Daniel 1:1-21
1 Judacho Raza Jehoiakimachea razvottkechea tisrea vorsa, Babilonacho Raza Nebukadnezar Jeruzalemant ailo ani tannem taka veddo ghatlo.
2 Thoddea tempa uprant, Jehovan* Judacho Raza Jehoiakimak, toxench khorea Devachea ghorantlim* thoddim aidonam Nebukadnezarachea hatant dilim. Tannem tim Shinar* desant, aplea devachea ghorant* haddlim ani aplea devachea bhanddarant dovorlim.
3 Uprant, razan aplea dorbarantlo mukhel odhikari Ashpenazak thoddea Izraelitkarank,* khas korun, razachea ghoranneantlea ani unch ghoranneantlea lokank haddunk laile.
4 Te kuddin koslench unnemponn naslole ani rupest asonk zai asle. Toxench, te zannvaien, gineanan ani somjikaien bhorlole ani razachea mahalant seva korunk purte aslole tornatte* asonk zai asle. Ashpenazan tankam Kaldeikaranchem borovop ani tanchi bhas xikounk zai asli.
5 Tea bhair, razak ditat tench borem-borem jevonn ani drakxancho soro tankam dor disa diuncho mhunn razan hukum dilo. Tin vorsam tankam proxikxonn diunk zai aslem* ani tea vellachea xevottak tannim razachi seva korunk suru korunk zai asli.
6 Tanchea modle thodde je Judachea kullantle* asle te he: Daniel,* Hanania,* Mishael* ani Azaria.*
7 Ani dorbarantlea mukhel odhikarean tankam him nanvam* dilim: Danielak Belteshazar, Hananiak Shadrak, Mishaelak Meshak ani Azariak Abednego.
8 Punn apunn razachem borem-borem jevonn jevun vo drakxancho soro pieun apleak oxudʼdh korcho na mhunn Danielan aplea kallzant ghott nichov kelo. Tor apunn hea toren oxudʼdh zauncho nhoi mhunn tannem dorbarantlea mukhel odhikarea lagim porvangi magli.
9 Ani Danielak doia* ani kakut dakhounk, khorea Devan dorbarantlea mukhel odhikareak fuddem kaddlo.
10 Punn dorbarantlea mukhel odhikarean Danielak mhunnttlem: “Hanv mhojea dhoniak, mhojea razak bhietam, zannem tumcheo khauncheo ani pieuncheo vostu tharaileat. Tumchea piraiechea dusrea tornatteam* poros tumi chodd oskot disle zalear kitem korpachem? Tumkam lagon raza mukhar hanv guneanvkari zatolom.”
11 Punn jea rakhonndarak, dorbarantlea mukhel odhikarean Daniel, Hanania, Mishael ani Azariachi kallji gheunk nemlolo taka Danielan mhunnttlem:
12 “Upkar korun, dha dis tujea sevokanchi porikxa korun polloi, ani amkam khaunk thoddi bhaji ani pieunk udok di.
13 Magir, razachem borem-borem jevonn jevtat tea dusrea tornatteank* amchea sangata sor kor, ani tum jem polloita tachea pormonnem tum tujea sevokam sangata kitem kortolo tem tharai.”
14 Rakhonndaran tanchem manun ghetlem ani dha dis poriant tanchi porikxa keli.
15 Dha dis somplea uprant, tanchem rup ani tanchi bholaiki, razachem borem-borem jevonn jevpi soglea tornatteam* poros bori asli.
16 Tor tankam tharailʼlem borem-borem jevonn ani drakxancho soro diunchea bodlek to rakhonndar tankam bhaji ditalo.
17 Ani khorea Devan hea charui tornatteank* ginean ani soglea torechea borovpam vixim kholaiechi somjikai ani zannvai dili. Toxench, tannem Danielak soglea torechim dorxonam ani sopnanchi somzonni dili.
18 Nebukadnezar Razan tankam aplea mukhar haddunk tharailʼlo vell somplea uprant, dorbarantlea mukhel odhikarean tankam tachea mukhar haddle.
19 Raza tanchea lagim uloilo tednam, tea akʼkhea zomeant, Daniel, Hanania, Mishael ani Azaria sarke konnuch na mhunn tannem polloilem. Tor te raza mukhar seva korit ravle.
20 Zannvaiechi ani somzonnechi goroz aslolea khoinchea-i vixoi-acher raza tankam prosn vichartalo tednam, tachea akʼkhea rajeant aslolea soglea jadu korpi iadnikam poros ani fuddar parkhupeam* poros te dha pavtti odik bore asle mhunn tannem polloilem.
21 Ani Sirus Razachea razvottkechea poilea vorsa meren Daniel thoinch aslo.
Footnotes
^ Vo “mondirantlim.”
^ Mhunnche, Babilonia.
^ Vo “mondirant.”
^ Utran utor, “Izraelache put.”
^ Utran utor, “bhurge.”
^ Vo ghoddie, “tanchi kallji gheunk zai asli.”
^ Hacho orth “Jehovan Doia Dakhoilea.”
^ Hacho orth “Jehovan Modot Kelea.”
^ Hacho orth ghoddie “Deva Sarko Konn Asa?”
^ Hacho orth “Dev Mhozo Neai Korpi.”
^ Utran utor, “putantle.”
^ Mhunnche, Babilonantlim nanvam.
^ Vo “favor.”
^ Utran utor, “bhurgeam.”
^ Utran utor, “bhurgeank.”
^ Utran utor, “bhurgeam.”
^ Utran utor, “bhurgeank.”
^ Vo “ghaddiponn korun fuddar parkhupeam.”
