Daniel 9:1-27
9 Ahasuerusacho put Dariusachea razvottkechem hem poilem voros aslem. Darius Mediechea lokanchea sonstintlo aslo. Taka Kaldeiekaranchea rajeacho raza kelʼlo.
2 Tachea razvottkechea poilea vorsa, mhaka Danielak, pustokam* vachun hem somzon ailem, ki Jehovan Jeremias provadeak sanglolem tea pormonnem Jeruzalem 70 vorsam poriant padd zaun urtolem.
3 Tor hanvem khoro Dev Jehova vatten tondd kelem. Ani upas korun, sak ghalun ani gobrant boson tachea lagim hanv magnnem korun vinoti korunk laglom.
4 Hanvem Jehova mhojea Deva lagim magnnem kelem ani amchim patkam manun gheun oxem mhunnttlem:
“Khorea Deva Jehova, tum khub vorto ani ojapacho Dev zaun asa, tum sodanch aplo korar palltta, ani aplo mog kortat ani apleo adnea pallttat tankam visvaxi mog dakhoita toslo Dev zaun asa.
5 Ami patok kelem, vaitt kamam kelim, noxttim kamam kelim ani tujea add gele. Ami tujea adnea thaun ani tujea nitichea nirnnoi-am thaun pois gele.
6 Amchea razam lagim, kunvram lagim, purvozam lagim ani desantlea soglea lokam lagim tujea nanvan uloilʼle tea tujea sevokanchem, tujea provadeanchem ami aikonk na.
7 Jehova Deva, tum ek nitivont Dev zaun asa, punn sodanche bhaxen aizui ami amchi loz korun ghetlea. Judantlea lokamnim, Jeruzalemant ravtoleamnim, ani lagim toxench pois ravtat tea soglea Izraelachea lokamnim, zankam tunvem soglea desamnim ximpddaile tannim sogleamnim aplich loz korun ghetlea. Karonn te sogle tujea sangata ovisvaxiponnan vagleat.
8 “Jehova Deva, ami, amchea razamnim, amchea kunvramnim ani amchea purvozamnim aplich loz korun ghetlea, karonn ami tujea add patok kelam.
9 Amcho Dev Jehova kakut korpi ani bhogxita toslo Dev zaun asa, punn ami tachea add geleat.
10 Aplea sevokam udexim, mhunnche provadeam udexim, amchea Devan, Jehovan dilʼle kaide ami pallunk nant, ani hea toren ami tachem aikonk na.
11 Akʼkhea Izraelan tuzo Kaido moddlo ani tujem aikonastana tujea thaun pois gele. Taka lagon, tunvem soput gheun sanglolo ani khorea Devacho sevok Moizesachea Kaideant boroilʼlo, to xirap tunvem amcher haddlo. Karonn ami tujea add patok kelam.
12 Amcher vhodd odruxtt haddun, tunvem* amchea add ani amcher raz choloitoleam odhikaream* add tunvem sanglolim utram purnn kelim. Jeruzalemachea babtint jem ghoddlem toxem akʼkhea mollba khala aiz meren khoinch ghoddonk na.
13 Moizesachea Kaideant boroilʼlem toxem hem soglem odruxtt amcher ailem. Tori astana, amcho guneanv soddun diun ani tujem sot* somzon gheun, ami Jehova amchea Deva lagim doiechi bhik magonk na.
14 “Tor Jehova amcher nodor dovrun aslo, ani tannem amcher odruxtt haddlem. Karonn Jehova amcho Dev jem korta tea soglea kamamnim to nitivont asa, tori astana ami tachem aikonk na.
15 “Atam, Jehova amchea Deva, tunvem tujea lokank aplea xoktivont hatan Ejiptt desantlean bhair haddle ani aiz meren tunvem tujem nanv vhodd kelem. Punn ami patok kelam ani noxttim kamam keleant.
