulamponnant voitole.
12 Tanchea modem aslolo mukheli aplea khandar aplem saman ghetolo ani kallkhant bhair sortolo. To vonttik burak martolo ani aplem saman gheun tantuntlean voitolo. Zomin disona zaunk to aplem tondd dhamptolo.’
13 Hanv tacher mhojem zall uddoitolom ani to tantunt sampoddttolo. Uprant hanv taka Babilonant, Kaldeikaranchea desant haddttolom. Punn to des to pollounchona, ani thoim to mortolo.
14 Tachea bhonvtonnim aslolea sogleank, tachea modot korpeank ani tachea soinikanchea zomeank hanv soglea vattamnim ximpddaitolom. Ani hanv tolvar gheun tanchea fattik lagtolom.
15 Hanv tankam veg-vegllea raxttramnim ani desamnim ximpddaitolom tednam hanv Jehova mhunn tankam vollkhon gheunk poddttolem.
16 Punn tanchea modlea thoddeank hanv tolvar, bhuk, ani pidde thaun soddoitolom. Jea vorvim te voitole tea raxttram modem apnnem kelʼlea soglea vitt haddtta toslea kamam vixim te sangtole, ani hanv Jehova mhunn tankam vollkhon gheunk poddttolem.”
17 Jehovacho sondex porot ek pavtt mhaka mellʼllo. Tannem mhunnttlem:
18 “Munxachea puta, tunvem koddkoddon tuzo unddo khaunk zai, ani bhirantin ani uskean bhoron udok pieunk zai.
19 Tum hea desantlea lokank sang, ‘Izraelachea desant ravtolea Jeruzalemachea lokank Akʼkhea Vixvacho Dhoni Jehova oxem mhunntta: “Te uskean bhoron aplo unddo khatole ani bhirantin bhoron aplem udok pietole, karonn desant ravtoleamnim ji maramari kelea taka lagon tancho des purnn toren padd zaun voitolo.
20 Jea xaramnim lok ravtat tancho nas zatolo ani tancho des padd zaun voitolo. Tednam hanv Jehova mhunn tumkam vollkhon gheunk poddttolem.”’”
21 Jehovacho sondex porot ek pavtt mhaka mellʼllo. Tannem mhunnttlem:
22 “Munxachea puta, Izraelant lok hi kosli mhunnʼnni mhunnot ravtat, ‘Dis vochot asat, punn ekui dorxon purnn zaina’?
23 Taka lagon tankam sang, ‘Akʼkhea Vixvacho Dhoni Jehova oxem mhunntta: “Hanv hi mhunnʼnni bond kortolom ani Izraelant hi mhunnʼnni konnuch porot uzar korchona.”’ Punn tum tankam sang, ‘Te dis lagim asat jednam dor ek dorxon purnn zatolem.’
24 Karonn Izraelachea ghoranneant hea fuddem kednanch khottem dorxon vo fosoita* tosli bhasaunni aschina.
25 ‘“Karonn hanv, Jehova uloitolom. Hanv sangtam tem vell korinastana ghoddon ietolench. Odhikara add vochpi ghoranneachea lokamno, tujea disamnim hanv jem uloitolom, tem purnn pasun kortolom,” oxem Akʼkhea Vixvacho Dhoni Jehova mhunntta.’”
26 Jehovacho sondex porot ek pavtt mhaka mellʼllo. Tannem mhunnttlem:
27 “Munxachea puta, Izraelache lok* oxem mhunnttat, ‘To polloita tem dorxon purnn zaunk azun zaito vell asa, ani to ji bhasaunni korta ti fuddara vixim asa.’
28 Taka lagon tum tankam sang, ‘Akʼkhea Vixvacho Dhoni Jehova oxem mhunntta: “‘Hanvem sanglolem khoinchench utor purnn zaunk vell lagchona. Hanv jem sangtam tem ghoddon ietolench,’ oxem Akʼkhea Vixvacho Dhoni Jehova mhunntta.”’”
