Hem Pustok Kiteak Gorjechem

1. Jehovan Danielak provadi mhunn kednam nemlo?

 DEVACHE lok ekdom kotthin vellar jietale tednam Jehovan Danielak provadi mhunn nemlo. Judachea razak Babilonant koidi korun vhelʼlo. Jeruzalem xaracho ani thoim aslolea Devmondiracho nas kelʼlo. Ani Devachea lokank Babilonant koidi korun vhelʼlim. Tea vellar, Babilonant Jehovan Danielak tachea nanvachem ek pustok borounk sanglem. Tantuntlean, Jehova Bhov Vorto Dev mhunn tannem koxem dakhoilem tem ami xiktat. Toxench, Akʼkhea Vixvacho Raza zalʼlean to fuddarak koslim ojapachim kamam kortolo tem-ui xiktat.—2:20; 6:26, ftn.

2. Danielachea pustokant (a) Devache Razvottke vixim amkam kosli mahiti melltta? (b) Mesiasa vixim kitem bhasailam?

  ² Hea pustokant, Jehovan Danielak aple razvottke vixim zaiti novi mahiti kolloili. Zoxem, tea razvottkecho raza Mesias astolo mhunn tannem Danielak sanglem. Toxench ti razvottki kitem kortoli, konnacher raz choloitoli ani Mesiasa sangata anik konn raz kortole tem sanglem. (2:35, 44; 7:13, 14, 18) Tea bhair Mesias kednam ietolo, taka kednam jivexim martole, ani to sorgar kednam raz cholounk suru kortolo tem-ui sanglem. Udharonnak, eke bhasaunnent Jehovan Danielak ‘70 sumanancho’ ek kall astolo mhunn sanglem. Tea kallachea xevottak Mesias ietolo ani taka jivexim martole. Tea uprant Jeruzalemacho nas zatolo. (9:24-26;  Boks 27-A polloiat.) Uprant, Nehemiasan to kall kednam suru zalo tem sanglem. (Ne 2:1, 5-8) Anik eke bhasaunnent “sat kall” somptoch Mesias razvottki cholounk suru kortolo mhunn Danielan sanglem. (4:16, 17;  Boks 27-C polloiat.) Uprant Jezun tea kallak “raxttrancho tharailʼlo kall” oxem mhunnttlem, ani to kall somptoch apunn razvottki cholounk suru kortolo mhunn sanglem.—Lu 21:20-24; Mt 24:1-3, 15.

3. Danielachea pustokant sorkaram vixim kitem sanglam?

³ Jehovan Danielak eka-fattlean-ek khoinche bollixtt sorkar raz kortole tem-ui sanglem. Hem amkam Daniel odheai 2, 7, 8, ani 10-12-nt vachunk melltta. Tannem Danielak, Babilona uprant khoincheo bollixtt razvottkeo ietoleo ani ‘xevottachea kallar’ khoincho sorkar raz choloitolo tem-ui sanglem. (12:4; nwt-E App. B9) He sogle sorkar apleak man diunche nant, aplea lokank dhumallo ditole ani apunn aplea Rajea vorvim tancho nas kortolo mhunn tannem Danielak kolloilem. (7:23-26) Toxench, Danielan zonvaranchim dorxonam polloilim ani tim-ui sorkarank suchit kortat mhunn sanglem. Hea vorvim Prokasovnni pustokant sanglolim zonvaram pasun sorkarank suchit kortat mhunn kolltta.—Da 7:15-17; Pro 13:1, 2; 17:3.

