Daniel 11:1-45
11 “Punn hanv zalear, Mediechea Darius razachea poilea vorsa, taka boll diunk ani ghott korunk* ubo ravlom.
2 Atam hanv tuka sangtolom tem sot zaun asa:
“Polloi! Persient anik tin raza voir sortole,* ani chovtho raza urlolea razam poros chodd girestkai ektthaim kortolo. Ani aplea girestkaie vorvim to xoktivont zatolo tednam, to dor ekleak Grisachea rajea add uksaitolo.
3 “Uprant, ek xoktivont raza voir sortolo* ani eka vhoddlea vattaracher raz choloitolo, ani to apleak zai toxem kortolo.
4 Punn to voir sorlea uprant, tachea rajeache kuddkean-kuddke zatole ani tem prithumechea charui konnxeamnim* ximpoddttolem. Tachem raj tachea sonstik mellchem na, ani tachea odhikara khala astana tem raj jitlem xoktivont aslem titlem xoktivont tem uprant urchem na. Karonn tachem raj mulla soit umttun kaddttole ani tem dusreanchem zatolem.
5 “Dokxinnecho raza, mhunnche tachea kunvram modlo eklo, xoktivont zatolo. Punn dusro konn tori tachea poros xoktivont zatolo ani eka vhodd vattaracher raj choloitolo, ani taka tachea* poros chodd odhikar mellttolo.
6 “Thoddea vorsam uprant te ek korar* kortole. Ani ho korar thir korunk dokxinnechea razachi dhuv utʼtorechea raza koddem ietoli. Punn tika anik odhikar aschona, toxench razakui odhikar aschona ani to raz cholounk pavchona. Tika ani tika gheun aileat tankam dusreanchea hatant ditole. Toxench, zannem tika zolm dila taka* ani zannem tea kallar tika xoktivont kelʼli, tankam-i dusreanchea hatant ditole.
7 Ticheach mullantli ek kombri* ieun tacho* zago ghetoli. Ti kombri fouje lagim ietoli ani utʼtorechea razachea kilʼleacher akromonn kortoli ani tachea add panvl gheun tacher zoit melloun ghetoli.
8 Toxench ti kombri tanchea devank, tanchea dhatuchea* murteank, tanchea bhangrachea ani chandichea moladik vostunk ani tanchea lokank koidi korun Ejipttant gheun ietoli. Ti kombri thoddea vorsam meren utʼtorechea razacher akromonn korchina,
9 zo* dokxinnechea razachea rajeacher akromonn korunk ietolo, punn magir aplea desant porot voitolo.
10 “Tache* put zhuzachi toiari kortole ani ek vhodd ani vorti fouz ektthaim kortole. Tanchea modlo eklo* fuddem sortoloch ani eka buddtte bhaxen soglem vhanvoun gheun voitolo. Punn uprant to porot voitolo, ani zhuz korit aplea kilʼleant ietolo.
11 “Dokxinnecho raza koddsannen bhortolo, ani to bhair soron tachea lagim, mhunnche utʼtorechea raza lagim zhuz kortolo. To* ek vhoddlo zomo ektthaim kortolo, punn to zomo tea razachea* hatant ditole.
12 To tea zomeak gheun voitolo. Tachem kalliz gorvan fultolem ani to lakʼkhamnim lokank sokol poddo-so kortolo, punn to aplea podvecho faido gheunchona.
13 “Utʼtorecho raza porot ietolo, ani poilim poros anik vhoddlea zomeak ektthaim kortolo. Tea kallachea xevottak, thoddea vorsam uprant, to ek vhodd fouz ani zaiteo vostu gheun ietoloch.
14 Tea kallar zaite lok dokxinnechea raza add ube ravtole.
“Ani tujea lokam modle maramari kortat te* dusreanchea probhava khala ieun dorxon purnn korunk proitn kortole, punn te addkhollttole.
15 “Utʼtorecho raza ietolo ani durgam bhonvtonnim choddtti toiar korun kil’leanchea xaracher kobzo kortolo. Ani dokxinnecheo fouzo,* toxench tache vinchun kaddlole munis tachea mukhar ube ravonk xokchenant, ani tacho fuddo korunk tankam boll pasun aschem na.
16 Tachea* add zo ietolo to apleak zai toxem kortolo ani tachea mukhar konnuch ubo ravonk xokchona. To Sobit* Desant ubo ravtolo, ani tea desak nas korun uddounchi tank tachea hatant astoli.
