Daniel 4:1-37
4 “Akʼkhea prithumer ravpi lokank, raxttrank ani veg-veglleo bhaso uloupi zomeank, ho Nebukadnezar Raza koddlean sondex: Tumchi xanti vaddom!
2 Bhov Vortea Devan mhojea thaim jeo khunna ani vizmitam keleant tea vixim tumkam kollounk mhaka khuxi bhogta.
3 Tacheo khunna kitleo vorteo, ani tachim vizmitam kitlim xoktivont! Tachem raj sasnachem raj, ani tachi razvottki pillgean-pillgi poriant urta tosli zaun asa.
4 “Hanv Nebukadnezar, mhojea ghorant susegad aslom ani mhojea rajmahalant khuxalkaien jivit sartalom.
5 Hanvem ek sopon polloilem zaka lagon hanv bhielom. Hanv mhojea khattir add poddlolom astana, mhaka oslim chitram ani dorxonam dislim ki hanv samko bhielom.
6 Tor mhaka mhojea sopnacho orth sangonk, hanvem Babilonantlea soglea zannar munxank mhojea mukhar hadd mhunn hukum dilo.
7 “Tea vellar, jadu korpi iadnik, fuddar parkhupi,* Kaldeikar* ani noketram polloun fuddar parkhupi munis mhojea mukhar aile. Hanvem tankam mhojem sopon sanglem tednam, te mhaka tacho orth sangonk xoklenant.
8 Xevottak, Daniel mhojea mukhar ailo. Taka mhojea devachea nanva voilean Belteshazar mhunn nanv ghatlolem, ani tachea bhitor povitr devanchi xokti asli. Hanvem taka tem sopon sanglem:
9 “‘Belteshazar, jadu korpi iadnikanchea mukhelea, tujea bhitor povitr devanchi xokti asa ani khoinchoch gutt sangonk tuka kotthin na mhunn hanv bore bhaxen zannam. Tor hanvem mhojea sopnant polloilʼlea dorxonancho orth mhaka somzai.
10 “‘Mhojea khattir astana polloilʼlea dorxonamnim hanvem prithumechea modem ek rukh polloilo. To khubuch vhodd aslo.
11 To rukh vaddlo, ani boroch ghott zalo. Tachi unchai mollba poriant pavli, ani to akʼkhea prithumechea konnxea-konnxeamnim distalo.
12 Tachim panam sobit aslim, to bhorpur follam ditalo, ani sogleank pavta titlem jevonn to ditalo. Ranvotti zonvaram tachea ponda savllek ravtalim, tachea khandeancher mollba voilim suknnim ravtalim, ani soglea pranneank tachea thaun jevonn mellttalem.
13 “‘Hanv mhojea khattir tim dorxonam polloitalom tednam, hanvem sorgar thaun denvon ieta tea eka nodor dovorpeak,* eka povitr sondexkarak polloilo.
14 Tannem vhoddlean mhunnttlem: “Ho rukh katrun uddoi, tache khande mar, tachim panam zhoddoi ani tachim follam ximpddaun uddoi! Tachea ponda aslolim zonvaram pollon vochom ani tachea khandeam voilim suknnim uddon vochom.
15 Punn tachem mund, tachea mullam soit zomnintuch sodd. Taka lokhnnachea ani tambeachea pottʼttean bandun moidanantlea tonna modem toxench sodd. Mollba voilea dovan tem bhizom, ani prithume voilea tonna modem tem ranvotti zonvaram sangata urom.
16 Taka aslolem munxachem kalliz bodlun, taka zonvarachem kalliz mellom, ani tachea voilean sat kall soron vochom.
17 Hem nodor dovorpean dilolea hukuma pormonnem, ani hi vinoti povitr sondexkaranchea utra pormonnem zaun asa. Hea vorvim, zo Bhov Vorto asa, to munxanchea rajeant Raz choloupi zaun asa ani to tem apleak zai taka dita, ani lhanantlea-lhanak* pasun tacher raz cholounk nemta mhunn jietat te sogle lok zannam zatole.”
18 “‘Hanvem Nebukadnezaran polloilolem tem sopon hem. Atam Belteshazar, tum hacho orth sang, karonn mhojea rajeantle her sogle zannar munis mhaka hacho orth sangonk xokonant. Punn tum sangonk xokta, karonn povitr devanchi xokti tujea bhitor asa.’
19 “Tea vellar Daniel, zachem nanv Belteshazar, to bhieon eka khinnak* thoinch ghott zalo, ani aplea chintnank lagon taka bhirant disli.
“Razan mhunnttlem, ‘Belteshazar, tea sopna vixim ani tachea ortha vixim chintun tum bhienaka.’
“Belteshazaran zobab diun mhunnttlem, ‘Mhojea dhonia, hem sopon tuzo dves kortoleank lagom ani tacho orth tujea dusmanank lagom.
