Daniel 3:1-30
-
Nebukadnezar Razachi bhangrachi murti (1-7)
-
Raza murtechi bhokti korunk adnea dita (4-6)
-
-
Tin Hebrev, adneak pallo dinant mhunn tancher arop (8-18)
-
“Tujea devanchi ami seva korchenant” (18)
-
-
Ujeachea bhottʼttent tankam uddoile (19-23)
-
Vizmita vorvim te ujeantlean salvar zale (24-27)
-
Raza Hebrevanchea Devachi vakhannʼnni korta (28-30)
3 Nebukadnezar razan, 60 hat* unch ani 6 hat* rund asloli ek bhangrachi murti keli. Tannem ti Babilonachea Dura nanvachea jilʼleant ubi keli.
2 Uprant, Nebukadnezar Razan satrap-ank,* mukhel odhikareank, razpalank, solʼlo diupeank, theve samballpeank, neai korpeank, nogor odhikareank ani soglea jilʼleanchea odhikareank, Nebukadnezar Razan ubi kelʼlea murtechea udgattonak ieunk sanglem.
3 Tor satrap,* mukhel odhikari, razpal, solʼlo diupi, theve samballpi, neai korpi, nogor odhikari ani soglea jilʼleanche odhikari Nebukadnezar Razan ubi kelʼlea murtechea udgattonak ektthaim zale ani te sogle tea murte mukhar ube ravle.
4 Razachea sondex diupean vhoddlean oxi kollounni keli: “Lokamno, raxttramno ani veg-veglleo bhaso uloupi zomeamno, tumkam oxi adnea dilʼli asa.
5 Tumkam xingacho,* basurecho,* kinorecho,* vhoddlea basurecho,* tar aslolea sadhonancho ani soglea torechea sadhonancho avaz aikonk ieta tednam tumi Nebukadnezar Razan ubi kelʼlea bhangrache murtek paim-am poddonk zai ani tichi bhokti korunk zai.
6 Zo konn tichea paim-am poddona ani tichi bhokti korina, taka rokddoch ujeachea bhottʼttent uddoitole.”
7 Tor soglea lokamnim xingacho, basurecho, kinorecho, vhoddlea basurecho, tar aslolea sadhonancho ani soglea torechea sadhonancho avaz aikolo tednam, sogle lok, raxttram ani veg-veglleo bhaso uloupi zome Nebukadnezar Razan ubi kelʼle bhangrache murtek paim-am poddle ani tannim tichi bhokti keli.
8 Tea vellar thodde Kaldeikar mukhar aile ani tannim Judevancher arop ghatlo.*
9 Tannim Nebukadnezar Razak mhunnttlem: “Raza, tum sodankal jieum.
10 Raza, tunvem hukum dilʼlo ki dor ek munis, xingacho, basurecho, kinorecho, vhoddlea basurecho, tar aslolea sadhonancho ani soglea torechea sadhonancho avaz aikota tednam, tannem hea bhangrache murtek paim-am poddonk zai ani tichi bhokti korunk zai,
11 ani zo konn tichea paim-am poddona ani tichi bhokti korina, taka ujeachea bhottʼttent uddounk zai.
12 Punn umkech Judev asat, zankam tunvem Babilonachea jilʼleacher karbar cholounk nemleat. Tanchim nanvam, Shadrak, Meshak ani Abednego. Raza, hea munxamnim tuka matui man diunk na. Te tujea devanchi seva korinant ani tunvem ubi kelʼlea bhangrachea murtechi bhokti korunk nakartat.”
13 Hem aikon Nebukadnezaracho rag samko pettlo ani tannem Shadrak, Meshak ani Abednegok apounk hukum dilo. Tor hea munxank raza mukhar haddun ube kele.
14 Nebukadnezaran tankam mhunnttlem: “Shadrak, Meshak ani Abednego, tumi mhojea devanchi seva korinant ani hanvem ubi kelʼlea bhangrache murtechi bhokti korunk nakartat, hem khorem kai?
15 Atam tumi xingacho, basurecho, kinorecho, vhoddlea basurecho, tar aslolea sadhonancho ani soglea torechea sadhonancho avaz aikotat tednam, hanvem kelʼlea murtek tumi paim-am poddonk ani tichi bhokti korunk toiar asat zalear borem asa. Punn tumi tichi bhokti korunk nakartat zalear, tumkam rokddech ujeachea bhottʼttent uddoitole. Oso khoincho dev asa, zo tumkam mhojea hatantlean salvar korunk xoktolo?”
16 Shadrak, Meshak ani Abednegon razak zobab diun mhunnttlem: “Nebukadnezar raza, hea vixim tuka zobab diunk amkam koslich goroz na.
