Daniel 5:1-31
5 Belshazar Raza aslo tea vellar, tannem aplea ek hozar vhoddlea odhikaream pasot ek vhoddlem jevonn dovorlem ani to tanchea mukhar drakxancho soro pietalo.
2 To pieun ttaitt zalʼlo tednam, tachea bapain Nebukadnezaran Jeruzalemantlea Devmondira thaun haddlolim tim bhangrachim ani chandichim aidonam gheun ieo mhunn Belshazaran hukum dilo. Razak, tachea vhoddlea odhikareank, tachea dovorlolea bailank ani tachea dusrea bailank tantuntlean pieunk mellchem mhunn tannem tim haddunk lailim.
3 Tednam tannim Jeruzalemantlea Devachea ghorantlea mondirantlean vhelʼlim tim bhangrachim aidonam haddlim ani raza, tache vhoddle odhikari, tacheo dovorloleo bailo ani dusreo bailo tantuntlean pieleo.
4 Tim drakxancho soro pielim ani tannim bhangrachea, chandichea, tambeachea, lokhnnachea, lakddachea ani fatrachea devanchi vakhannʼnni keli.
5 Teach vellar, eka munxachea hatachim bottam dislim ani tim diveanchea sttenddachea* fuddle vatten aslolea razachea rajmahalachea vonttichea chunear borounk laglim. To hat boroita to razak distalo.
6 Tednam razachem tondd dhovench* zalem* ani tachea chintnamnim taka bhivoilo. Tachem bhendd oskot poddlem ani tacheo dimeo koddkoddon eka-mekak addʼddonk lagleo.
7 Razan vhoddlean bob marun, fuddar pakhupeank,* Kaldeikarank,* ani noketram polloun fuddar parkhupeank apoun haddunk hukum dilo. Razan Babilonantlea zannar munxank mhunnttlem: “Khoincho-i munis hem borovop vachta ani mhaka tacho orth sangta, taka hanv zambllea rongachea kopddean nhesoitolom, tachea golleak bhangrachi sorpolli ghaltolom ani to rajeant tisrea podver raz choloitolo.”
8 Tednam razache sogle zannar munis aile, punn tem borovop vachunk vo razak tacho orth sangonk tanchean zaunk na.
9 Tor Belshazar Raza samko bhielo ani tachem tondd dhovench zalem. Tache vhoddle odhikari pasun ghuspa-gondhollant poddle.
10 Razachea ani tachea vhoddlea odhikareanchea utrank lagon, ranni vhoddlem jevonn dovorlolem tea zagear aili. Tinnem mhunnttlem: “Raza, tum sodankal jieum. Tujem tondd dhovem kiteak poddlam? Tuka bhieunchi kainch goroz na.
11 Tujea rajeant povitr devanchi xokti aslolo ek munis* asa. Tujea bapaichea kallar, taka ginean, kholaiechi somjikai ani devanchea zannvaie sarki zannvai asa mhunn dison ailʼli. Tujea bapain, Nebukadnezar Razan taka jadu korpi iadnikancho, fuddar parkhupeancho,* Kaldeikarancho* ani noketram polloun fuddar parkhupeancho mukheli mhunn nemlolo. Hoi raza, tujea bapain oxem kelʼlem.
12 Razan, Belteshazar mhunn nanv dilʼlem tea Danielak sopnancho orth sangonk, umannim somzaunk ani khub kotthin aslole prosn suttave korunk* ojapachi tank, ginean ani kholaiechi somjikai asli. Tor atam Danielak apoun hadd ani to tuka tujea sopnancho orth sangtolo.”
13 Tednam Danielak raza mukhar haddlo. Razan Danielak vicharlem: “Mhojea bapain jea koideank Judantlean haddlole, tanchea modlo Daniel mhunnttat to tunch kai?
14 Tujea bhitor devanchi xokti, ginean, kholaiechi somjikai ani ojapachi zannvai asa mhunn hanvem tujea vixim aikolam.
15 Hem borovop vachunk ani mhaka tacho orth sangonk, mhojea mukhar zannar munxank ani fuddar parkhupeank* haddlole, punn te mhaka hea sondexacho orth sangonk xoklenant.
16 Punn tum sopnanche orth sangonk xokta ani khub kotthin aslole prosn suttave korunk* xokta mhunn hanvem tujea vixim aikolam. Atam, tum hem borovop vachunk xokta ani mhaka tacho orth sangonk xokta zalear, hanv tuka zambllea rongachea kopddean nhesoitolom, tujea golleak bhangrachi sorpolli ghaltolom ani tum rajeant tisre podver raz choloitolo.”
