Daniel 2:1-49
-
Nebukadnezar Razak bejar korta toslem ek sopon poddlem (1-4)
-
Khoinchoch zannar munis sopon sangonk xokona (5-13)
-
Daniel modoti pasot Devak ulo marta (14-18)
-
Gutt kolloilo mhunn Devak vakhannʼnni (19-23)
-
Daniel razak sopon sangta (24-35)
-
Sopnacho orth (36-45)
-
Rajeacho fator putlleacho churo kortolo (44, 45)
-
-
Danielak razan man dilo (46-49)
2 Nebukadnezarak, tachea razvottkechea dusrea vorsa zaitim sopnam poddlim, ani to itlo bejar zalo ki taka nhid poddonasli.
2 Taka lagon, apnnem polloilʼlim sopnam sang mhunn razan jadu korpi iadnikank, fuddar parkhupeank,* ghaddiponn korpeank ani Kaldeikarank* hukum dilo. Tor te aile ani raza mukhar ube ravle.
3 Razan tankam mhunnttlem: “Mhaka ek sopon poddlam ani hanv khub bejar asam. Tem sopon kitem tem mhaka zannam zaunk zai.”
4 Tednam Kaldeikaramnim Aramaik bhaxent* razak mhunnttlem: “Raza, tum sodankal jieum. Tujea hea sevokank tem sopon sang, ani ami tuka tacho orth sangtole.”
5 Razan Kaldeikarank mhunnttlem: “Mhozo nirnnoi oso asa: Tumi mhojem sopon ani tacho orth mhaka sangonant zalear, hanv tumche kuddkean-kuddke korun uddoitolom ani tumchim ghoram lokam pasot sonddas* korun soddttolom.
6 Punn tumi mhojem sopon ani tacho orth mhaka sanglo zalear, tumkam mhojea koddlean dennim, ek inam ani vhodd man mellttolo. Tor, mhojem sopon ani tacho orth mhaka sangat.”
7 Tannim dusre pavtti razak mhunnttlem: “Razan aplea hea sevokank tem sopon sangchem ani ami tacho orth sangtole.”
8 Tednam razan tankam zobab diun mhunnttlem: “Tumi fokot vell kaddunk sodhtat mhunn hanv bore bhaxen zannam, karonn hanvem koslo nirnnoi ghetla to tumkam khobor asa.
9 Tumi mhaka tem sopon sangonant zalear, tumkam sogleank tich khast mellttoli. Punn tumi sogleamnim mellon mhaka fottounk ani fosounk chintlam, karonn vell voita toso mhojem mon bodoltolem mhunn tumkam dista. Begin mhojem sopon mhaka sangat, ani tumi tacho orth sangonk xoktat vo na tem mhaka sarkem kollttolem.”
10 Kaldeikaramnim razak mhunnttlem: “Prithumer* oslo konnuch munis na, zo razan sanglam tem korunk xokta. Karonn aiz poriant khoincheach vortea razan vo razpalan, khoinchea-i jadu korpi iadnikak, vo fuddar parkhupeak, vo Kaldeikarak osli vost vicharunk na.
11 Raza vicharta tem sangop khub kotthin asa. Razan vicharlam tem devank soddun khoinchoch munis sangonk xokchona, ani dev tor munxam modem ravonant.”
12 Hem aikotanch, razacho rag samko pettlo, ani tannem Babilonantlea soglea zannar munxancho nas korun uddounk hukum dilo.
13 Ho hukum diun, te zannar munxank jivexim marche asle tednam, te Danielak ani tachea sangateank jivexim marunk, tankam pasun sodhunk lagle.
14 Tednam, rakhonndarancho mukheli Ariok Babilonantlea soglea zannar munxank jivexim marunk bhair sorlo. Tea vellar, Daniel tache lagim chotraien ani xanneponnan uloilo.
15 Tannem razacho odhikari Ariokak vicharlem: “Razan itlem koddok formonn kiteak marlam?” Tednam Ariokan Danielak soglem sanglem.
16 Tor Daniel raza lagim gelo ani tannem tachea sopnacho orth sangonk vell maglo.
17 Uprant Daniel aplea ghora gelo ani tannem aplea sangateank, Hanania, Mishael ani Azariak hea vixim sanglem.
18 Sorginchea Devan tankam kakut dakhounchi ani to gutt ukto korcho mhunn Danielan tankam magnnem korunk sanglem. Hea vorvim, Babilonantlea her zannar munxam sangata Daniel ani tachea sangateancho nas zauncho naslo.