17 Raza, amkam ujeachea bhottʼttent uddoile zalear pasun, ami seva kortat to amcho Dev amkam tantuntlean salvar korunk xokta, ani tujea-i hatantlean salvar korunk xokta.
18 Punn raza, to amkam salvar korina zalear pasun, zannam zav ki tujea devanchi ami seva korchenant vo tunvem ubi kelʼlea bhangrachea murtechi ami bhokti korchenant.”
19 Tednam Nebukadnezar, Shadrak, Meshak ani Abednegocher itlo ragar zalo ki tachea tondda voile hav-bhav samkech bodolʼle,* ani tannem bhottʼtti sodam poros sat pavtti chodd gorom korunk hukum dilo.
20 Tannem aplea foujentlea thoddea xoktivont munxank, Shadrak, Meshak ani Abednegok bandun, tea ujeachea bhottʼttent uddounk hukum dilo.
21 Tor tannim tankam tigankui tanche kott, topi ani tanchea dusrea kopddeam soit bandle, ani tankam ujeachea bhottʼttent uddoile.
22 Ani razachem formonn itlem koddok aslem ani ti bhottʼtti itli gorom asli dekhun Shadrak, Meshak ani Abednegok thoim vhelʼle te munis tea ujeak lagon mele.
23 Punn he tin munis Shadrak, Meshak ani Abednego, zankam bandlole te toxech tea ujeachea bhottʼttent poddle.
24 Uprant, Nebukadnezar raza bhielo ani to rokddoch utthlo ani tannem aplea vhoddlea-vhoddlea odhikareank mhunnttlem: “Ami tin munxank bandun ujeant uddounk nasle kai?” Tannim razak mhunnttlem: “Hoi raza.”
25 Tednam razan mhunnttlem: “Punn polloi! Mhaka bhottʼttechea ujeant char munis susegad bhonvtat te dixtti poddttat. Te bandlole nant ani tankam kainch zaunk na. Ani chovtho munis tor devancho put koso dista.”
26 Nebukadnezar ujeachea bhottʼttechea dara lagim gelo ani mhunnttlem: “Shadrak, Meshak ani Abednego, Bhov Vortea Devachea sevokamno, bhair sorat ani hanga ieiat!” Shadrak, Meshak ani Abednego ujeantlean bhair aile.
27 Hea munxanchea kuddicher ujeacho kainch porinnam zaunk na mhunn thoim ektthaim zalʼlea satrap-amnim,* mukhel odhikareamnim, razpalamnim, ani razachea vhoddlea-vhoddlea odhikareamnim polloilem. Tanchea toklecho ek kens poriant lhasonk naslo, tanchea angar aslole kopdde poilim asle toxech asle, ani tankam ujeacho vas poriant ienaslo.
28 Tednam Nebukadnezaran mhunnttlem: “Shadrak, Meshak ani Abednegochea Devachi vakhannʼnni zaum, zannem aplea devdutak dhaddun aplea sevokank salvar kele. Tannim aplea Devacher visvas dovorlo ani te razan dilʼlea adnea add gele. Aplea Deva bhair, dusrea khoinchea-i devachi seva vo bhokti korchea poros, te moronk toiar asle.*
29 Taka lagon, hanv hukum ditam ki khoinche-i lok, raxttr vo khoinchi-i bhas uloita to zomo, Shadrak, Meshak ani Abednegochea Deva add kitem-i mhunntta zalear, tanche kuddkean-kuddke korun uddounche ani tanchim ghoram lokam pasot sonddas* korun soddchim, karonn oso konnuch dev na zo hea Deva bhaxen salvar korunk xokta.”
30 Uprant razan, Shadrak, Meshak ani Abednegok Babilonachea jilʼleant anik vhodd podvi dili.
Footnotes
^ Sumar 27 m (88 ft). Mahiti B14 polloi.
^ Sumar 2.7 m (8.8 ft). Mahiti B14 polloi.
^ Xobdhkox polloi.
^ Xobdhkox polloi.
^ Inglez bhaxent taka “flute” mhunnttat.
^ Hi ek vazoupachi vost jika gitara bhaxen tar astat, punn ticho akar gitara bhaxen na. Inglez bhaxent tika “harp” mhunnttat.
^ Inglez bhaxent taka “bagpipe” mhunnttat.
^ Vo “Judevanchem nanv piddʼddear kelem.”
^ Vo “ki tacho sobhav samkoch bodolʼlo.”
^ Xobdhkox polloi.
^ Vo “tannim apleo kuddi bhettoileo.”
^ Vo “kumanv; kakus.” Vo ghoddie, “kochro uddoupacho zago; xennachi ras.”