17 To aplea rajeachem akʼkhem boll gheun ieuncho ghott nichov kortolo. Uprant to tea raza sangata korar* korun, aplea monant asa tem kortolo. Taka bailanchea dhuvecho nas korunk odhikar dilʼlo astolo. Ti tachea mukhar ubi ravonk xokchina ani ti tachi zaun urchina.
18 To porot doria deger aslolea vattarancher dhean diun, zaite zage aplea tabeant ghetolo. Tannem dusream thaun zo opman sosla to ek senapoti ieun pois kortolo, jea vorvim taka porot opman sosunk poddchona. To senapoti opman korta tacho opman kortolo.
19 Magir raza porot aplea desachea kilʼleanchea vatten aplem tondd kortolo. To addkhollon poddttolo ani to porot mellchona.
20 “Tachea zagear anik ek raza ietolo, zo vortea rajeachea akʼkhea vattarant tax vosul korpeak* dhaddttolo, punn tea razak thoddeach disamnim kabar korun uddoitole, punn krodhan vo zhuzant nhoi.
21 “Tachea zagear kainch valor naslolo ek munis uttʼttholo, ani te taka rajeachem vorteponn diunchenant. To surokxotaiechea kallar* ietolo ani fuslaun* rajeacher odhikar melloun ghetolo.
22 To buddtte sarkea xoktivont foujek* haroitolo, ani tancho nas zatolo, ani korarachea Mukheleacho-i nas zatolo.
23 Tannim tachea sangata zo korar kela taka lagon to dusreank fosoitolo, to uttʼttholo ani eka lhan raxttrachea adaran xoktivont zatolo.
24 Surokxotaiechea kallar,* to sogleant girest aslolea jilʼleant ietolo ani tachea purvozamnim korunk na toslim kamam to kortolo. To tanchea modem luttlolo mhal ani saman vanttʼttolo ani bhonvtonnim ghott durgam aslolea xarancher tabo gheunk manddnneo kortolo, punn hem to thoddeach vella pasot kortolo.
25 “To aplea bollan ani dhiran ek vhodd fouz gheun* dokxinnechea razacher akromonn korunk ietolo. Dokxinnecho raza pasun ek vhodd ani xoktivont fouz gheun zhuzachi toiari kortolo. Punn to ubo ravonk pavchona* karonn te tachea add manddnni kortole.
26 Tachea sangata rajki jevonn jevtat tech taka uddoitole.
“Ani tache fouje vixim sangchem zalear, tika haroitole* ani zaite zann moron voitole.
27 “Hea donui razanchea kallzant vaitt ievzonneo astoleo, te ekach mezar boson eka-meka lagim fott uloitole. Punn tankam kosleach kamant ies mellchem na. Karonn nemlolea kallar xevott ietolo.
28 “To* bhorpur mhal gheun aplea rajeant porot voitolo ani tachem kalliz povitr korarachea add astolem. To apleak zai toxem kortolo ani to aplea desant porot voitolo.
29 “To tharailʼlea vellar porot ietolo ani dokxinnecher akromonn kortolo. Punn hea pavtt poristhiti poilim sarki aschina,
30 karonn Kittimachim tarvam tacher akromonn kortolim, ani tachi loz korun soddttolim.
“To porot voitolo ani povitr koraracher aplo rag kaddttolo ani to apleak zai toxem kortolo. To porot voitolo ani povitr korar soddun ditat tancher dhean ditolo.
31 Tachi fouz uttʼttholi ani povitr zageak ani kilʼleak oxudʼdh kortoli, ani sodanch bhettoitat tim bolidanam kaddun uddoitoli.
“Ani te nisontton korta tosli vitt haddpi vost ubi kortole.
32 “Je lok korarachea add noxttim kamam kortat, tankam to fuslaita toslea utramnim* Devachea add vochonk uksaitolo. Punn je lok tanchea Devak vollkhotat te tachea poros xoktivont zatole ani tankam ies mellttolem.
33 Kholaiechi somjikai aslole lokam modle munis, zaitea zannank somzonni ditole. Te thoddea disam pasot tolvar, ujeachem agttem, gulamponn ani lutt-mar, hankam lagon addkhollttole.
34 Punn te addkhollttole tednam tankam thoddi modot mellttoli. Ani zaite lok fuslaita toslim utram uloun* tankam tenko ditole.
35 Ani kholaiechi somjikai aslole thodde zann addkhollttole. Tankam lagon xudʼdh korchem kam zaunchem mhunn, ani xevottachea kalla poriant nitoll ani dhovem korchem kam korchem mhunn oxem zatolem. Karonn hem soglem nemlolea vellar purnn zatolem.