19 Uprant ratchea vellar eka dorxonant Danielak to gutt ukto zalo. Tor tannem sorginchea Devachi vakhannʼnni keli.
20 Danielan mhunnttlem:
“Sasnachea-sasnak* Devachea nanvachi vakhannʼnni zaum,Karonn zannvai ani xokti tachi ekleachich.
21 To vell ani kall bodolta,Razank xinvasonar bosoita ani xinvasona voile kaddunui uddoita,Zannarank zannvai dita ani somzunchi tank asloleank ginean dita.
22 Kholaiecheo ani liploleo vostu to ugddapeo korta,Kallkhant kitem asa tem to zannam,Ani tachea sangata uzvadd ravta.
23 Mhojea purvozanchea Deva, hanv tuka dhinvastam ani vakhannttam,Karonn tunvem mhaka zannvai ani xokti dili.
Ani ami tujea lagim jem maglem, tem tunvem mhaka kollit kelam,Razak jea vixim usko aslo, tem tunvem amkam kolloilam.”
24 Uprant, Babilonantlea soglea zannar munxancho nas korunk razan hukum dilʼlea Arioka lagim Daniel gelo, ani tannem taka mhunnttlem: “Babilonantlea khoincheach zannar munxacho nas korinaka. Mhaka raza lagim vhor, ani hanv razak tachea sopnacho orth sangtolom.”
25 Ariok rokddoch Danielak raza lagim gheun gelo, ani tannem razak mhunnttlem: “Mhaka Judachea koideam modlo ek munis mellʼlla zo razak tachea sopnacho orth sangonk xokta.”
26 Razan Danielak, zachem nanv Belteshazar aslem, taka mhunnttlem: “Hanvem koslem sopon polloilam ani tacho orth kitem, tem tum mhaka khorench sangonk xokta?”
27 Danielan razak mhunnttlem: “Razan vicharla to gutt, khoinchoch zannar munis, fuddar parkhupi,* jadu korpi iadnik vo noketram polloun fuddar parkhupi munis sangonk xokona.
28 Punn sorgar, gutt Kolloupi ek Dev asa, ani xevottachea disamnim kitem zaunchem asa tem tannem Nebukadnezar Razak kolloilam. Hem tujem sopon, ani him tujim dorxonam jim tunvem tujea khattir nhidlolo astana polloilʼlim:
29 “Punn raza, tum tujea khattir astana fuddarak kitem zaunchem asa tem chintunk laglo, ani gutt Kolloupi Devan fuddem kitem zaunchem asa tem tuka kolloilam.
30 Punn mhojea vixim sangchem zalear, prithumer jietolea khoinchea-i munxa poros mhaka vorti zannvai asa dekhun mhaka ho gutt kollounk na, tachea bodlek, razachea sopnacho orth sangcho mhunn to gutt mhaka kolloila, jea vorvim tum tujea kallzachim chintnam zannam zaunk pavtolo.
31 “Raza, tum ek sopon polloitalo ani tea sopnant tunvem ek vhoddlo putllo polloilo. To putllo boroch vhoddlo aslo ani samko chokchoktalo. To putllo tujea mukhar aslo ani to pollounk bhirankull distalo.
32 Tea putlleachi tokli xudʼdh bhangrachi asli. Tachem hoddʼddem ani tache hat chandiche asle, tachem pott ani tachim zangllam tambeachim aslim.
33 Tache paim lokhnnache ani tachea paim-ancho sokoilo bhag ordo lokhnnacho ani ordo matiecho* aslo.
34 Tum polloit aslo, tednam ek fator, zo konnench aplea hatamnim katrunk naslo, to ailo ani samko tea putlleachea lokhnnachea ani matiechea paim-ancher poddlo, ani tancho churo korun uddoilo.
35 Tea vellar, tea lokhnnacho, matiecho, tambeacho, chandicho ani bhangracho, hancho sogleancho ekuch borabor churo zalo ani tem soglem gormechea vellar mollnnechea khollar aslolea bhatache sali sarkem zalem, jem varem uboun itlem pois vhorta ki tachem kainch urona. Punn tea putlleacher zo fator poddlo, tacho ek vhoddlo porvot zalo ani tannem akʼkhi prithum bhorli.
36 “Hem aslem tujem sopon, ani atam ami razak tacho orth sangtole.
