Daniel 8:1-27
8 Belshazar Razachea razvottkechea tisrea vorsa, mhaka Danielak, anik ek dorxon mellʼllem.
2 Hanvem tem dorxon polloilem, ani tem polloitalom tednam hanv Elamachea jilʼleant aslolea Shushan* kilʼleant* aslom. Hanv tem dorxon polloitalom, ani hanv Ulaiachea nhoim-e* lagim aslom.
3 Hanvem mhoje dolle ubarle tednam, polloi! nhoim-e mukhar ek menddro ubo aslo ani taka don xingam aslim. Tim donui xingam lamb aslim. Punn ek xing dusrea xinga poros lamb aslem, ani tem lamb xing uprant voir ailem.
4 Hanvem polloilem ki to menddro ostome vatten, udente vatten ani dokxinne vatten xing marta, ani khoinchench ranvotti zonvar tachea mukhar ubem ravonk xokonaslem, ani oso konnuch naslo zo taka tachea xokte* thaun soddounk xoktalo. Apleak zai toxem to kortalo, ani apleakuch voir kaddttalo.
5 Hanv polloit aslom, ani polloi! akʼkhi prithum par korun ani aple paim zomnik tenkoinastana ostome thaun* ek bokddo ietalo. Tachea dolleanchea modem ek vhoddlem xing aslem.
6 To bokddo, tea don xingam aslolea menddrea vatten ietalo, zaka hanvem tea nhoim-chea mukhar ubo aslo to polloilʼlo. To bokddo boroch ragan bhoron tachea vatten dhanvtalo.
7 To bokddo menddreachea anikui lagim ieta mhunn hanvem polloilem. Tachea monant menddrea vixim koddsann bhorloli asli. Tannem menddreacher akromonn kelem ani tachim donui xingam moddun uddoilim. Tea menddreak tea bokddeacho fuddo korunk xokti nasli. Bokddean menddreak zomnir uddoilo ani taka maddoilo, ani taka tachea hatantlean soddounk konnuch naslo.
8 Uprant, tea bokddean apleakuch khub voir kaddlo, punn to xoktivont zatanch, tachem vhoddlem xing moddlem. Magir, tea xingachea bodlek char vhoddlim xingam ailim. Him char xingam, prithumechea charui konnxeamnim* vaddlim.
9 Tea char xingam modlea eka xingantlean anik ek xing voir sorlem, jem ekdom lhan aslem. Hem lhan xing, dokxinne vatten, udente vatten* ani Sobit* Desa vatten khub vaddlem.
10 Tem vaddon itlem vhoddlem zalem ki tem mollba voilea fouje poriant pavlem. Ani tea xingan foujentlea thoddea zannank ani thoddea noketrank sokol prithumer uddoilim ani tankam maddoilim.
11 Tea xingan apleakuch foujechea Kunvra itlo vhodd korunk proitn kelo, ani sodanch bhettoitalim tim bolidanam tachea koddlean kaddun ghetlim, ani tachea pasot stapon kelʼlo povitr zago moddun uddoilo.
12 Opradak lagon, eke foujek ani sodanch bhettoitalim tim bolidanam tachea tabeant dilim, ani tem xing, sot prithumer uddoit ravlem, apleak zai tem tannem kelem ani taka ies mellʼllem.
13 Uprant hanvem eka devdutak uloitana polloilo, ani dusrea eka devdutan hea devdutak oxem sanglem: “Sodanch bhettoita tea bolidanam vixim ani nas korta toslea oprada vixim asa tem dorxon, kednam meren chalu urtolem? Kednam meren povitr zageak ani foujek maddoitole?”
14 Tannem mhaka mhunnttlem: “2,300 sanz ani sokall zaun vochona tea meren. Uprant, povitr zageak poilim bhaxen tache sarke poristhitint porot haddttole.”
15 Hanv Daniel, tem dorxon polloitalom ani tem somzon gheuncho proitn kortalom tednam, okosmat eka munxa bhaxen konn tori mhojea mukhar ubo asa to hanvem polloilo.
16 Uprant hanvem, Ulai nhoim-chea modlean eka munxacho avaz aikolo. Tannem ulo marun mhunnttlem: “Gabriel, hea munxan jem polloilam tacho orth taka somzai.”
17 Tor hanv ubo aslom thoim to ailo. Punn to ailo tednam, hanv itlo bhielom ki hanv zomnir umto poddlom. Tannem mhaka mhunnttlem: “Munxachea puta, hem dorxon xevottachea vella pasot asa mhunn zannam zav.”
18 Punn to mhojea lagim uloita astananch, hanv zomnir umto poddlom ani mhaka sust nhid lagli. Tor tannem mhaka hat lailo ani hanv poilim ubo aslom thoim mhaka ubo kelo.
19 Uprant tannem mhunnttlem: “Devachea krodhachea xevottak kitem ghoddttolem tem hanv tuka kolloitam. Karonn hem dorxon xevottachea nemlolea vella pasot asa.
20 “Tunvem polloilʼlo don xingancho menddro, Media ani Persiechea razank suchit korta.
21 Zaite kens aslolo bokddo Grisachea razak suchit korta, ani tachea dolleam modem aslolem vhoddlem xing Grisachea poilea razak suchit korta.
22 Jem xing moddun uddoilem tachea zagear char xingam voir sorlim. Hacho orth tachea raxttrantlean char rajeam voir sortolim. Punn tim rajeam tea raza itlim xoktivont aschimnant.
23 “Ani tanchea rajeachea xevottachea vellar, opradeanchea noxtteponnachem map bhoron ailea uprant, ghuspolʼleo vostu somzonk xokta toslo* ek bhirankull raza voir sortolo.
24 To khub xoktivont zatolo, punn apleach bollan nhoi. To itlea vostuncho nas kortolo ki lok ojap zatole.* Taka aplea soglea kamant ies mellttolem. To xoktivont lokancho, ani Devachea lokancho pasun nas korun uddoitolo.
25 Ies mellonk to aplea naddbudʼdhen dusreank fosoitolo. Aplea kallzan to apunnuch vhodd mhunn somzotolo. Ani surokxit aslolea vellar* to zaitea lokancho nas korun uddoitolo. To kunvranchea Kunvra add ubo ravtolo. Punn munxan hat lainastana to moddon poddttolo.
26 “Sanz ani sokall, hanchea vixim dorxonant jem sanglolem tem khorem zaun asa, punn tunvem hem dorxon gupit dovrunk zai, karonn tem aiz thaun zaitea disam uprant aslolea kalla pasot* asa.”
27 Mhojea vixim sangchem zalear, hanv Daniel samko thoklom, ani thodde dis duent poddlom. Tea uprant hanv utthlom ani razachim kamam korunk laglom. Punn hanvem jem polloilʼlem taka lagon hanv gondhollant poddlom,* ani konnankuch tem dorxon somzonk na.
Footnotes
^ Vo “Susa.”
^ Vo “rajmahalant.”
^ Vo “kanala.”
^ Utran utor, “hata.”
^ Vo “suria buddtta thoim thaun.”
^ Utran utor, “mollbantlea char vareamnim.”
^ Vo “suria udeta tea vatten.”
^ Vo “Mhoimebhorit.”
^ Vo “uprant, manddnneo korunk huxar aslolo.”
^ Vo “To bhirankull ritin nas kortolo.”
^ Vo ghoddie, “Ani xittkaunni dinastana.”
^ Vo “zaitea tempa uprant aslolea fuddara pasot.”
^ Vo “thottaklom, ghuspolom.”