4. Danielachea jivitantlea ghoddnneantlean ami kitem xiktat?

⁴ Jehovan Danielak tachea jivitantleo thoddeo ghoddnneo pasun borounk sangleo, jea vorvim amkam mhotvachim lisanvam xikonk mellttat. Zoxem, ekdom kotthin poristhitint Danielan ani tachea ixttamnim Devache kaide moddunk nant. Hantuntlean, ami ekdom kotthin poristhitint pasun Jehovak visvaxi ravonk zai mhunn xiktat. (1:8; 3:16-18; 6:10) Toxench, margdorxon mellonk Danielan khaltikaien Jehova lagim magnnem kelem. Hea vorvim ami pasun khaltikai ho gunn vaddounk zai mhunn xiktat. (2:19-23; 9:3-19) Tea bhair Dev razank xikxa ditolo mhunn Danielan dhiran sanglem, ani taka xinvanchea dholint uddoitole mhunn khobor aslear pasun tannem Jehova lagim magnnem korop bond korunk na. Tachea udharonnantlean Jehova amkam pasun dhirvont zaunk modot kortolo mhunn ami xiktat.—4:27; 5:22, 23; 6:6-10, 16, 17.

5. Daniel pustokant Jehova vixim ami kitem xiktat?

⁵ Daniel pustokant Jehova koslo Dev tem amkam kolltta. Zoxem, to gutt Kolloupi Dev zaun asa. Karonn fuddarak kitem ghoddttolem tem to aplea sevokank kolloita. (2:47) Toxench, to aplea visvaxi sevokank Salvar Korpi zaun asa. Karonn to tankam mornnantlean salvar korta, ani jivontponnacho bhorvonso pasun dita. (6:27; 12:13) Tea bhair, to aplea visvaxi sevokank Inam Diupi zaun asa. Karonn to tankam apli khuxi somzonk modot korta ani kotthin vellar thir ravonk boll dita. (1:17; 10:19) Ani mhotvachem mhunnttlear Jehova ekloch Sogleant Vorto Raza zaun asa. Fokot Daniel pustokant Jehova vixim sangtana to “munxanchea rajeant Raz choloupi” ani ‘Sogleant Vorto Dev’ him utram vachunk mellttat. a—4:17; 7:18.

Pustok Vachʼchea Poilim Hem Zannam Zaiat

6. Daniela vixim ami kitem zannant?

 ⁶ Boroupi: Hem pustok Danielan boroilem. Tachea nanvacho orth, “Dev Mhozo Neai Korpi” zaun asa. To Juda kullantlo aslo ani ghoddie Jeruzalemantlea razachea ghoranneantlo aslo. 617 K.X.A.-ant to ghoddie tornatto aslo tednam taka Babilonant koidi korun vhelo. (1:1-3, 6) Thoim to rajmahalant seva korunk laglo ani uprant tannem Medie-Persiechea sorkara khala odhikari mhunn kam kelem. (1:4; 6:1, 2) Jehovan Danielak khub zannvai dili ani lokui taka khub man ditalo. Ezekielan jem boroilem tantuntlean pasun hem kollon ieta. (Ez 14:14, 20; 28:3; Da 1:17-20) Sumar 606 K.X.A.-ant, Jehovan Danielak provadi mhunn nemlo. (2:1, 19) Ani 536 K.X.A.-ant, tannem nimannem dorxon polloilem. (10:1) Tor Daniel sumar 100 vorsam jielo oxem dista. Hantuntlim 78 vorsam tannem Babilonachea razvottke khala, ani tin vorsam Medie-Persiechea razvottke khala sarlim astolim. Danielan aplea nanvachem pustok sumar 536 K.X.A.-ant boroun sompoilem, punn tantuntleo thoddeo vostu tannem poilinchea vorsamnim boroilʼleo.—7:1;  Boks 27-B polloiat.

7. Kitem zannam zalʼlean Daniel pustok bore bhaxen somzonk amkam modot zatoli?

⁷ Pustok boroilʼlem tednam kitem ghoddttalem: 620 K.X.A.-ant, Babilonacho Raza Nebukadnezaran Judachea lokam koddlean tax gheunk suru kelem. Punn Judacho raza oxem korunk sodhinaslo dekhun, Nebukadnezaran Jeruzalemacher akromonn kelem ani 617 K.X.A.-ant tacher zoit vhelem. (2Ra 24:1, 10-12) Tednam tannem razachea ghoranneantlea ani “ganvchea unch kulliechea monʼxank” toxench Danielak Babilonant koidi korun vhele. (2Ra 24:15) Thoddea vorsam uprant, mhunnche 607 K.X.A.-ant Babilonan Jeruzalemacho nas kelo, ani anikui zaitea Judevank Babilonant koidi korun vhelim. Punn 539 K.X.A.-ant Medi-Persien Babilonacher akromonn kelem tednam, foujecho fuddari Sirusan Babilonacher zoit vhelem. Medi-Persien Zerubabelak Judacho Razpal nemlo ani to, toxench thodde Judev lok porot Judant gele. Tea vellar Daniel jivo aslo.—Ezr 1:1-8; 2:1, 2; Hag 1:1.

