Ezekiel 11:1-25
11 Eke xokten* mhaka voir ubarun Jehovachea mondirachea udente vatten aslolea darvonttea lagim vhelo. Tea darvontteachem tondd udente vatten aslem. Darvonttea lagim bhitor sortat thoim hanvem 25 munis polloile, je lokanche kunvor asle. Tanchea modem Azuracho put Jazania ani Benaiacho put Pelatia pasun aslo.
2 Uprant Devan mhaka mhunnttlem: “Munxachea puta, he tech munis zaun asat je vaitt manddnneo kortat ani hea xarant* lokank vaitt solʼlo ditat.
3 Te mhunnttat, ‘Ho ghoram bandcho vell nhoi kai? Hem xar* ek randpachem aidon* ani ami tachea bhitor aslolem mas zaun asat.’
4 “Tor munxachea puta, bhasaunni kor. Tanchea add bhasaunni kor.”
5 Uprant Jehovachi xokti mhojer aili ani tannem mhaka mhunnttlem: “Tankam sang, ‘Jehova oxem mhunntta: “Izraelachea ghoranneachea lokamno, tumi jem uloileat tem ekdom sarkem asa. Tumi kitem chintʼtat tem hanv zannam.
6 Tumi hea xarant zaiteank marun uddoileat ani tanchea moddeamnim roste bhorleat.”’”
7 “Taka lagon, Akʼkhea Vixvacho Dhoni Jehova oxem mhunntta: ‘Hoi, hem xar ek randpachem aidon zaun asa. Punn hea xarant tumi jim moddim ximpddaileant, tim khorem mhunnttlear, tantuntlem mas zaun asa. Ani tumchea vixim sangpachem zalear tumkam tantuntlean bhair kaddun uddoitole.’”
8 “Akʼkhea Vixvacho Dhoni Jehova mhunntta, ‘Tumi tolvarik bhietat nhoi? Atam polloiat hanv tumcher tolvaruch haddttolom.
9 Hanv tumkam xarantlean bhair kaddttolom ani porkeanchea tabeant kortolom ani tumkam khast ditolom.
10 Tumi tolvarin moron voitole. Izraelachea ximer hanv tumkam khast ditolom ani hanv Jehova mhunn tumkam vollkhon gheunk poddttolem.
11 Hem xar eka randpachea aidona bhaxen tumchi rakhonn korchem na ani tumi masa bhaxen tantunt bhitor surokxit ravonkui pavchenant. Karonn hanv Izraelachea ximer tumkam khast ditolom.
12 Hanv Jehova mhunn tumkam vollkhon gheunk poddttolem, karonn tumi mhojea nem-kaideam pormonnem cholonk nant ani mhojea nitichea nirnnoi-am pormonnem kam korunk na. Tachea bodlek, tumi tumchea bhonvtonnchea raxttranchea nitichea nirnnoi-am pormonnem kam kortat.’”
13 Hanvem bhasaunni korun zatanch, Benaiacho put Pelatia melo ani hanv zomnir umto poddlom. Hanvem vhoddlean bob marun mhunnttlem: “Akʼkhea Vixvachea Dhonia Jehova Deva, tum Izraelachea urlolea lokancho osoch purnn toren nas kortolo kai?”
14 Jehovacho sondex porot ek pavtt mhaka mellʼllo. Tannem mhunnttlem:
15 “Munxachea puta, zomin soddouncho hokʼk asa tea tujea bhavank, ani teach borabor Izraelachea akʼkhea ghoranneachea lokank Jeruzalemant ravtoleamnim oxem sanglam, ‘Tumi Jehova thaun pois ravat. Ho des amcho zaun asa, to amchea tabeant dila.’
16 Taka lagon tum oxem sang, ‘Akʼkhea Vixvacho Dhoni Jehova oxem mhunntta: “Hanvem tea lokank hea desantle kaddun poisulʼlea desamnim dhanvddaileat ani thoim tankam ximpddaileat zalear pasun, hanv tea desamnim thoddea vellak lagon tanchea pasot povitr zago zatolom.”’
17 “Taka lagon tum oxem sang, ‘Akʼkhea Vixvacho Dhoni Jehova oxem mhunntta: “Hanvem tumkam ximpddailʼlea dusrea desam thaun ani raxttram thaun hanv tumkam ektthaim kortolom. Uprant, hanv tumkam Izraelacho des ditolom.
18 Te Izraelant porot voitole ani thoim thaun sogleo kanttallo haddtta teo vostu ani vitt haddtta toslim kamam kabar korun uddoitole.
19 Hanv tanchem sogleanchem kalliz ek kortolom,* ani tanchea bhitor ek novo sobhav toiar kortolom. Hanv tanchem fatrachem kalliz kaddun tankam masachem kalliz ditolom.*
20 Tannim mhojea kaidea pormonnem cholchem, mhojea nitichea nirnnoi-ancher dhean diunchem ani te pallche mhunn hanv oxem kortolom. Tednam te mhoje lok zatole, ani hanv tancho Dev zatolom.”’
21 “‘“Punn jea lokamnim kanttallo haddtta teo vostu ani vitt haddtta toslim kamam korit ravtole mhunn tharailam, hanv tankam tanchea vagnnukecho porinnam bhogunk laitolom,” oxem Akʼkhea Vixvacho Dhoni Jehova mhunntta.’”
22 Magir kerubimnim aple pakhotte voir ubarle ani tanchea laginch rodham aslim, ani Izraelachea Devachi mhoima tancher asli.
23 Uprant, Jehovachi mhoima xara thaun voir vochonk lagli, ani ti vochon xarachea udentek aslolea porvotacher ravli.
24 Magir eke xokten* mhaka voir ubarlo—Devache xokte vorvim mellʼllolea dorxona udexim mhaka ubarlo—ani Kaldeient koident aslolea lokam lagim haddlo. Tednam hanv polloitalom tem dorxon somplem.
25 Ani Jehovan mhaka dakhoilʼleo sogleo vostu hanv koident aslolea lokank sangonk laglom.
Footnotes
^ Hanga uzar kelʼlea Hebrev utracho orth, povitr xokti vo ek devdut zaunk xokta.
^ Vo “xarachea add.”
^ Mhunnche, Jeruzalem xar. Apunn hea xarant ekdom surokxit asat oxem Judevank distalem.
^ Vo “vhoddlea tonddachem randpachem aidon.”
^ Utran utor, “Hanv tankam sogleank ek kalliz ditolom.”
^ Mhunnche, Deva koddlean melltta tem margdorxon apnnaunk toiar asa toslem kalliz.
^ Hanga uzar kelʼlea Hebrev utracho orth, povitr xokti vo ek devdut zaunk xokta.