36 “Raza* apleak borem dista tem kortolo ani to apleakuch voir kaddttolo ani dusrea sogleam devam poros apunn vhodd mhunn dakhoitolo. To devanchea Deva add thottakpa sarkeo vostu uloitolo. Krodhacho kall purnn zai poriant taka ies mellttolem, karonn jem tharailam tem ghoddonkuch zai.
37 To aplea purvozanchea Devachi porva korcho na, toxench to bailanchea vo dusrea khoinchea-i devachea itsechi porva korchona, to apleakuch sogleam poros voir kaddttolo.
38 Tachea bodlek* to kilʼleanchea devak mhoima ditolo. Tache purvoz vollkhonasle toslea devak bhangar, chandi, moladik fator ani moladik vostu diun mhoima ditole.
39 To eka porkea devachea sangata mellon* sogleant ghott aslolea kilʼlea add panvl ghetolo. Je taka man ditat* tankam to khub mhoima ditolo ani tankam zaiteancher raj cholouncho odhikar ditolo, toxench mol gheun tankam zomin vanttʼttolo.
40 “Xevottachea kallar, dokxinnecho raza tache koddem zhuztolo.* Ani utʼtorecho raza, rotham, ghoddesvar, ani zhuzachim khub tarvam gheun, eka vadolla bhaxen tachea lagim zhuztolo. To zaitea desamnim ghustolo ani buddtte bhaxen soglem vhanvoun vhortolo.”
41 To Sobit* Desant pasun ghustolo ani zaite des addkhollon poddttole. Punn tachea hatantlean vanchtole te he: Edom, Moab ani Amontikarancho mukhel bhag.
42 To zaitea desam vatten aplo hat fuddem kaddit ravtolo, ani Ejiptt des pasun vanchon urchona.
43 To Ejipttachea liplolea theveancher mhunnche, bhangracher, chandicher ani soglea moladik vostuncher raz choloitolo. Libieche ani Ethiopieche lok pasun tachea panvlam lagim astole.*
44 “Punn udente* thaun ani utʼtore thaun mellttat tea khobrank lagon to bejar zatolo, ani ragan bhoron zaiteancho nas korunk ani tankam kabar korun uddounk bhair sortolo.
45 Vhodd doria ani Sobit* Desachea povitr porvota modem to aple rajki tombu ube kortolo. Tacho nas zatolo* ani taka modot korunk konnuch aschona.
Footnotes
^ Vo “ani tachea pasot ek kilʼlo koso.”
^ Vo “raza uttʼtthole.”
^ Vo “raza uttʼttholo.”
^ Utran utor, “tem mollbantlea char vareamnim.”
^ Ghoddie, dokxinnecho raza.
^ Vo “te ixttagot.”
^ Vo “Toxench, tichea bapaik.”
^ Vo “Tichea kuttumbantlo eklo.”
^ Ghoddie, dokxinnecho raza.
^ Vo “koddoilʼlea.”
^ Ghoddie, utʼtorecho raza.
^ Ghoddie, utʼtorechea razache.
^ Utran utor, “To.”
^ Ghoddie, utʼtorecho raza.
^ Ghoddie, dokxinnechea razachea.
^ Vo “modle choranche put.”
^ Vo “dokxinnechim hotʼtearam.”
^ Ghoddie, dokxinnecho raza.
^ Vo “Mhoimebhorit.”
^ Vo “ixttagot.”
^ Vo “vattarant dusreancher bhar ghalun kam korun gheupeak.”
^ Vo “manddnnea vixim uloun.”
^ Vo ghoddie, “To xittkaunni dinastana.”
^ Vo “hotʼtearank.”
^ Vo ghoddie, “Xittkaunni dinastana.”
^ Utran utor, “ani aplea kallzan.”
^ Vo “to tacho fuddo korunk xokchona.”
^ Vo “tika buddttent vhanvoun uddoitole.”
^ Ghoddie, utʼtorecho raza.
^ Vo “to mosko lavun; to fosoun.”
^ Vo “lok mosko lavun; lok fosoun.”
^ Ghoddie, utʼtorecho raza.
^ Vo “zagear.”
^ Vo “devachea adaran.”
^ Vo ghoddie, “Zankam to man dita.”
^ Vo “xingamnim zhuztolo.”
^ Vo “Mhoimebhorit.”
^ Vo “tacho pattlav kortole.”
^ Vo “suria udeta thoim.”
^ Vo “Mhoimebhorit.”
^ Vo “To aplea xevottak pavtolo.”