8. Daniel pustokachi manddavoll koxi asa, ani tem khoinchea don bhasamnim boroilʼlem?

⁸ Anik mahiti: Daniel pustokache don bhag korunk zatat: Odheai 1-6 ani odheai 7-12. Poilea bhagant, Daniel ani tachea tin ixttank kitem ghoddlem ani razamnim jim dorxonam polloilim tea vixim sanglam. Him dorxonam bhasaunneo asleo ani Danielan tancho orth sanglo. Hea odheai-amnim boroilʼleo ghoddnneo, zoxeo zalʼleo teach manddavollin boroilʼleo asat. Dusrea bhagant, Jehovan Danielak jim dorxonam dakhoilʼlim tea vixim boroilʼlem asa. Danielan odheai 1, Hebrev bhaxent boroilo. Uprant, fuddarak sorkaranchem kitem zatolem tem boroitana tannem Aramaik bhas uzar keli. (2:4b–7:28) Magir odheai 8-12 tannem porot Hebrev bhaxent boroile. Tantunt, munxanche sorkar Devachea lokancher raz kortole tednam kitem zatolem tem sanglam.

Hem Pustok Thoddeach Utramnim

9. Daniel ani tache ixtt Babilonant aile tednam kitem zalem?

⁹ Babilonant proxikxonn. (1:1-21) 617 K.X.A.-ant Daniel, Hanania, Mishael ani Azaria b Babilonant ailʼle tednam, thoinchea raza pasot kam korunk tankam proxikxonn diunk suru kelem. Tea vellar, raza jevtalo tench jevonn tankam-i khaunk dilem. Punn tem Devachea kaideam add aslolean tannim tem sarkench nakarlem. Uprant Jehovan tankam itli zannvai dili, jitli Babilonantlea her khoincheach zannarak nasli. Ani hi khobor akʼkhea Babilonant posorli.—1:20.

10. Sumar 606 K.X.A.-ant kitem ghoddlem?

¹⁰ Ek vhoddli murti. (2:1-49) Sumar 606 K.X.A.-ant, Nebukadnezaran sopnant ek vhoddli murti polloili. To utthlo tednam apleak kitem sopon poddlolem ani tacho orth kitem tem tannem Babilonantlea soglea zannarank sangonk lailem. Punn te oxem korinant zalear to tankam jivexim martolo mhunn tannem sanglem. Razak kitem sopon poddlolem ani tea sopnacho orth kitem tem fokot Daniel sangonk xoklo. Tednam Jehova “gutt Kolloupi Dev” mhunn razan vollkhon ghetlem. Ani Danielak Babilon jilʼleacho odhikari mhunn nemlo. Toxench Hanania, Mishael, ani Azariak taka modot korunk vinchun kaddle.

11. Danielache tin ixtt Jehovak koxe visvaxi ravle, ani tacho porinnam kitem zalo?

¹¹ Ujeachi bhottʼtti. (3:1-30) 606 K.X.A. vo tachea thoddea vella uprant, Nebukadnezar eke vhoddle bhangrache murtechem udgatton dovorta. Punn Hanania, Mishael, ani Azaria tea murtechea paim-am poddon tichi bhokti korunk nakartat tednam, Nebukadnezar itlo ragar zata ki to tankam ujeache bhottʼttent uddoita. Punn Jehova aplea eka dutak dhaddun tankam salvar korta. Hem polloun Nebukadnezar Jehovak vakhanntta, Jehovachi bhokti kortoleank toxem korunk svotontrtai dita, ani Hanania, Mishael, ani Azariak aplea sorkarant anikui chodd podvi dita.