16 Jehova Deva, tum sodanch nitivontponnan vagla. Upkar korun tuzo rag ani krodh, tujem xar Jeruzalema thaun, tujea povitr dongra thaun pois kor. Amchea patkank lagon ani amchea purvozanchea guneanvank lagon, Jeruzalemacheo ani tujea lokancheo, amchea bhonvtonnim aslolim soglim moskoreo kortat.
17 Ani atam, amchea Deva, tujea sevokanchem magnnem ani tancheo vinoti aikon ghe. Ani tujea nanvam pasot, Jehova Deva, padd zaun gelʼlea tujea povitr zageacher tujea tonddacho uzvadd fankoi.
18 Mhojea Deva, dhean di ani mhojem aik! Tuje dolle ugodd ani tujea nanvan vollkhotat tea xarak polloi, amchi padd zalʼli poristhiti polloi. Ami nitivontponnachim kamam keleant dekhun nhoi, punn tujea vortea kakutik lagon ami tujea lagim vinoti kortat.
19 Jehova Deva, amchem aik. Jehova Deva, amkam bhogos. Jehova Deva, amcher dhean di ani panvl ghe! Tujea nanvam pasot, mhojea Deva, amkam modot korunk vell korinaka. Karonn tujea xarak ani tujea lokank tujeach nanvan vollkhotat.”
20 Oxe toren hanv uloit aslom ani magnnem korit aslom, ani mhojem ani mhojea lokanchem, Izraelitkaranchem patok manun gheit aslom ani mhojea Devachea povitr dongrar hanv mhozo Dev Jehova koddem doiechi bhik magot aslom.
21 Hoi, hanv magnnem korit aslom tednam Gabriel nanvacho ek munis zaka hanvem hachea poilim dorxonant polloilʼlo, to mhojea lagim ailo. Tea vellar hanv ekdom thoklolom, ani sanjechi denneachi bhett diuncho vell zalʼlo.
22 Tannem mhaka somzaun mhunnttlem:
“Daniel, atam hanv tuka soglea vostunchi anikui kholaiechi somjikai ani somzonni diunk ailam.
23 Tum vinoti korunk laglo tednam mhaka ek sondex mellʼllo ani to sondex hanv tuka sangonk ailam, karonn tum Devak khub opurbaiecho* asa. Tor, hea sondexacher dhean di ani hem dorxon somzon ghe.
24 “Tujea lokam pasot ani tujea xara pasot 70 sumanam* tharaileant. Oprad sompounk, patok kabar korun uddounk, guneanvachem farikponn diunk, sasnachem nitivontponn haddunk, dorxonacher ani bhasaunnecher* xikʼko marunk ani Bhov Povitr zago makhunk, ho vell tharaila.
25 Tum hem zannam zav ani somzon ghe ki Jeruzalemak novean bandunk ani tem aslem toxem porot bandunk adnea dita tednam thaun tem Fuddari Mesias ieum poriant, 7 sumanam toxench 62 sumanam soron voitolim. Tea xarak novean porot bandtole, ani taka ek nako ani tachea bhonvtonnim kholli kortole. Punn hem sonkoxttachea kallar zatolem.
26 “Ani magir, 62 sumanam zalea uprant Mesiasak marun uddoitole ani tachea lagim kainch urchem na.
“Ani ieuncho asa tea fuddareachi soin, xaracho ani povitr zageacho nas korun uddoitoli. Ani buddtti ieun tacho xevott zatolo. Xevottak poriant zhuz chalu astolem. Ani tharailʼlea pormonnem nisontton zatolem.
27 “Eka sumanak lagon to zaiteam pasot korar chalu dovortolo. Ani ordem suman zalea uprant, to bolidan ani denneachi bhett bond kortolo.
“Ani vitt haddtta toslea vostunchea pakhotteacher nisontton haddpi ietolo ani jem tharailʼlem tem padd zaun geloleacher pasun votoitole, tacho nas zaun vochona tea meren tem votoitole.”