20 “‘Tunvem polloilʼlo rukh, zo khub vaddlo ani ghott zalo, zachi unchai mollba poriant pavloli, ani zo akʼkhe prithumer dixtti poddttalo,
21 zachim panam sobit aslim, zo bhorpur follam ani sogleank jevonn ditalo, ani zachea khala ranvotti zonvaram ravtalim, ani zachea khandeancher mollba voilim suknnim ravtalim,
22 to rukh tum zaun asa raza. Karonn tum khub vaddla ani boroch ghott zala, ani tujem vorteponn vaddlam ani mollba meren pavlam ani tuji razvottki prithumechea konnxea-konnxeam meren pavlea.
23 “‘Ani ek nodor dovorpi,* ek povitr sondexkar sorgar thaun denvon ieta to razan polloilo, zo oxem mhunnttalo: “Ho rukh katrun uddoi ani tacho nas kor, punn tachem mund, tachea mullam soit zomnintuch sodd. Taka lokhnnachea ani tambeachea pottʼttean bandun moidanantlea tonna modem toxench sodd. Ani tachea voilean sat kall soron vochom poriant, mollba voilea dovan tem mund bhizom, ani prithume voilea tonna modem tem ranvotti zonvaram sangata urom.”
24 Raza, hacho orth oso. Bhov Vortea Devan mhojea dhonia razacher hem formonn marlam.
25 Bhov Vorto Dev, munxanchea rajeant Raz choloupi zaun asa ani to tem apleak zai taka dita mhunn tum zannam zaum poriant, tuka munxam modlo dhanvddaun ghaltole, tum ranvotti zonvaram modem ravtolo, tuka boilam bhaxen tonn khaunk ditole, tum mollba voilea dovan bhiztolo, ani tujea voilean sat kall soron voitole.
26 “‘Punn tannim rukhachem mund, tachea mullam soit zomnintuch soddunk sanglem. Hacho orth, sorgar konn tori raz choloita mhunn tum zannam zalea uprant tujem raj porot tujem zatolem.
27 Raza, taka lagon upkar korun mhozo solʼlo manun ghe. Sarkem tem korun tujim patkam soddun di, ani goribank kakut dakhoun tujem noxtteponn pois kor. Tunvem oxem kelear, ghoddie tuje khuxalkaieche dis vaddttole.’”
28 Hem soglem Nebukadnezar Raza sovem ghoddlem.
29 Bara mhoinea uprant, to Babilonant aplea rajmahalachea tteresar pasoi-o martalo.
30 Tednam raza mhunnttalo: “Hem tench Vorixtt Babilon nhoi kai, jem hanvem svota mhojea bollan ani xokten mhojea vorteponnachea mhoimek lagon rajmahal koxem bandlam?”
31 Raza uloita astananch, sorgar thaun oso ek avaz aikonk ailo: “Nebukadnezar Raza, tujea pasot ho sondex asa, ‘Tujem raj tujea thaun kaddun ghetlam,
32 ani tuka munxam modlo dhanvddaun ghatla. Tum ranvotti zonvaram modem ravtolo, tuka boilam bhaxen tonn khaunk ditole, ani tujea voilean sat kall soron voitole. Tednam, Bhov Vorto Dev munxanchea rajeant Raz choloupi zaun asa, ani to tem apleak zai taka dita mhunn tum zannam zatolo.’”
33 Teach vellar, him utram Nebukadnezara sovem ghoddon ailim. Taka munxam modlo dhanvddaun ghatlo, to boilam bhaxen tonn khaunk laglo, tachi kudd mollba voilea dovan bhizli, ani tache kens ghonninchea pakham bhaxen lamb zale ani tachim nakttam suknneanchea davlam bhaxen zalim.
34 “Tea vellachea xevottak, hanvem Nebukadnezaran, voir sorgak polloilem ani mhoji chintpachi tank mhaka porot mellʼlli, ani hanvem Bhov Vortea Devak vakhannlo. Sasnachea-sasnak jietolea Devachi hanvem vakhannʼnni keli ani taka mhoima dili, karonn tachi razvottki sasnachi razvottki, ani tachem raj pillgean-pillgi poriant urta toslem zaun asa.
35 Prithumer jietole sogle lok tachea mukhar kainch nhoi. Sorginche fouje sangata ani prithumer jietolea lokam sangata to aple khuxe pormonnem vagta. Taka addaitolo konnuch na, vo ‘Tunvem hem kitem kelam?’ mhunn taka vichartolo konnuch na.
36 “Tea vellar mhoji chintpachi tank mhaka porot mellʼlli, ani mhojem raj ani tachem soglem vorteponn mhaka porot mellʼllem. Ani mhaka portun man ani vhoddponn mellʼllem. Toxench, mhoje vhoddle-vhoddle ani unch podvi aslole odhikari porot mhojea lagim solʼlo gheunk ieunk lagle. Mhaka mhojem raj porot mellʼllem ani mhaka poilim poros chodd mhoima mellʼlli.
37 “Atam hanv Nebukadnezar, sorginchea Razachi vakhannʼnni, vhoddvik ani mhoima kortam. Karonn tachim soglim kamam sota pormonnem asat, tacheo vatto niti pormonnem asat ani gorvan choltoleank to khalto korunk xokta.”