12. Daniel odheai 4-ant amkam kitem vachunk melltta?

 ¹² Ek khubuch vhoddlo rukh. (4:1-37) Hea odheai-ant, Nebukadnezaran aplea lokank boroilʼli chitt vachunk melltta. Hi chitt tannem ghoddie 600 K.X.A.-achea thoddea vella uprant boroilʼli. Tea chittint to boroita ki taka ek sopon poddlem zantunt tannem ek vhoddlo rukh polloilo. Konn eklean to rukh katrun uddoilo, ani taka pottʼttean bandun ‘sat kallam’ pasot dovorlo. Uprant tea sopnacho orth ani aplea sangata kitem zatolem tem Danielan sanglem mhunn to boroita. (4:25;  Boks 27-C polloiat.) Danielan sanglolem toxem Nebukadnezar piso zata ani razvottki cholounk xokona. Punn thoddea tempan to boro zata ani porot raz korunk lagta. Tednam Jehova Bhov Vorto Dev, ani to sasnak raz choloitolo mhunn to manun gheta.

13. 539 K.X.A.-ant khoinchi bhasaunni ghoddon ieta?

¹³ Vontticher hatachem borovop. (5:1-31) 539 K.X.A.-achea Otumbr 5 tarker, ek hat vontticher kitem tori boroita tem Babilonacho Raza Belshazar polloita. Punn tacho orth konnankuch kollona dekhun to Danielak apoita ani tem vachunk, toxench tacho orth somzaunk laita. Tednam Daniel ghoddie 90-am poros chodd vorsancho aslo. To razak sangta ki Medi ani Persieche lok Babilonacher zoit vhortole. Hi bhasaunni teach ratik ghoddon ieta. Medi ani Persieche lok Babilonacher akromonn kortat, Belshazarak jivexim martat ani Darius Babilonacho raza zata.—5:30, 31.

14. Zanntte piraier Jehovak visvaxi ravonk Danielak kiteak kotthin zalem astolem?

¹⁴ Xinvanchi dhol. (6:1-28) Babilonacho nas zaun thoddeach vella uprant, Darius Danielak aplea sorkarant vhoddlo odhikari mhunn nemta. Hem polloun dusrea odhikareank Danielachi nattkai zata ani te taka jivexim marunk manddnni kaddttat. Tor to Jehovak magnnem korta hem nimit gheun te taka xinvanchea dholint uddoitat. Punn Jehova Danielachi rakhonn korta. Toxench Darius aplea rajeachea dor eka vattarantlea lokank Jehovak kallzant thaun resped diunk hukum dita.

15. Danielan polloilʼlea dorxonant Jehova konna koddlean razvottki kaddun gheta ani ti konnak dita?

¹⁵ Char zonvaram. (7:1-28) 553 K.X.A.-ant, sumar 75 tem 85 vorsancho astana Daniel ek dorxon polloita, zantunt char zonvaram aslim. Tim zonvaram char razvottkenk vo sorkarank suchit kortat. Tantuntlea chovtea zonvarak dha xingam asat, zanchea ‘modlean ek lhan xing voir sorta’ ani tin xingank umttun kaddtta. (7:8) Uprant Daniel munxachea puta sarko konnak tori polloita, zaka sasnachi razvottki melltta. (7:13, 14) Toxench, tem lhan xing sadde-tin kallam pasot “povitr lokank” sotaitolem mhunn taka kolltta. (7:21, 25) Uprant Jehova tea lhan xinga thaun razvottki kaddun gheta, tea zonvaracho nas zata ani “Sogleant Vortea Devachea povitr lokank” sasnachi razvottki melltta.—7:26, 27.