37 Raza, tum razancho raza zaun asa, zaka sorginchea Devan raj, xokti, boll, ani mhoima dilea.
38 Ani tannem tujea hatant munxank dileat, te khoinsorui ravom, tannem tankam tujea hatant dileat. Toxench, ranantlea zonvarank ani mollba voilea suknneank pasun tannem tujea hatant dileant. Tannem tuka tancher sogleancher raz choloupi mhunn nemla. Tunch ti bhangrachi tokli.
39 “Punn tujea uprant anik ek raj upzotolem, jem tujea itlem bollixtt aschem na. Ani tachea uprant anik ek raj, ek tisrem raj upzotolem. Tem tambeachem astolem ani akʼkhe prithumer raz choloitolem.
40 “Chovthea rajea vixim sangchem mhunnttlear, tem lokhnna bhaxen ghott astolem. Karonn lokhonn zoxem dusreo sogleo vostu foddun uddoita ani tancho samko churo korun uddoita, hoi, kuddkean-kuddke kortolea lokhnna bhaxen tem tachea adlea soglea rajeancho churo korun, tanche kuddkean-kuddke korun uddoitolem.
41 “Ani zoxem tunvem tache paim ani bottam polloilim, zancho thoddo bhag kumbharachea matiecho ani thoddo bhag lokhnnacho aslo, tea toren tem raj pasun vanttlolem astolem. Punn tunvem zoxem polloilem ki lokhonn mov matie sangata miks* zalʼlem asa, toxench tea rajeant lokhnnachi thoddi ghottsann pasun astoli.
42 Ani zoso tachea paim-anchea bottancho thoddo bhag lokhnnacho ani thoddo bhag matiecho aslo, toxench tem rajui thoddem ghott ani thoddem oskot astolem.
43 Lokhonn, mov matie sangata miks zalʼlem asa tem tunvem polloilem toxem, tacho ghott bhag lokamnim miks zalʼlo astolo. Punn lokhonn, matie sangata miks zaina tea bhaxen, te eka-mekak chittkon aschenant.
44 “Tea razanchea disamnim, sorgincho Dev ek oslem raj stapon kortolo, zacho kednanch nas zaunchona. Ani hem raj dusrea konnancheach* hatant voichem na. Tem hea soglea rajeancho churo korun tankam kabar kortolem, ani fokot tench sodankal urtolem.
45 Tunvem zoxem polloilʼlem toxench zatolem. Tunvem polloilʼlem ki porvota voilo ek fator, zo konnench aplea hatamnim katrunk naslo, tea fatran tea lokhnnacho, tambeacho, matiecho, chandicho ani bhangracho churo korun uddoilo. Fuddarak kitem zaunchem asa tem razak, Vortea Devan kolloilam. Hem sopon khorem ani tacho orth patiepa sarko.”
46 Tednam Nebukadnezar Raza, Daniela mukhar zomnir umto poddlo ani tannem taka man dilo. Ani tannem taka ek dennem diunk ani tachea pasot dhump bhettounk hukum dilo.
47 Razan Danielak mhunnttlem: “Khorench, tuzo Dev devancho Dev, razancho Dhoni ani gutt Kolloupi Dev zaun asa. Takach lagon, tum ho gutt kollounk xoklo.”
48 Uprant, razan Danielak ek unch podvi dili, taka zaitim borim-borim dennim dilim, ani tannem taka Babilonachea akʼkhea jilʼleacher raz choloupi mhunn nemlo ani Babilonachea soglea zannar munxancho mukhel odhikari mhunn nemlo.
49 Ani Danielan raza lagim vinoti keli dekhun, razan Shadrak, Meshak ani Abednegok Babilonachea jilʼleacho karbar samballunk nemle, punn Danielan razachea dorbarant seva keli.
Footnotes
^ Vo “ghaddiponn korun fuddar parkhupeank.”
^ Mhunnche, ek oslea lokancho zomo zo fuddar sangta ani noketram polloun fuddar parkhita.
^ Da 2:4b tem 7:28 meren aslolim him versam survatek Aramaik bhaxent boroilolim.
^ Vo “kumanv; kakus.” Vo ghoddie, “kochro uddoupacho zago; xennachi ras.”
^ Vo “Suke zomnir.”
^ Vo “Sasnak thaun sasnak poriant.”
^ Vo “ghaddiponn korun fuddar parkhupi.”
^ Vo “bhottʼttent bhazlolea (toiar kelʼlea) matiecho.”
^ Vo “misoll.”
^ Vo “lokanchea.”