17 Tednam Danielan razak zobab diun mhunnttlem: “Tunvem tujim dennim tukach dovrunk zatat ani tujeo bhetto dusreank diunk zatat. Punn hanv raza pasot hem borovop vachtolom ani tacho orth taka sangtolom.
18 Tujea vixim sangchem zalear, raza, Bhov Vortea Devan tujea bapaik Nebukadnezarak, raj, vhoddponn, man ani vorteponn dilʼlem.
19 Devan taka dilolea vhoddponnak lagon, tachea mukhar sogle lok, raxttram ani veg-veglleo bhaso uloupi zome bhirantin koddkoddttale. Apleak zai taka to jivexim martalo vo jieunk ditalo ani apleak zai taka to man ditalo vo lojek ghaltalo.
20 Punn tachem kalliz gorvan bhorlem, ani to nibor kallzacho zalo tednam to gorvixtt zaun ragan vaglo. Tor taka rajeachea xinvasona voilo sokol denvoilo ani tachea koddlean taka raza mhunn asloli mhoima kaddun ghetli.
21 Taka munxam modlo dhanvddaun ghatlo, tachem kalliz zonvaranchea kallza sarkem kelem ani to ranvotti gaddvam modem ravonk laglo. Taka boilam bhaxen tonn khaunk dilem, tachi kudd mollba voilea dovan bhizli. Tednam taka kollon ailem ki Bhov Vorto Dev munxakullachea rajeant Raz choloupi zaun asa, ani to tem apleak zai taka dita.
22 “Punn tunvem, tacho put Belshazaran, hem soglem zannam zaun pasun tujem kalliz khalti korunk na.
23 Tachea bodlek, sorginchea Dhonia add tunvem tukach voir kaddlo ani tachea ghorantlim aidonam tunvem haddunk lailim. Uprant tum, tuje raz choloupi, tujeo dovorloleo bailo ani tujeo dusreo bailo tantuntlean drakxancho soro pieleo, ani chandichea, bhangrachea, tambeachea, lokhnnachea, lakddachea, fatrachea devanchi, toxench kainch pollounk ani aikonk xokonant ani kainch khobor na, toslea devanchi tunvem vakhannʼnni keli. Punn tuzo svas ani tujeo sogleo vatto jea Devachea hatant asat tachi tunvem mhoima korunk na.
24 Taka lagon, tea Devan to hat dhaddlo ani hem borovop kantoilem.
25 Ani tem kantoilʼlem borovop oxem asa: MENE, MENE, TEKEL, ani PARSIN.
26 “Hea utrancho orth oso: MENE mhunnttlear, Devan tujea rajeache dis mezleat ani tem kabar korun uddoilam.
27 “TEKEL mhunnttlear, tuka tagddent zokhla ani tujem vozon unnem asa.
28 “PERES mhunnttlear, tujea rajeache vantte keleat ani tem Mediechea ani Persiechea lokank dilam.”
29 Uprant Belshazaran hukum dilo, ani tannim Danielak zambllea rongachea kopddean nhesoilo, tachea golleak bhangrachi sorpolli ghatli ani to rajeant tisre podver raz choloitolo mhunn tache vixim kollounni keli.
30 Teach rati, Kaldeikaranchea razak Belshazarak jivexim marlo.
31 Ani tem raj Mediechea Dariusak mellʼllem. To sumar 62 vorsancho aslo.
Footnotes
^ Hem oslem diveanchem sttendd zaka sat koddem uzo pettounk zago asta.
^ Inglez bhaxent “pale.”
^ Vo “razachem rup bodolʼlem.”
^ Vo “ghaddiponn korun fuddar parkhupeank.”
^ Mhunnche, ek oslea lokancho zomo zo fuddar sangta ani noketram polloun fuddar parkhita.
^ Vo “tank aslolo munis.”
^ Vo “ghaddiponn korun fuddar parkhupeancho.”
^ Mhunnche, ek oslea lokancho zomo zo fuddar sangta ani noketram polloun fuddar parkhita.
^ Utran utor, “ani gantteo soddunk.”
^ Vo “ani ghaddiponn korun fuddar parkhupeank.”
^ Utran utor, “ani gantteo soddunk.”