16. Daniel odheai 8-antlea bhasaunne pormonnem menddreachem ani bokddeachem kitem zata?

¹⁶ Menddro ani bokddo. (8:1-27) 551 K.X.A.-ant, Daniel ek dorxon polloita, zantunt taka don xingancho menddro dista. Ho menddro Medi ani Persiechea razvottkek suchit korta. Eka vorsa uprant, mhunnche 550 K.X.A.-ant, Medi ani Persia ek zatat ani Sirus razvottki choloita. Tea dorxonant Daniel ek vhodd xingacho bokddo polloita, zo tea menddreak jivexim marta. Ho bokddo Grisak suchit korta. Uprant tea bokddeachem xing moddtta ani tachea bodlek char xingam voir sortat. Hea char xingam modlea, eka xinga thaun ek lhan xing bhair ieta, jem eka ragixtt razak suchit korta. Xevottachea kallar ho raza apunnuch vhodd mhunn somzota ani povitr zageacho nas korta. 2,300 disam uprant, povitr zageak poilim bhaxen tache sarke poristhitint porot haddttat. Xevottak, ho ragixtt raza ‘munxan hat lainastana moddon poddtta.’—8:25.

17. Danielan vinoti kelea uprant devdut Gabriel taka kitem sangta?

¹⁷ 70 vorsam ani 70 sumanam. (9:1-27) Jeruzalem 70 vorsam padd zaun urtolem, hea bhasaunne vixim Daniel ghoddie 539 K.X.A.-ant somzolo. Tednam him 70 vorsam kabar zait ailim mhunn taka kollon ailem. Hem somzon sumar don vorsam uprant, Sirus Judevank porot Jeruzalemant vochonk porvangi dita. c (2It 36:23; Ezr 1:1-11; 2:64) Devmondirant porot Jehovachi bhokti suru zaunchi mhunn Daniel Jehova lagim vinoti korta. Tednam devdut Gabriel Danielak dixtti poddtta ani ‘70 sumanancho,’ ek kall astolo mhunn sangta, zantunt dor ek suman sat vorsanchem astolem. (9:24, ftn.) Hea bhasaunnent zaiteo ghoddnneo mellon asat: Patkanchem farikponn zatolem; Jeruzalem porot bandtole; Mesias ietolo ani uprant taka jivexim martole; “xaracho ani povitr zageacho” nas zatolo; 70 sumanachea xevottak poriant korar urtolo; ani tem suman kabar zait ieta tednam bolidanam bhettounchem bond zatolem.—9:26.

18. Eka-meka add zhuztat tea razanchea dorxonantlean ‘xevottachea disam’ vixim kitem kollon ieta?

¹⁸ Eka-meka add zhuztat te raza. (10:1–12:13) 536 K.X.A.-ant, Daniel sumar 100 vorsancho aslo tednam, “xevottachea disamnim” kitem ghoddttolem tea vixim tannem ek dorxon polloilem. (10:14) Hem tannem polloilʼlem nimannem dorxon aslem. Persiecho raza “dor ekleak Grisachea rajea add uksaitolo” mhunn taka kolltta. (11:2) Uprant eka bollvont rajeache char vantte zatat. Toxench utʼtorecho ani dokxinnecho raza podvi mellonk eka-meka add zhuztat. Tea vellar utʼtorecho raza povitr zago oxudʼdh korta, sodanch bhettoitat tim bolidanam kaddun uddoita ani ‘nisontton korta tosli vitt haddpi vost ubi korta.’ (11:29-31) Xevottachea kallar he donui raza eka-meka add ‘zhuztat.’ (11:40-45) Uprant, utʼtorecho raza, “Sobit Desant” ghusta. Ekdom trasanchea vellar, Mikael Devachea povitr lokam pasot ubo ravta. Ek devdut vicharta: “Heo ojapacheo vostu purnn zaunk kitlo vell urla?” Tednam anik ek devdut sadde-tin kallam vixim sangta. Uprant to anik don kallam vixim sangta. Mhunnche 1,290 dis ani 1,335 dis. Daniel visov ghetolo, punn “vell ietolo tednam” to uttʼttholo mhunn to devdut Danielak sangta. (12:6, 7, 11-13) Hem dorxon polloun somplea uprant, Daniel aplea nanvachem pustok boroun sompoita.